“A haere mai ia ˈu nei outou atoa e rohirohi e e teimaha nei, na ˈu e tamahanahana ia outou. A rave mai i ta ˈu zugo i nia ia outou e ia haapiihia outou e au, mea mǎrû hoi au e te haehaa o te aau, e ite ïa outou i te tamahanahanaraa. Mea mǎrû hoi ta ˈu zugo, e mea mâmâ ta ˈu hopoia.”—Mataio 11:28-30, Huriraa o te ao apî.

 “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e faaora. A rave mai i tau zugo i nia ia outou, e ia haapiihia outou e au, te mǎrû nei hoi au e te haehaa o te aau: e e noaa hoi te ora i to outou varua. Te mǎrû nei hoi ta ˈu zugo e te mâmâ nei ta ˈu hopoia.”—Mataio 11:28-30, Te Bibilia Moˈa ra.

 Ma te mahanahana, ua titau manihini Iesu i te feia e faaroo ra ia haere mai ia ˈna ra. Ua haapapu atu oia mai te peu e farii ratou i ta ˈna haapiiraa, e fanaˈo ratou i te tamahanahanaraa.

 “A haere mai ia ˈu nei outou atoa e rohirohi e e teimaha nei.” Ua teimaha te feia ta Iesu i titau manihini no te mau ture e peu ta to ratou mau tia haapaoraa i faahepo ia ratou ia rave. (Mataio 23:4; Mareko 7:7) Ua hepohepo e ua rohirohi atoa ratou no te mea ua titauhia ia ratou ia rave i te ohipa teimaha e rave rahi hora no te faatamaa noa i to ratou utuafare.

 “Na ˈu e tamahanahana ia outou.” Ua fafau Iesu i te faaora aore ra i te tamahanahana i te feia o tei farii i ta ˈna titau-manihini-raa mahanahana. Ua na reira oia ma te tauturu ia ratou ia taa i ta te Atua i titau mau. (Mataio 7:24, 25) Na roto i ta ˈna i haapii, ua faatiamâhia ratou i te mau haapiiraa hape e te faatîtîraa a te mau tia haapaoraa. (Ioane 8:31, 32) Noa ˈtu ua titauhia ia ratou ia tutava no te haapii e no te haapao i ta Iesu mau haapiiraa, ua fanaˈo ratou i te tamahanahanaraa a na reira ˈi.

 “A rave mai i ta ˈu zugo i nia ia outou e ia haapiihia outou e au.” I te tau Bibilia, pinepine te feia rave ohipa i te faaohipa i te hoê zugo, te hoê ïa raau o te tuuhia i nia i te tapono no te amo i te tahi ohipa teiaha. Ua riro te zugo ei faahohoˈaraa no te fariiraa i te mana e te aratairaa a te tahi taata. (Levitiko 26:13; Isaia 14:25; Ieremia 28:4) E nehenehe atoa te parau “ia haapiihia outou e au” e hurihia “ia riro outou ei pǐpǐ na ˈu.” Ua faaitoito ïa Iesu i te feia e faaroo ra ia riro ei pǐpǐ na ˈna ma te pee ia ˈna e i to ˈna hiˈoraa.—Ioane 13:13-15; Petero 1, 2:21.

 “E ite ïa outou i te tamahanahanaraa.” Aita Iesu i fafau e ore oioi te mau fifi atoa. Tera râ, ua tauturu o ˈna i te feia o tei faaroo ia fanaˈo i te tamahanahanaraa e te hoê tiaturiraa. (Mataio 6:25-32; 10:29-31) No te feia o tei riro ei pǐpǐ na ˈna e o tei farii i ta ˈna mau haapiiraa, e ere i te mea teimaha ia tavini i te Atua, e oaoaraa râ.—Ioane 1, 5:3.

 “Mea mǎrû hoi ta ˈu zugo, e mea mâmâ ta ˈu hopoia.” E ere Iesu mai te mau tia haapaoraa o to ˈna tau. Mea haehaa hoi o ˈna e te mǎrû. (Ioane 7:47-49) E ere oia i te mea iria e te haavî, mea maitai râ e te ohie ia faafatata ˈtu. Aita Iesu i titau i ta ˈna mau pǐpǐ i te ore e maraa ia ratou. (Mataio 7:12; Mareko 6:34; Luka 9:11) Ua faaite atoa oia eaha te titauhia ia rave ia faaore te Atua i ta ratou mau hara e ia fanaˈo ratou i te hoê manaˈo haava maitai. (Mataio 5:23, 24; 6:14) No to Iesu mau huru maitatai, aita noa te taata i haere mai ia ˈna ra, ua turai-atoa-hia râ ia farii i ta ˈna zugo e ia riro ei pǐpǐ na ˈna.

 Ua faahiti Iesu i te mau parau papaihia i roto i te Mataio 11:28-30 i te taime a poro ai o ˈna i Galilea i te matahiti 31. O te aposetolo Mataio anaˈe tei papai i roto i ta ˈna evanelia no nia i ta Iesu titau-manihini-raa mahanahana mau. I te mea e taata titau tute Mataio e e ati Iuda atoa hoi, ua ite mata roa oia mea nafea te taata i te haavîraahia. Eiaha noa na roto i te tute a to Roma, na roto atoa râ i te haapaoraa ati Iuda piˈo. E ere ïa i te mea maere ua itoito-roa-hia Mataio i te iteraa ua faaohipa Iesu i te mana ta to ˈna Metua ra o Iehova a i horoa mai ia ˈna no te titau manihini i te feia haehaa e tei teimaha ia haere mai ia ˈna ra.—Mataio 11:25-27.

 O te evanelia a Mataio te faahiti maitai ra i te mau huru maitatai faahiahia o Iesu o tei haapapu o ˈna te Mesia fafauhia e te Arii o te Faatereraa arii a te Atua.—Mataio 1:20-23; Isaia 11:1-5.

 A mataitai i teie video poto o te faaite mai i te tahi mau tuhaa o te buka Mataio.