“Aita hoi te puai ohipa o te Atua i horoa mai i te hoê aau taiâ, i te hoê râ aau itoito e te here e te manaˈo paari.”—Timoteo 2, 1:7, Huriraa o te ao apî.

 “E ere hoi i te aau tauâ ta te Atua i horoa mai no tatou, i te aau itoito râ, e te aroha, e te haapao maitai.”—Timoteo 2, 1:7, Te Bibilia Moˈa ra.

 E nehenehe te Atua e tauturu i te hoê taata ia noaa mai te itoito no te rave i te mea maitai. Aita te Atua e hinaaro ia faaite te tahi noa ˈˈe i “te hoê aau taiâ.” E tapea hoi te taiâ i te taata ia rave i te mau ohipa o te faaoaoa ra i te Atua.

 A hiˈopoa na i na huru maitatai e toru no ǒ mai i te Atua, faahitihia i roto i tera irava. E tauturu te reira ia ore e mǎtaˈu aore ra e taiâ.

 “Aau itoito.” Ua tavini te mau Kerisetiano i te Atua ma te itoito noa ˈtu ua faaruru ratou i te mau enemi e te tupuraa atâta mau. Aita ratou i otohe no te mǎtaˈu. (Korinetia 2, 11:23-27) E nafea te reira i tupu ai? Ua haapapu te aposetolo Paulo: “E puai to ˈu ia faaruru i te mau mea atoa maoti tei horoa mai i te puai.” (Philipi 4:13) E nehenehe te Atua e horoa i ta ˈna mau tavini “i te puai o te hau ê i to te taata nei” no te faaruru i te mau fifi atoa.—Korinetia 2, 4:7.

 “Here.” E tauturu te here rahi i te Atua i te hoê Kerisetiano ia paturu i te mea maitai ma te itoito. Hau atu, e tauturu te here i te taata tupu i te hoê Kerisetiano ia haafaufaa aˈe i te hinaaro o vetahi ê i to ˈna iho, noa ˈtu te faaruru ra o ˈna i te patoiraa aore ra te tupuraa atâta.—Ioane 13:34; 15:13.

 “Manaˈo paari.” I roto i te Bibilia, e faahitihia te parau o te manaˈo paari no te hoê Kerisetiano e rave ra i te mau faaotiraa ma te feruriraa paari e ma te faaohipa i te Bibilia. E nehenehe te taata manaˈo paari e feruri ma te papu e ma te au mau, i te taime atoa e faaruru ra o ˈna i te mau fifi. E rave o ˈna i te mau faaotiraa o te faaite i to te Atua huru feruriraa, ma te haamanaˈo e mea faufaa aˈe to ˈna auhoaraa e te Atua i te manaˈo o vetahi ê.

 Na te aposetolo Paulo i papai i te buka Bibilia o te Timoteo piti. Ua papai o ˈna i tera buka mai te hoê rata i to ˈna hoa here e hoa ohipa o Timoteo. I roto i ta ˈna rata, ua faaitoito Paulo i te taata apî ra o Timoteo ia tamau i te haa rahi i roto i te taviniraa. (Timoteo 2, 1:1, 2) Peneiaˈe mea mamahu o Timoteo e e nehenehe tera huru e tapea ia ˈna ia amo i ta ˈna mau hopoia i roto i te amuiraa Kerisetiano. (Timoteo 1, 4:12) Ua haamanaˈo râ Paulo ia Timoteo e ua fanaˈo o ˈna i te hoê ô, oia hoi te hoê toroa taviniraa taa ê i roto i te amuiraa. Ua faaitoito o ˈna ia Timoteo ia ore e taiâ a amo ai oia i ta ˈna hopoia ei tiaau i roto i te amuiraa, a poro ai i te parau apî oaoa e a faaruru ai i te patoiraa no to ˈna faaroo.—Timoteo 2, 1:6-8.

 Ua papaihia tera mau parau na Timoteo. E nehenehe atoa râ te reira e tauturu i te feia atoa e hinaaro ra e tavini i te Atua i teie mahana. E haapapu hoi te reira e e horoa te Atua ia ratou i te tauturu hinaarohia no te tavini ia ˈna, noa ˈtu te mau fifi.