“Aita e tamataraa ta outou i faaruru aita i faaruruhia e te taata. Eita râ te Atua haapao maitai e vaiiho ia tamatahia outou hau aˈe i ta outou e nehenehe e faaruru. Tera râ, a tamata-noa-hia ˈi outou, te faaineine atoa ra oia i te faaoraraa ia nehenehe outou ia faaoromai maite.”—Korinetia 1, 10:13, Huriraa o te ao apî.

 “Aita outou i roohia e te ati maori râ mai ta te taata nei â; e parau mau ta te Atua e ore oia e vaiiho noa ia outou ia ati, maori râ o te tia ia outou ia faaoromai ra; e faatupu atoa oia i te haapuraa i taua ati ra, ia tia ia outou ia faaoromai.”—Korinetia 1, 10:13, Te Bibilia Moˈa ra.

 Te haamatara ra teie irava i te tahi huru maitai e here ai tatou i te Atua, oia hoi to ˈna haapao maitai. E nehenehe te mau tavini taiva ore a te Atua e tiaturi e tauturu oia ia ratou, i te taime iho â râ e faaruru ai ratou i te tamataraa aore ra te ati.

 “Aita e tamataraa ta outou i faaruru aita i faaruruhia e te taata.” E nehenehe te mau tavini a te Atua e turaihia ia rave i ta te Atua e ore e au ra. E ere râ o ratou anaˈe i roto i tera tupuraa, e rave rahi hoi o te faaruru nei i taua mau ati ra. a No reira, e nehenehe te mau tavini a te Atua e tiaturi e maraa atoa ia ratou ia faaruru i te reira.

 “Te Atua haapao maitai.” E nehenehe te Atua ra o Iehova b e tiaturihia. Mai mutaa mai â, ua tapea noa o ˈna i ta ˈna parau eita o ˈna e faarue i te feia o te here, o te faaroo e o te tapea i to ratou taiva ore ia ˈna. (Deuteronomi 7:9; Salamo 9:10; 37:28) No reira, pauroa te feia o te haamori ia ˈna, e nehenehe ïa e tiaturi e tapea iho â oia i na parau fafau e piti i muri nei.

 “Eita râ te Atua . . . e vaiiho ia tamatahia outou hau aˈe i ta outou e nehenehe e faaruru.” Te faaite ra te Atua i to ˈna haapao maitai ma te ore e vaiiho i te mau ati ia riro ei mea fifi roa a ore atu ai e maraa i te tahi ia faaruru. Ua ite te Atua eaha te otia o ta ˈna mau tavini atoa.—Salamo 94:14.

 “A tamata-noa-hia ˈi outou, te faaineine atoa ra oia i te faaoraraa ia nehenehe outou ia faaoromai maite.” E nehenehe te Atua e faaore i te hoê fifi aore ra e horoa i te hinaarohia e ta ˈna mau tavini no te faaoromai tamau. Eaha ta ˈna e nehenehe e rave? Maoti to ˈna varua moˈa, e horoa mai oia i te tahi aratairaa aore ra e faaohipa paha oia i te Bibilia no te tamahanahana mai. Aita anaˈe, e nehenehe oia e turai i te mau taeae e tuahine i roto i te faaroo ia horoa mai i te tahi tauturu.—Ioane 14:26; Korinetia 2, 1:3, 4; Kolosa 4:11.

 E itehia teie irava i roto i te hoê o te mau rata ta te aposetolo Paulo i papai i te amuiraa i Korinetia. Ua faaohipa oia i te aamu o te nunaa Iseraela no te horoa i te tahi faaararaa i to Korinetia. (Korinetia 1, 10:11) Ua faahiti Paulo e rave rau tamataraa e faahemaraa ta te mau Iseraela i faaruru mai te haamoriraa idolo e te peu taotoraa tia ore. (Korinetia 1, 10:6-10) Ua hema vetahi i mua i teie mau tamataraa. No reira, ua haamanaˈo Paulo eiaha te mau Kerisetiano ia manaˈo eita ratou e hiˈa. (Korinetia 1, 10:12) Ua faahiti râ Paulo i muri iho i te mau parau e vai ra i roto i te Korinetia 1, 10:13 no te horoa i te tahi manaˈo mahanahana, oia hoi e nehenehe te mau tavini taiva ore a te Atua e faaoromai i te mau huru ati atoa.

 A mataitai i teie video poto o te faaite mai i te tahi mau tuhaa o te buka Korinetia 1.