Te haapii ra te Bibilia e i rotopu i te mau taata atoa i nia i te fenua nei, ua taotiahia te numera o te feia te haere i te raˈi. (Apokalupo 14:1, 3) E haere ratou i te raˈi no te faatere ei arii e ei tahuˈa e o Iesu. (Luka 22:28-30; Apokalupo 5:9, 10) No te rahiraa râ o te taata, e faatiahia ratou i nia i te fenua nei faarirohia ei paradaiso.—Salamo 37:11, 29.

 I roto i te Bibilia, aita i faahitihia te parau o te hoê raˈi no te mau animara mai te urî. No te aha? No te mea aita te mau animara e nehenehe e faaî i te mau titauraa ia “titau-manihini-atoa-hia [ratou] no te raˈi.” (Hebera 3:1) E titauhia hoi ia ite o vai te Atua mau, ia faatupu i te faaroo e ia pee i te mau faaueraa a te Atua. (Mataio 19:17; Ioane 3:16; 17:3) O te mau taata anaˈe tei poietehia no te ora e a muri noa ˈtu.—Genese 2:16, 17; 3:22, 23.

 No te haere i te raˈi, e titauhia ia faatia i tei pohe. (Korinetia 1, 15:42) Te faahiti ra te Bibilia e rave rahi aamu no nia i te tia-faahou-raa. (Te mau arii 1, 17:17-24; Te mau arii 2, 4:32-37; 13:20, 21; Luka 7:11-15; 8:41, 42, 49-56; Ioane 11:38-44; Ohipa 9:36-42; 20:7-12) Tera râ, o te mau taata anaˈe tei faatiahia, eiaha râ te mau animara.

•  Eaha te tupu ia pohe te mau animara?

•  E rave anei te mau animara i te hara?

•  E fariihia anei ia hamani-ino-hia te mau animara?

 Te haapii ra te Bibilia e mea “ora” te taata e te animara, hoê â ïa raua i roto i tera tuhaa. No te poiete ia raua, ua faaohipahia “te repo fenua” e “te aho ora.”—Genese 1:24; 2:7, 19.

 Te parau atoa ra te Bibilia e e pohe te taata e te animara. (Exodo 19:13; Ezekiela 18:20) I to ratou pohe, e hoˈi te mau animara e taata i te repo fenua. (Koheleta 3:19, 20) Te auraa ïa e e faaea ratou i te ora. a

 Aita. Te hara, o te ofatiraa ïa i te mau ture a te Atua i te pae o te feruriraa, huru aau aore ra ohipa. Te auraa ïa e e ravehia te tahi mau faaotiraa ferurihia. Aita râ te mau animara e nehenehe e na reira. E haa ratou ia au i to ratou huru animara i te roaraa o to ratou oraraa taotiahia. (Petero 2, 2:12) I te pae hopea, e pohe ratou noa ˈtu aita ratou i rave aˈe i te hara.

 Aita. Ua horoa te Atua i te taata te mana i nia i te mau animara, eiaha râ te tiaraa ia hamani ino ia ratou. (Genese 1:28; Salamo 8:6-8) Mea faufaa no te Atua te maitai o te animara tataitahi, oia atoa o te mau manu rii. (Iona 4:11; Mataio 10:29) Ua faaue o ˈna i ta ˈna mau tavini ia haapao maitai i ta ratou mau animara.—Exodo 23:12; Deuteronomi 25:4; Maseli 12:10.