“E vaiiho atu vau i te hau, e horoa ˈtu vau i to ˈu nei hau. Te hau ta ˈu e horoa ˈtu, mea taa ê ïa i te hau ta teie nei ao e horoa ˈtu. Eiaha to outou aau ia horuhoru, eiaha atoa ia taiâ.”—Ioane 14:27, Huriraa o te ao apî.

 “E hau ta ˈu e vaiiho ia outou nei, o to ˈu nei hau ta ˈu e ho atu no outou; e ere mai ta to te ao nei horoa ta ˈu horoa ia outou. Eiaha e taiâ to outou aau, eiaha hoi e mǎtaˈu.”—Ioane 14:27, Te Bibilia Moˈa ra.

 Na roto i teie mau parau, ua tamahanahana Iesu i ta ˈna mau aposetolo eiaha ratou ia haapeapea rahi roa a faaruru ai i te fifi. Mai ia ˈna, e nehenehe ratou e faaea hau noa maoti te tauturu a te Atua.

 Eaha te hau ta Iesu i vaiiho, aore ra i horoa, i ta ˈna mau aposetolo? Ua horoa Iesu i to ˈna hau, oia hoi te hau ta ˈna i fanaˈo. E ere râ te auraa eita ratou e faaruru i te fifi aore ra i te ati. (Ioane 15:20; 16:33) Noa ˈtu hoi ua haamauiuihia Iesu ma te tano ore e ua haapohehia, ua hau noa to ˈna feruriraa e to ˈna aau. (Luka 23:27, 28, 32-34; Petero 1, 2:23) Ua fanaˈo Iesu i tera hau o roto no te mea ua ite o ˈna ua here e ua farii to ˈna Metua ra o Iehova a ia ˈna.—Mataio 3:16, 17.

 Ua horoa Iesu i te hau i ta ˈna mau aposetolo ma te haapapu atu ua here e ua farii raua to ˈna Metua ia ratou. (Ioane 14:23; 15:9, 10; Roma 5:1) Maoti to ratou faaroo ia Iesu te Tamaiti a te Atua, na te hau ta Iesu i horoa e tauturu atu ia ore e mǎtaˈu e e horuhoru. (Ioane 14:1) Noa ˈtu aita faahou Iesu ia ratou ra, ua fafau oia e tauturu te varua moˈa o te Atua ia ratou ia ore ia mǎtaˈu e ia faaea hau noa. (Ioane 14:25-27) E nehenehe te mau pǐpǐ a Iesu e faaruru i te mau tupuraa fifi ma te itoito ia papu ia ratou te farii e te turu ra Iehova ia ratou.—Hebera 13:6.

 A ora ˈi Iesu i nia i te fenua, ua matau te taata i te aroha ia vetahi ê ma te parau: “Ei nia ia outou te hau!” (Mataio 10:12, 13) Aita râ Iesu i parau noa, ua horoa atoa o ˈna i te hau i ta ˈna mau aposetolo. Hau atu â, mea taa ê te hau ta Iesu e horoa i te hau ta teie nei ao b e nehenehe e horoa. E horoa paha teie nei ao i te tahi huru hau na roto mai nei i te hoa, te taoˈa, te roo aore ra te tiaraa. Te hau râ ta Iesu e horoa, eita te reira e taui ia au i te tupuraa o te oraraa, e vai noa râ te reira e a muri noa ˈtu.

 Ua faahiti Iesu i teie mau parau i ta ˈna mau aposetolo haapao maitai i te po hou o ˈna a pohe ai. I taua po ra, ua parau Iesu fatata o ˈna i te vaiiho ia ratou. (Ioane 13:33, 36) Te tumu ïa i oto roa ˈi te aau o te mau aposetolo. (Ioane 16:6) No reira Iesu i faataa ˈi no te aha eiaha ratou ia haapeapea i muri aˈe i to ˈna poheraa.

 E faaitoito te mau parau a Iesu i te mau Kerisetiano i teie mahana. E nehenehe atoa tatou e fanaˈo i te hau ta Iesu e horoa. (Tesalonia 2, 3:16) I te riroraa mai tatou ei pǐpǐ na Iesu, ua haapii tatou ua here e ua farii raua to ˈna Metua ra o Iehova ia tatou. (Kolosa 3:15; Ioane 1, 4:16) Aita ïa e faufaa ia haapeapea rahi roa tatou. No te aha? No te mea tei pihai iho Iehova ia tatou.—Salamo 118:6; Philipi 4:6, 7; Petero 2, 1:2.

 A mataitai i teie video poto o te faaite mai i te tahi mau tuhaa o te buka Ioane.