Mea moˈa te afata o te faufaa tei hamanihia e te mau Iseraela i tahito ra ia au i te aratairaa a te Atua e i ta ˈna faanahoraa. I roto i taua afata ra, ua tuuhia te “Haamanaˈoraa,” oia hoi na Ture Ahuru papaihia i nia e piti pǎpǎ ofai.​—Exodo 25:8-10, 16; 31:18.

•   To ˈna hamaniraa. Ua hamanihia te Afata e piti kubiti e te afa te roa, hoê kubiti e te afa te aano e hoê kubiti e te afa te teitei (111 x 67 x 67 cm). Ua hamanihia te Afata e te raau sitima, ua tuuhia te auro na roto e na rapaeau e ua haaatihia i te tahi faaunauna taraihia. E piti kerubi auro i nia i te tapoˈi hamanihia e te auro tamâhia, hoê kerubi i te hiti tataitahi. E fariu te tahi i te tahi, e hiˈo to raua mata i te tapoˈi a hohora ˈtu ai i to raua pererau i nia, ei marumaru i nia ˈˈe i te tapoˈi. Ua faatôhia e maha potaa auro e ua tuuhia i nia i na avae e maha o te Afata. I roto i na potaa, ua patiahia te mau raau sitima tapirihia e te auro. Ua faaohipahia te reira no te amo i te Afata.​—Exodo 25:10-21; 37:6-9.

•   To ˈna vahi vairaa. Na mua roa, ua tuuhia te Afata i roto i te Vahi Moˈa Roa i roto i te sekene, hoê tiahapa haamoriraa afaifai tei hamanihia i te hoê â taime e te Afata. Ua tuuhia te hoê paruai no te paruru i te Vahi Moˈa Roa, ia ore te mau tahuˈa e te nunaa e ite i te reira. (Exodo 40:3, 21) O te tahuˈa rahi anaˈe tei nehenehe e tomo i roto i te Vahi Moˈa Roa e tei ite i te Afata, hoê taime i te matahiti i te mahana faahauraa. (Levitiko 16:2; Hebera 9:7) I muri aˈe, ua afaihia te Afata i te Vahi Moˈa Roa i roto i te hiero o Solomona.​—Te mau arii 1, 6:14, 19.

•   To ˈna faaohiparaa. I roto i te Afata, ua tuuhia te mau taoˈa moˈa no te haamanaˈo i te mau Iseraela i te faufaa ta te Atua i faaau e o ratou i te mouˈa Sinai. Mea faufaa atoa te Afata no te oroa o te mahana faahauraa.​—Levitiko 16:3, 13-17.

•   Eaha to roto i te Afata? Te mau taoˈa matamua tei tuuhia i roto i te Afata, o na pǎpǎ ofai e piti ïa i reira i papaihia ˈi na Ture Ahuru. (Exodo 40:20) I muri aˈe, ua tuu-atoa-hia te hoê farii auro e mâna to roto e “te raau a Aarona tei puahia.” (Hebera 9:4; Exodo 16:33, 34; Numera 17:10) I te hoê taime râ, ua tatarahia te farii e te raau i te Afata no te mea aita te reira i ite-faahou-hia i to te Afata afairaahia i te hiero.​—Te mau arii 1, 8:9.

•   To ˈna amoraa. Ua titauhia ia amo te ati Levi i te Afata i nia i to ratou tapono ma te faaohipa i te raau amoraa sitima. (Numera 7:9; Paraleipomeno 1, 15:15) Ua vai na raau amoraa i roto i na potaa o te Afata i te mau taime atoa. Aita roa ˈtu ïa te ati Levi e tapea i te Afata. (Exodo 25:12-16) I to ˈna amoraahia, e faaohipahia te “paruru” tei faataa i te Vahi Moˈa i te Vahi Moˈa Roa no te tapoˈi i te Afata.​—Numera 4:5, 6. a

