“Eiaha atoa outou ia faaau faahou i to outou haerea i to teie nei ao, ia taui râ outou a faaapî ai i to outou feruriraa, ia papu ia outou iho te maitai e te au e te tia roa o te hinaaro o te Atua.”—Roma 12:2, Huriraa o te ao apî.

 “Eiaha e faaau atu i teie nei ao; ei huru ê râ to outou i te faahouraa i to outou aau, ia ite outou i taua hinaaro tia o te Atua ra, e te au, e te maitai hoi.”—Roma 12:2, Te Bibilia Moˈa ra.

 Eita te taata o te hinaaro e faaoaoa i te Atua e patoi noa i te mau manaˈo ino, e taui atoa râ o ˈna i to ˈna huru. E ere na te Atua e faahepo ra ia ˈna ia na reira. E taui râ teie taata no to ˈna here i te Atua e no te mea ua ite o ˈna mea maitai e te au noa ta te Atua mau aratairaa e e maitaihia o ˈna.—Isaia 48:17.

 “Eiaha . . . outou ia faaau faahou i to outou haerea i to teie nei ao.” “Teie nei ao,” o te faanahoraa a te taata ïa, to ratou manaˈo no nia i te mea maitai e te mea ino, ta ratou mau peu, to ratou huru e to ratou haerea o te ore roa e tuati i te manaˈo o te Atua. (Ioane 1, 2:15-17) E ohipa puai te reira i nia i te taata a faaau roa ˈtu ai ratou i to ratou haerea e huru i to teie nei ao. Ia farii te Atua i ta tatou haamoriraa, e titauhia ia patoi i teie nei ao. Ia ore, e faatupu tatou i te mau huru ino ta te Atua e ore e au.—Ephesia 2:1-3; 4:17-19.

 “Ia taui . . . outou a faaapî ai i to outou feruriraa.” Mea titau-atoa-hia ia rave i te mau tauiraa i nia i to tatou mau manaˈo hohonu e to tatou huru o roto. Na roto i te parau Heleni hurihia “ia taui,” e tauiraa rahi teie e faahitihia ra mai te tauiraa o te hoê hê ei pěpě. Mea titauhia i te feia o te haamori i te Atua ia “ahu mai i te huru taata apî.”—Ephesia 4:23, 24; Kolosa 3:9, 10.

 “Ia papu ia outou iho te maitai e te au e te tia roa o te hinaaro o te Atua.” Te titau ra te Atua i te feia e haamori ia ˈna ia papu ia ratou eaha ta ratou e tiaturi ra. E titauhia ia haapii e ia faaohipa ratou i ta te Bibilia e parau ra e ia ite ratou i te maitai o te mau faaueraa e aratairaa no ǒ mai i te Atua. Ma te na reira, e papu ia ratou iho o ta te Atua aratairaa te mea maitai roa ˈˈe.—Salamo 34:8.

 Te faataa ra te Roma pene 12 i te titauhia ia rave ia farii te Atua i ta tatou haamoriraa. E ô mai te parau o to tatou oraraa taatoa e e nafea tatou e faaohipa ˈi i to tatou “feruriraa atoa.” (Roma 12:1, 3) Te horoa mai ra te pene 12 i te mau aˈoraa papu. Ei hiˈoraa, e nafea ia faaite i te mau huru maitatai o te Atua, e nafea ia faatupu i te hau e o vetahi ê e eaha to tatou huru e tia ˈi ia haamauiuihia tatou.—Roma 12:9-21.