“E faaorahia te taata atoa o te tiaoro i te iˈoa o Iehova.”—Roma 10:13, Huriraa o te ao apî.

 “Te mau taata atoa hoi e tiaoro i te iˈoa o te Fatu, e ora ïa.”—Roma 10:13, Te Faufaa Api.

 Eita te Atua e maitiiti i te taata, te hinaaro ra oia ia faaorahia te taata atoa e ia fanaˈo ratou i te ora mure ore noa ˈtu eaha to ratou fenua, nunaa aore ra tiaraa totiare. Tera râ, no te fanaˈo i te reira mea titauhia ia tiaoro i te iˈoa o Iehova, te iˈoa iho o te Atua Manahope. a—Salamo 83:18.

 Eaha te auraa ia “tiaoro i te iˈoa o Iehova?” Ia au i te Bibilia, e ere te ite-noa-raa i te iˈoa o te Atua e i te faaohiparaa i te reira a haamori ai ia ˈna. (Salamo 116:12-14) Mea titau-atoa-hia ia tiaturi i te Atua e ia imi i ta ˈna tauturu.—Salamo 20:7; 99:6.

 Mea faufaa te iˈoa o te Atua no Iesu Mesia. I roto i te pure ta ˈna i haapii i ta ˈna mau pǐpǐ, ua haamata oia na roto i teie mau parau: “To matou Metua i te raˈi, ia moˈa [aore ra ia haamoˈahia] to oe iˈoa.” (Mataio 6:9) Ua faaite atoa Iesu no te fanaˈo i te ora mure ore, mea titauhia ia ite, ia auraro e ia here i te Atua e amo ra i tera iˈoa.—Ioane 17:3, 6, 26.

 E nafea tatou e ite ai o Iehova “te Fatu” tei faahitihia i roto i te Roma 10:13 i roto i te huriraa Bibilia Te Faufaa Api? No te mea no roto mai tera mau parau i te Ioela 2:32 tei papaihia na roto i te reo Hebera. b I roto i tera irava, te itehia ra te iˈoa o te Atua, eiaha râ to ˈna tiaraa iˈoa “Fatu.”

 I roto i te Roma pene 10, te faaite ra te Bibilia ia hinaaro te hoê taata ia farii te Atua ia ˈna, mea titauhia ia faatupu oia i te faaroo ia Iesu Mesia. (Roma 10:9) Te matara atoa ra tera manaˈo i roto e rave rau irava o te Faufaa Tahito. E faaite te hoê taata i to ˈna faaroo ia parau to ˈna vaha “no te faaite i taua poroi ra” i te feia o te ore e tiaturi ia Iesu Mesia. Eaha taua poroi ra? Oia hoi, te parau apî oaoa o te ora. E nehenehe ïa te taata e faatupu i te faaroo o te aratai i te ora.—Roma 10:10, 14, 15, 17.