Ta te Bibilia e parau mai ra no nia i te mau animara rarahi parauhia dinosaures
Te pahonoraa a te Bibilia
Aita te Bibilia e faahiti roa ˈtu i te mau dinosaures. Tera râ, ua parau te Bibilia e na te Atua “i poiete i te mau mea atoa.” Te faaite ra te reira e ua poiete atoa te Atua i te mau dinosaures. a (Apokalupo 4:11) Te faahiti ra te Bibilia i te mau pǔpǔ animara, e e nehenehe e faaô i te mau dinosaures i roto i tera mau pǔpǔ:
“Te mau mea rarahi o te tai.”—Genese 1:21.
“Te mau mea o te repo e nee nei.”—Genese 1:25.
“Te mau manu avae maha o te fenua.”—Genese 1:25.
Ua tauiui anei te huru o te tahi atu mau animara a riro mai ai ei dinosaures?
Aita roa ˈtu. Maoti te mau ivi dinosaures, ua itehia e ua fa taue mai tera mau animara rarahi. E tuati te reira i ta te Bibilia e parau mai ra, oia hoi, ua poiete te Atua i te mau animara atoa. Ei hiˈoraa, ia au i te Salamo 146:6, na te Atua “i hamani i te mau raˈi e te fenua, te tai e te mau mea atoa i roto.”
Afea te mau dinosaures i ora ˈi?
Te faaite mai ra te Bibilia e ua poietehia te mau animara o te moana, e te mau animara i nia i te fenua, i te mahana pae e te mahana ono o te poieteraa. b (Genese 1:20-25, 31) E tapao ïa te reira e ua fa mai e ua ora mai te mau dinosaures i te hoê area taime maoro.
E dinosaures anei te Behemota e te Leviatana?
Aita. Noa ˈtu eita te buka Ioba e faahiti roa ˈtu eaha mau na teie mau animara, ua parau-pinepine-hia e puaa pape te Behemota, e e moo taehae te Leviatana. E tuati te reira i ta te Bibilia e parau mai ra no nia i teie mau animara. (Ioba 40:15-23; 41:1, 14-17, 31) E ere te Behemota e te Leviatana e dinosaures, inaha ua parau te Atua ia Ioba ia haere e hiˈo i taua mau animara ra. Ua ora hoi Ioba i te hoê tau maoro i muri aˈe i te faarueraa o te mau dinosaures.—Ioba 40:16; 41:8.
Eaha te ohipa i tupu no te mau dinosaures?
Aita te Bibilia e faahiti i te faarueraa o te mau dinosaures. Tera râ, te parau ra te Bibilia, ua poietehia te mau mea atoa “no to te Atua hinaaro.” E auraa ïa e ua poiete te Atua i te mau dinosaures no te hoê opuaraa taa maitai. (Apokalupo 4:11) Ia tae tera opuaraa i to ˈna hopea, ua vaiiho te Atua ia mou te mau dinosaures.
a Te haapapu ra te mau ivi dinosaures e ua ora iho â te mau dinosaures i nia i te fenua. Te faaite mai ra te reira, e no te hoê area taime, mea rahi te mau dinosaures i nia i te fenua. Ua rau te huru o tera mau animara, e te vai atoa ra te mea rarahi e te mea nainai.
b I roto i te Bibilia, e nehenehe te taˈo “mahana” e faahiti i te mau area taime o te nehenehe e haere tae roa ˈtu tau tausani matahiti i te maoro.—Genese 1:31; 2:1-4; Hebera 4:4, 11.
E au atoa outou . . .
HAAPIIRAA TUMU
Mea poietehia anei te ao nui?
Mea rahi te ore e taa maitai i te aamu Bibilia o te poieteraa aore ra te manaˈo ra e aai noa tera. Nehenehe anei e tiaturi i ta te Bibilia e parau ra?
HAAPIIRAA TUMU
No te aha te Atua i poiete ai i te fenua?
Nehenehe mau te fenua, tano maitai to ˈna atearaa i te mahana, tano maitai atoa to ˈna ohuraa. No te aha te Atua i na reira ˈi i to ˈna poieteraa i te fenua?
NO NIA IA MATOU
A ani i te hoê farereiraa
Aparauraa no nia i te Bibilia aore ra no te ite atu â no nia i te mau Ite no Iehova.