“A tuu i ta oe mau ohipa atoa e rave i roto i te rima o Iehova, e e manuïa ta oe mau opuaraa.”—Maseli 16:3, Huriraa o te ao apî.

 “A faaite atu i ta oe na mau ohipa i te Fatu ra, e e haamanuia hia ta oe ra mau opuaraa.”—Maseli 16:3, Te Bibilia Moˈa V.C.J.S. (1988).

 Te haapapu ra teie irava i te feia e haamori ra i te Atua mau e e manuïa ta ratou mau ohipa, ia tiaturi ratou ia ˈna ma te imi e te pee i ta ˈna aratairaa.

 “A tuu i ta oe mau ohipa atoa e rave i roto i te rima o Iehova.” Hou a rave ai i te mau faaotiraa, ma te haehaa, e imi te mau tavini a Iehova a i ta ˈna aratairaa. (Iakobo 1:5) No te aha? A tahi, i te rahiraa o te taime, aita rea mea ta te taata e nehenehe e rave i nia i te mau tupuraa manaˈo-ore-hia o te oraraa. (Koheleta 9:11; Iakobo 4:13-15) Te piti, e nehenehe ratou e ere i te paari no te rave i ta ratou i opua. No reira, mea rahi te taata te tuu nei i ta ratou mau ohipa i roto i te rima o te Atua. E na reira ratou ma te pure ia ˈna no te ani i ta ˈna aratairaa e ma te haa ia au i to ˈna hinaaro faaitehia i roto i ta ˈna Parau, te Bibilia.—Maseli 3:5, 6; Timoteo 2, 3:16, 17.

 Te parau “a faaite atu i ta oe na mau ohipa i te Fatu b ra,” na roto i te reo tumu, teie ïa, “a tuu i ta oe mau ohipa i te Fatu ra.” Ia au i te hoê buka, te faataa ra teie parau i te “hoê taata o te amo ra i te hoê mea teimaha e o te tuu i te reira i nia i te tahi atu taata puai aˈe e o te nehenehe e amo i te reira.” Ia papu i te feia o te turui i nia i te Atua ma te haehaa e e tauturu iho â o ˈna ia ratou.—Salamo 37:5; 55:22.

 E ere te parau “ta oe mau ohipa atoa” i te auraa e e farii aore ra e haamaitai te Atua i te mau opuaraa atoa ta te taata e rave. No te fanaˈo i ta Iehova haamaitairaa, e titauhia ia tu ta ratou mau opuaraa i ta ˈna mau ture aveia e i to ˈna hinaaro. (Salamo 127:1; Ioane 1, 5:14) Eita te Atua e haamaitai i te faaroo ore. “Te faahape nei [hoi] oia i te mau opuaraa a te feia ino.” (Salamo 146:9) I te tahi aˈe pae, e turu oia i te feia o te auraro ia ˈna ma te faatura i ta ˈna mau ture aveia i roto i te Bibilia.—Salamo 37:23.

 “E e manuïa ta oe mau opuaraa.” I roto i te tahi mau huriraa, e taiohia “e haapapuhia ta oe i opua.” I roto i te mau papai Hebera aore ra ta te rahiraa o te taata e parau ra te Faufaa Tahito, te faataa ra te taˈo hurihia na roto i te reo Tahiti ei “haapapuhia” aore ra “haamau” i te manaˈo o te hoê mea tei haamauhia i nia i te hoê niu papu. E pinepine te reira i te faataa i te aueue-ore-raa o te mau mea ta te Atua i poiete. (Maseli 3:19; Ieremia 10:12) Oia atoa, e haamau papu te Atua i te mau opuaraa a te feia o te rave i te mea tia i to ˈna aro, ma te tauturu atu ia fanaˈo atu â i te hoê oraraa hau, aueue ore e te oaoa.—Salamo 20:4; Maseli 12:3.

 Ua papaihia te reira e te arii Solomona tei papai i te rahiraa o te mau parau o te buka Maseli. Ua tia ia ˈna ia faahiti tausani parau paari mai teie, maoti te paari no ǒ mai i te Atua ra.—Te mau arii 1, 4:29, 32; 10:23, 24.

 I roto i te pene 16, te haamata ra Solomona ma te arue i te paari o te Atua e ma te faaite i to ˈna hae i te feia aau teoteo. (Maseli 16:1-5) E tauturu teie pene i te taata taio, ia taa i te hoê parau mau faufaa roa o ta tatou e ite pinepine ra i roto i te buka a Maseli. Oia hoi, no te riro ei taata î i te paari e o te manuïa mau, e titauhia ia faaite i te haehaa ma te vaiiho i te Atua ia aratai i ta tatou mau faaotiraa. (Maseli 16:3, 6-8, 18-23) E pinepine te Bibilia i te faahiti i tera parau mau faufaa roa.—Salamo 1:1-3; Isaia 26:3; Ieremia 17:7, 8; Ioane 1, 3:22.

 A mataitai i teie video o te faataa poto noa i te buka Maseli.