“Taeae ma, te mau mea e nehenehe e tiaturi, te mau mea tura, te mau mea tia, te mau mea viivii ore, te mau mea e faatupu i te here, te mau mea e au ia haapopouhia, te mau mea maitatai e te mau mea e au ia aruehia, a tamau noa i te haafaufaa i teie mau mea atoa.”—Philipi 4:8, Huriraa o te ao apî.

 “E teie nei, e au mau taeae, te mau mea haavare ore ra, te mau mea au maitai ra, te mau mea tia ra, te mau mea viivii ore ra, te mau mea popouhia ra, te mau mea roo maitatai ra; te vai na te tahi maitai e te tahi mea haamaitai ra, e haamanaˈo i taua mau mea ra.”—Philipi 4:8, Te Bibilia Moˈa ra.

 No te Atua, mea faufaa te mau manaˈo o te taata, na te reira hoi e turai ia tatou ia rave i te tahi ohipa. (Salamo 19:14; Mareko 7:20-23) No reira, ia hinaaro tatou ia mauruuru mai te Atua, mea titauhia ia haapae i te manaˈo i te mau mea ino i te aro o te Atua, ia manaˈo râ i te mau mea ta ˈna e farii ra.

 Te faahiti ra teie irava e vaˈu tuhaa maitatai te titauhia i te mau Kerisetiano ia “tamau noa i te haafaufaa,” oia hoi ia matau ratou i te feruri i te reira.

•   “Te mau mea e nehenehe e tiaturi.” O te mau mea maitai e te mea mau ïa, mai te pue parau mau e itehia i roto i te Parau a te Atua, te Bibilia.—Timoteo 1, 6:20.

•   “Te mau mea tura.” Te tuati ra teie parau i te mau mea faufaa mau, e ere i te ohipa hauti e te mea faufaa ore. E tauturu te reira i te mau Kerisetiano ia rave iho â i te mea maitai.—Tito 2:6-8.

•   “Te mau mea tia.” O te mau opuaraa e ohipa ïa o te tuati i te manaˈo o te Atua no nia i te mea maitai, eiaha râ i nia i te manaˈo taata.—Maseli 3:5, 6; 14:12.

•   “Te mau mea viivii ore.” O te mau manaˈo e manaˈo turai maitai ïa e te tura, eiaha noa i roto i te taatiraa i te pae tino, i roto i te mau tuhaa atoa râ o to tatou oraraa.—Korinetia 2, 11:3.

•   “Te mau mea e faatupu i te here.” O te mau mea au maitai ïa o te turai ia tatou ia here, eiaha râ ia riri, ia inoino aore ra ia faatupu i te peapea.—Petero 1, 4:8.

•   “Te mau mea e au ia haapopouhia.” O te mau mea ïa o te turai ia vetahi ê ia faatupu i te manaˈo maitai no nia i te tahi taata. Hau atu â, e ô atoa mai te parau o te mau mea atoa ta te feia e faatura ra i te Atua e farii maitai.—Maseli 22:1.

•   “Te mau mea maitatai.” O te mau mea tura mau ïa i te aro o te Atua. Mea maitai roa te reira.—Petero 2, 1:5, 9.

•   “Te mau mea e au ia aruehia.” O te mau mea e tano ia haapopouhia, ia au iho â râ i ta te Atua huru hiˈoraa. Tei roto atoa te mau ohipa a te Atua te tano hoi ia aruehia. Mea maitai ia feruriruri te taata i nia i te reira.—Salamo 78:4.

 Ua tapeahia te aposetolo Paulo i roto i te hoê fare i Roma i te taime a papai ai o ˈna i ta ˈna rata i to Philipi. Noa ˈtu râ, ua parau te mau aivanaa e rata oaoa ta Paulo. E itehia hoi te oaoa e e rave rahi parau mahanahana e te î i te here i roto i ta ˈna rata.—Philipi 1:3, 4, 7, 8, 18; 3:1; 4:1, 4, 10.

 Mea here roa na Paulo i to ˈna mau taeae e tuahine i Philipi e ua hinaaro oia ia fanaˈo ratou i te hoe â oaoa e hau mai ta ˈna i ite. (Philipi 2:17, 18) No reira i te pae hopea o ta ˈna rata, ua faaitoito oia ia ratou ia oaoa, ia faaite i te huru au noa, ia turui tamau i nia i te Atua na roto i te pure e ia tiatonu i to ratou feruriraa i nia i te mau mea o te horoa mai i te hau o roto e te hau e o te Atua.—Philipi 4:4-9.

 A mataitai i teie video poto o te faaite mai i te tahi mau tuhaa o te buka Philipi.