•   Eaha ta te Afata i faahohoˈa? E haapapuraa te Afata e to reira te Atua. Ei hiˈoraa, ia fa mai te hoê ata i nia i te Afata i te Vahi Moˈa Roa e i te mau puhapa a te mau Iseraela, ua papu i te nunaa e to reira Iehova e ua haamaitai o ˈna ia ratou. (Levitiko 16:2; Numera 10:33-36) Te faaite atoa ra te Bibilia e ua ‘parahi Iehova i nia i te terono i nia ˈˈe i te mau kerubi,’ na piti kerubi tei tuuhia i nia i te tapoˈi o te Afata. (Samuela 1, 4:4; Salamo 80:1) Ua riro ïa na kerubi ei “hohoˈa o te pereoo” o Iehova. (Paraleipomeno 1, 28:18) No ta te Afata i faahohoˈa, ua papai te arii Davida e “te parahi ra [Iehova] i Ziona” no te mea ua afaihia te Afata i taua vahi ra.​—Salamo 9:11.

•   Te mau faahitiraa Bibilia no nia i te Afata. Te faaohipa ra te Bibilia i e rave rau taˈo no te faahiti i tera afata moˈa, mai “te afata o te Haamanaˈoraa,” “te afata o te faufaa,” “te Afata a Iehova” e “te Afata o to [Iehova] puai.”​—Numera 7:89; Iosua 3:6, 13; Paraleipomeno 2, 6:41.

   Ua parauhia no te tapoˈi o te Afata e e “vahi i reira te Atua e faaore ai i te hara.” (Paraleipomeno 1, 28:11) Te faaite ra tera parau i te faaohiparaa taa ê o te tapoˈi i te mahana o te faahauraa, i te taime e pîpî ai te tahuˈa rahi o Iseraela i te toto o te mau animara faatusiahia i te tapoˈi e i mua i te tapoˈi. A na reira ˈi, te haa ra te tahuˈa rahi “no ˈna iho e no to ˈna opu fetii e no te amuiraa taatoa o Iseraela” ia faaorehia te hara.​—Levitiko 16:14-17.

Te vai noa ra anei te afata o te faufaa i teie mahana?

 Aita e haapapuraa e te vai noa ra te afata o te faufaa. Te faaite ra te Bibilia e aita e titau-faahou-hia ia faaohipa i te Afata no te mea ua haamauhia “te tahi faufaa apî” niuhia i nia i te tusia o Iesu. (Ieremia 31:31-33; Hebera 8:13; 12:24) Ua tohu râ te Bibilia i te hoê taime e eita faahou te afata o te faufaa e eita te nunaa o te Atua e mihi i te reira.​—Ieremia 3:16.

 I roto i te hoê orama ta te aposetolo Ioane i ite i muri aˈe i te haamauraahia i te faufaa apî, ua fa mai te afata o te faufaa i te raˈi. (Apokalupo 11:15, 19) Te faahohoˈa ra tera Afata i te vairaa mai o te Atua e ta ˈna haamaitairaa i te faufaa apî.

E puai manamana anei to te Afata?

 Aita roa ˈtu. E ere te auraa tei te hoê nunaa ra te afata o te faufaa, e manuïa pauroa ta ˈna mau ohipa. Ei hiˈoraa, tei te puhapa o to Iseraela ra te Afata i te taime i aro ai ratou i te oire o Ai. Ua pau râ ratou no te ohipa taiva a te hoê Iseraela. (Iosua 7:1-6) I muri aˈe, ua pau ratou i mua i to Philiseti noa ˈtu ua rave ratou i te afata o te faufaa i te vahi aroraa. No te aha? No te mau ohipa ino a na tahuˈa Iseraela, o Hophini e Phinehasa. (Samuela 1, 2:12; 4:1-11) Ua haru to Philiseti i te Afata i taua aroraa ra. Ua tairi râ te Atua ia ratou i e rave rahi ati, tae roa ˈtu i te taime i faahoˈi ai ratou i te Afata i to Iseraela.​—Samuela 1, 5:11–6:5.