Eaha ta te Bibilia e parau ra no nia i te taninaraa i te taata pohe?

FAAROO NA ROTO TE REO

Te pahonoraa a te Bibilia

Aita te Bibilia e faataa rahi roa no nia i te taninaraa i te taata pohe. Aita e faaueraa Bibilia taa maitai no nia i te hunaraa aore te taninaraa i te taata pohe.

Te faahitihia ra i roto i te Bibilia eaha ta te mau tavini haapao maitai a te Atua i rave no to ratou feia pohe. Ei hiˈoraa, mea rahi ta Aberahama i rave no te faanaho i te hoê vahi hunaraa no ta ˈna vahine, o Sara.—Genese 23:2-20; 49:29-32.

Ua faahiti atoa te Bibilia i te tahi mau tavini haapao maitai tei tanina i te tino o te feia pohe. Ei hiˈoraa, i to te arii Saula no Iseraela e ta ˈna na toru tamaiti poheraa i te tamaˈi, tei te tuhaa fenua enemi to ratou tino e aita i haapaohia. I to te mau taata tamaˈi Iseraela faarooraa i te reira, reva ˈtura ratou no te tii mai i na tino e maha, tutuihia ˈtura i te auahi e huna ihora ratou i te mau ivi. (Samuela 1, 31:8-13) Te faaite ra te Bibilia e ua fariihia teie huru raveraa.—Samuela 2, 2:4-6.

Te mau manaˈo hape no nia i te taninaraa i te taata pohe

Manaˈo hape: Ia taninahia te taata pohe, mai te huru ra ïa te faatura-ore-hia ra o ˈna.

Tupuraa mau: Te parau ra te Bibilia e e hoˈi te feia pohe i te repo. Tera iho â te tupu ia pohe te hoê taata, e pê te tino a huˈahuˈa roa ˈtu ai te reira mai te repo ra te huru. (Genese 3:19) Ia taninahia te taata pohe, mea vitiviti aˈe te tino i te huˈahuˈa mai te rehu aore ra te repo ra te huru.

Manaˈo hape: I tahito ra, o te feia ino anaˈe tei taninahia i muri aˈe i te pohe.

Tupuraa mau: Ua taninahia te tino pohe o te feia taiva mai ia Akana e to ˈna utuafare. (Iosua 7:25) Mea taa ê râ no tera tupuraa. (Deuteronomi 21:22, 23) Mai tei faahitihia na mua ˈtu, ua tanina-atoa-hia te tino pohe o te tahi mau tavini haapao maitai a te Atua, mai ia Ionatana, te tamaiti a te arii Saula.

Manaˈo hape: Ia taninahia te hoê taata pohe, eita teie taata e faatia-faahou-hia mai.

Tupuraa mau: E ere i te mea fifi no te Atua ia faatia mai i te hoê taata, noa ˈtu ua hunahia, ua taninahia to ˈna tino, ua moˈe o ˈna i roto i te miti aore ra ua amuhia oia e te animara taehae. (Apokalupo 20:13) Mea ohie roa hoi no te Atua Manahope ia hamani faahou i te hoê tino apî no te taata tei pohe.—Korinetia 1, 15:35, 38.

E tanina anei aore ra e huna?

Hou a faaoti ai eaha te rave, e hiˈo anaˈe i to muri nei mau manaˈo.

Te titauraa a te taata hou a pohe ai. Te faaite ra te Bibilia i te hiˈoraa o te tahi mau utuafare tei haapao i te aratairaa ta te taata pohe i horoa ˈtu hou a pohe ai oia.—Genese 50:4, 5; Exodo 13:19.
Peu matauhia i to outou fenua. E ohipa te reira i nia i te huru e ravehia ˈi te hoê tino pohe. (Ioane 19:40) Ei hiˈoraa, i tahito ra, e peu matauhia ia hunahia te taata pohe. (Genese 49:31; Samuela 1, 28:3) Hoê â huru i teie mahana, e maiti paha te hoê taata i te pee i te peu matauhia i to ˈna fenua, mai te peu eita te reira e ofati i te hoê faaueraa Bibilia.
Titauraa a te hau fenua. Te faaitoito mai ra te Bibilia ia auraro i te feia mana. (Roma 13:1) I te tahi mau fenua, e haamau te feia mana i te ture no nia i te huru raveraa ia pohe te hoê taata. Ei hiˈoraa, no te taninaraa i te taata pohe, ua faanaho te tahi feia mana i te hoê vahi e tuuhia ˈi te vairaa rehu o te feia pohe.
Te manaˈo o vetahi ê. Te faaitoito mai ra te Bibilia ia imi i to vetahi ê maitai. (Philipi 2:4) Hou a faaoti ai eaha te rave i te tino o te taata pohe, e feruri anaˈe i nau uiraa: Eaha te manaˈo o te fetii no nia i te taninaraa aore ra hunaraa i te taata pohe? Eaha te manaˈo o te huiraatira no nia i tera huru raveraa?