“A oaoa no to outou tiaturiraa. A faaoromai tamau i roto i te ati. A tamau maite i te pure.”—Roma 12:12, Huriraa o te ao apî.

 “E oaoa i te tiairaa; e faaoromai i te pohe; tamau uˈana maite â i te pure.”—Roma 12:12, Te Bibilia Moˈa ra.

 I roto i teie irava, te faaitoito ra te aposetolo Paulo i te mau Kerisetiano no Roma ia rave e toru ohipa o te tauturu ia ratou ia vai taiva ore i mua i te hamani-ino-raa e te tahi atu mau fifi.

 “A oaoa no to outou tiaturiraa.” E tiaturiraa faahiahia mau to te mau Kerisetiano, oia hoi te ora mure ore no vetahi i nia i te raˈi e te rahiraa i nia i te fenua nei. (Salamo 37:29; Ioane 3:16; Apokalupo 14:1-4; 21:3, 4) Te tiaturi atoa ra ratou na te Basileia o te Atua, a aore ra te Faatereraa arii a te Atua, e faatitiaifaro i te mau fifi atoa o te huitaata. (Daniela 2:44; Mataio 6:10) E nehenehe te mau tavini a te Atua e oaoa noa ˈtu te mau tupuraa fifi no te mea e tiaturiraa papu to ratou e e faaoaoa to ratou faaoromai tamau i te Atua.—Mataio 5:11, 12; Roma 5:3-5.

 “A faaoromai tamau i roto i te ati.” I roto i te Bibilia, te auraa o te parau Heleni hurihia “faaoromai tamau,” oia hoi ïa “te oreraa e horo, te oreraa e tuu e te mau papu-noa-raa.” I te mea e ere te mau pǐpǐ a Iesu Mesia “no teie nei ao,” b ua ite ratou e hamani-ino-hia ratou e e titauhia ïa te faaoromai tamau. (Ioane 15:18-20; Timoteo 2, 3:12) Ia tamau te hoê Kerisetiano i te tavini i te Atua ma te taiva ore noa ˈtu te mau ati, e puaihia to ˈna faaroo e e papu atu â ia ˈna e haamaitai mai te Atua. (Mataio 24:13) Na tera faaroo puai e tauturu ia ˈna ia faaruru i te mau fifi ma te faaoromai e te oaoa.—Kolosa 1:11.

 “A tamau maite i te pure.” Te faaitoitohia ra te mau Kerisetiano ia tamau i te pure no te tavini i te Atua ma te taiva ore. (Luka 11:9; 18:1) E imi ratou i te aratairaa a te Atua i roto i te mau tuhaa atoa o to ratou oraraa. (Kolosa 4:2; Tesalonia 1, 5:17) Ua papu ia ratou, e faaroo mai te Atua i ta ratou mau aniraa no te mea te haapao nei ratou i ta ˈna mau faaueraa ma te rave atoa i te maraa ia ratou ia mauruuru te Atua. (Ioane 1, 3:22; 5:14) Ua ite atoa ratou mai te peu e tamau maite ratou i te pure, e horoa mai te Atua i te puai hinaarohia no te mau papu i mua i te mau huru ati atoa.—Philipi 4:13.

 Ua papai Paulo i ta ˈna rata no te mau Kerisetiano i Roma i te area matahiti 56. I roto i te pene 12 o teie rata, te horoa ra oia i te mau aratairaa papu: E nafea ia faatupu i te mau huru maitatai. Eaha te huru e titauhia ia faaite i nia i te mau hoa Kerisetiano e te taata atoa. E e nafea ia vai hau i mua i te hamani-ino-raa. (Roma 12:9-21) Ua tae mai teie mau aratairaa no te mau Kerisetiano no Roma i te taime tano, fatata hoi ratou i te faaruru i te hamani-ino-raa uˈana mau.

 I muri aˈe, i te matahiti 64, ua taninahia te oire o Roma. Ua atutu te parau o te faatere ra o Néron te tumu. Ia au i te taata tuatapapa Roma o Tacite, ua pari Néron na te mau Kerisetiano i rave i tera ohipa. Mea na reira te hamani-ino-raa i te rahiraa mai. Ua tauturu ta Paulo aˈoraa ia ratou ia faaoromai tamau i te hamani-ino-raa ma te tapea i te taiva ore e te hoê haerea tura. (Tesalonia 1, 5:15; Petero 1, 3:9) Ua riro ratou ei hiˈoraa maitai no te mau tavini a te Atua i teie mahana.

 A mataitai i teie video poto o te faaite mai i te tahi mau tuhaa o te buka Roma.