E ere te Pakate i te hoê oroa niuhia i nia i te Bibilia. Ia tuatapapa tatou nohea mai teie oroa, e ite ïa tatou e ua niuhia te reira i nia i te mau oroa no te fanauraa i tahito ra. E hiˈopoa anaˈe te tahi mau tuhaa.

1.   Te iˈoa: Ua faatuati te mau haapaoraa te Pakate i te oroa Pasa ati Iuda. Te parau ra te hoê buka: “No roto mai i te mau nunaa ěê te Pakate parauhia Easter na roto i te reo Beretane, no te mea o Eastre te iˈoa o te ruahine o te tau uaaraa tiare.” (Le livre des superstitions. Mythes, croyances et légendes) I Phenikia o Astarté te iˈoa o te ruahine o te fanauraa e no to Babulonia o Ishtar ïa.

2.   Te rapiti: “No te mau nunaa ěê i tahito ra, [e taipe te rapiti no te fanauraa]. E ua faaohipahia te reira i roto i te mau oroa faatupuhia i te tau uaaraa tiare i Europa.”—Encyclopædia Britannica.

3.   Te huero moa: Ua faanehenehe te tahi mau nunaa i te huero moa no te Pakate. Ua tiaturi ratou maoti te reira “e nehenehe e noaa mai te oaoa, te ruperupe, te ea maitai e te paruru.” (Traditional Festivals) Ia au i te hoê titionare, i te Pakate ua hunahia te mau huero moa ta te mau rapiti i afai mai e na te mau tamarii e maimi haere i te reira. Tera râ, e ere noa teie peu i te hoê faaanaanataeraa e peu tahito teie no roto mai i te mau oroa no te fanauraa.—Funk & Wagnalls Standard Dictionary of Folklore, Mythology and Legend.

4.   Te ahu apî: “Ua manaˈohia e mea tano ia oomo i te ahu apî no te faahanahana i te ruahine Eastre, aita anaˈe e atihia te taata.”—The Giant Book of Superstitions.

5.   Te oroa hitiraa mahana: No roto mai te reira i te mau peu ravehia e te feia tei haamori i te mahana. “Ua na reira ratou no te farii popou i te mahana e mana rahi hoi to te reira no te faatupu faahou i te mau mea atoa.”—Celebrations—The Complete Book of American Holidays.

 Ia au i te tahi buka, i te mau matahiti 300 te mea papu ïa ua faaô te mau tia faaroo i roto i ta ratou haamoriraa te mau peu tahito a te mau nunaa ěê.—The American Book of Days.

 Te faaara ra te Bibilia aita te Atua e au ia anoihia te mau oroa e te peu a te taata i roto i ta ˈna haamoriraa. (Mareko 7:6-8) Te na ô ra te Korinetia 2, 6:17: “A faataa ê mai ia outou te na reira mai ra Iehova, atira i te tapea i te mea viivii.” Ia farii te Atua i ta tatou haamoriraa, e tia ia tatou ia haapae i te oroa Pakate, no roto mai hoi te reira i te mau peu a te mau nunaa ěê.