“Ia horoa te hoê taata i to ˈna ora no to ˈna mau hoa, tera te here rahi aˈe.”—Ioane 15:13, Huriraa o te ao apî.

 “Ia horoa te taata i to ˈna iho ora no to ˈna ra mau taua, aita roa e taata aroha ê atu i tei reira.”—Ioane 15:13, Te Bibilia Moˈa ra.

 Ua tauturu Iesu i ta ˈna mau pǐpǐ ia taa mea faufaa ia rahi mai to ratou here e tae roa ratou i te horoa i to ratou ora no te tahi e te tahi.

 Na mua ˈtu, ua parau Iesu i ta ˈna mau aposetolo: “Teie ta ˈu faaueraa, ia here outou te tahi i te tahi mai ia ˈu e here nei ia outou.” (Ioane 15:12) Mai te aha to Iesu here ia ratou? Mea miimii ore, ua ineine hoi oia i te haapae ia ˈna iho no ratou. I te roaraa o ta ˈna taviniraa i nia i te fenua, ua tuu Iesu i te mau hinaaro e te maitai o ta ˈna mau pǐpǐ e to te tahi atu mau taata na mua ˈˈe i to ˈna. Ua faaora oia i te maˈi o te taata e ua haapii ia ratou no nia i te Basileia o te Atua a aore ra te Faatereraa arii a te Atua. Ua tae roa oia i te rave i te ohipa haihai no te tauturu ia vetahi ê. (Mataio 9:35; Luka 22:27; Ioane 13:3-5) I roto râ i te Ioane 15:13, ua faahiti Iesu i te hoê here rahi aˈe. Oia mau, tau hora i muri aˈe, ua faaite Iesu i tera here rahi i to ˈna fariiraa i te horoa i “to ˈna ora ei hoo no te taata e rave rahi.” (Mataio 20:28; 22:39) Ma te na reira, ua faaite Iesu ua here rahi aˈe o ˈna i te taata ia ˈna iho.

 Mea here na Iesu i te huitaata. E here taa ê râ to ˈna no te feia e haapao i ta ˈna mau haapiiraa. Ua riro ta ˈna mau pǐpǐ ei hoa piri no ˈna no te mea ua rave ratou i ta ˈna i faaue e ua pee maite ia ˈna i roto i to ˈna mau ati. (Luka 22:28; Ioane 15:14, 15) E tumu rahi atu â ïa te reira no te horoa i to ˈna ora no ratou.

 Ua haapao te mau pǐpǐ matamua a Iesu i ta ˈna i parau e ua ineine i te pohe no te tahi e te tahi. (Ioane 1, 3:16) Ua riro te here miimii ore mai ta Iesu i faaite ei tapao rahi roa ˈˈe o te mau Kerisetiano mau.—Ioane 13:34, 35.

 E itehia i roto i te pene 13 tae atu i te 17 o te evanelia a Ioane ta Iesu mau aˈoraa hopea i na 11 aposetolo haapao maitai e ta ˈna pure hopea e o ratou. Tau hora hoi i muri aˈe Iesu i te poheraa. I roto i te pene 15, ua haamatara Iesu e titauhia i ta ˈna mau pǐpǐ ia hoê noa e o ˈna no te haapapu e pǐpǐ mau ratou na ˈna. Ua faaau Iesu ia ratou i te mau amaa hotu o te hoê tumu vine e ua faaitoito atu ia “hotu rahi noa.” (Ioane 15:1-5, 8) Te tahi atu ravea no te faaite i tera here miimii ore, o te pororaa ïa i te poroi ta Iesu i poro atoa, oia hoi “te parau apî oaoa o te Faatereraa arii a te Atua.”—Luka 4:43; Ioane 15:10, 17.

 A mataitai i teie video poto o te faaite mai i te tahi mau tuhaa o te buka Ioane.