“E puai to ˈu ia faaruru i te mau mea atoa maoti tei horoa mai i te puai.”—Philipi 4:13, Huriraa o te ao apî.

 “E tia ia ˈu te mau mea atoa nei i te Mesia, tei tauturu mai ia ˈu ra.”—Philipi 4:13, Te Bibilia Moˈa ra.

 Ua papai te aposetolo Paulo i tera irava no te haapapu i te feia e haamori ra i te Atua e e fanaˈo ratou i te puai no te rave i to ˈna hinaaro.

 Te na ô ra te tahi mau huriraa Bibilia o tera irava e na te Mesia i horoa i te puai ia Paulo. Tera râ, aita te taˈo “Mesia” i faahitihia i ô nei i roto i te mau papai tumu Heleni. No reira, te faaohipa ra te mau huriraa Bibilia apî aˈe i te parau “tei horoa mai i te puai” (Huriraa o te ao apî) e “iana i tei tauturu mai iaˈu” (Te Bibilia Moˈa V.C.J.S, 1976). No nia ïa ia vai tera mau parau a Paulo?

 Ia au i te mau irava tapiri, no nia i te Atua tera mau parau ta Paulo i faahiti. (Philipi 4:6, 7, 10) Na mua ˈˈe i roto i tera noâ rata, ua papai Paulo i to Philipi: “O te Atua hoi te haapuai ia outou e te tuu i roto ia outou . . . te puai no te rave i te mau mea atoa ta ˈna e au.” (Philipi 2:13) E i roto i te Korinetia 2, 4:7, ua papai o ˈna e na te Atua i horoa ia ˈna i te puai no te rave i ta ˈna taviniraa. (A hiˈo i te Timoteo 2, 1:8.) Mea tano ïa ia parau e no Paulo, o te Atua “tei horoa mai i te puai.”

 Eaha ta Paulo i hinaaro e parau a papai ai e fanaˈo o ˈna i te puai no “te mau mea atoa”? “Te mau mea atoa” ta Paulo i faahiti i ô nei, o te mau tupuraa atoa ïa ta ˈna i faaruru a rave ai i to te Atua hinaaro. Mea rahi anei ta ˈna faufaa aore ra mea iti, ua turui o ˈna i nia i te Atua no te aupuru ia ˈna. Ua haapii ïa Paulo i te mauruuru i te mea e vai nei i roto i te mau huru tupuraa atoa.—Korinetia 2, 11:23-27; Philipi 4:11.

 E nehenehe te mau parau a Paulo e tamahanahana i te mau tavini a te Atua i teie mahana. E horoa ˈtu te Atua i te puai hinaarohia no te faaruru i te mau fifi e no te rave i to ˈna hinaaro. E nehenehe te Atua e haapuai ia ratou na roto i to ˈna varua moˈa aore ra puai ohipa. Oia atoa na roto i ta ˈna mau tavini e ta ˈna Parau, te Bibilia.—Luka 11:13; Ohipa 14:21, 22; Hebera 4:12.

 E itehia tera mau parau i te pae hopea o te rata ta Paulo i papai i te mau Kerisetiano i Philipi. Ua papai o ˈna i teie rata i 60-61 i muri aˈe i te tau o Iesu, i to ˈna tapearaahia i te taime matamua i Roma. No te hoê area taime ite ore, aita te mau Kerisetiano i Philipi i nehenehe e turu i te aposetolo Paulo i te pae o te moni. I muri aˈe râ, ua nehenehe ratou e tauturu ia ˈna ma te hapono atu i te mau ô.—Philipi 4:10, 14.

 Ua haapopou rahi Paulo i te mau Kerisetiano i Philipi no to ratou aau horoa noa. Ua haapapu o ˈna e ua navai roa te mau ô ta ratou i horoa ia ˈna. (Philipi 4:18) Ua faaite atoa Paulo i te hoê parau faufaa ia ratou no nia i te oraraa Kerisetiano: E nehenehe te mau Kerisetiano atoa, te feia taoˈa rahi e te feia veve, e faaite i te mauruuru mau i te mau mea e vai nei. E na reira ratou ma te turui i nia i te tauturu a te Atua.—Philipi 4:12.