Aita te Bibilia e faahiti ra no nia i te Halloween. E oroa teie ta e rave rahi taata e faatupu nei i te 31 no Atopa i te mau matahiti atoa. Tera râ, eita te tumu e te mau peu o tera oroa e tuati ra i ta te Bibilia e haapii ra.

I roto i teie tumu parau

•  Te tumu e te mau peu o te oroa Halloween

•  Mea faufaa anei ia ite nohea mai te oroa Halloween?

•  Nohea mai tera taˈo Halloween?

•   Samain: Ia au i te buka îite The World Book Encyclopedia, no ǒ mai te oroa Halloween i te oroa tahito etene faatupuhia e te mau Celtes a 2 000 tiahapa matahiti i teie nei. Ua tiaturi ratou e ua hahaere te feia pohe na rotopu i te feia ora i te oroa Samain. Ua nehenehe ïa te feia ora e farerei i te feia pohe.—A hiˈo i te tumu parau “ Nohea mai tera taˈo Halloween?”

•   Te mau ahu no Halloween, te mau momona e te hautiraa aore ra totoaraa: Ia au i te hoê papai, ua oomo te tahi mau taata Celtes i te mau ahu hairiiri ia manaˈo te mau varua e ua riro atoa mai tera mau taata ei varua a ore atu ai e haafifi ia ratou. Ua pûpû te tahi atu mau Celtes i te mau momona i te mau varua no te tamǎrû ia ratou. a

   I Europa, mai te matahiti 500 tae atu i te 1500, ua haamata te mau tia faaroo Katolika i te pee i te mau peu a te mau etene. Ua farii teie mau tia faaroo ia haere te mau mero o ta ratou haapaoraa na te mau fare ma te oomo i te mau ahu taa ê no te ani atu i te mau ô iti.

•  Aiharu, taata e riro ei luko, tahutahu, tupapau: No te rahiraa o te taata, e varua ino teie mau mea. Ia au i te hoê buka (Halloween Trivia), e mau mea riaria manamana ratou e te vai ra hoê tuatiraa i rotopu ia ratou e te pohe, e te feia pohe aore ra te mǎtaˈu i te pohe.

•  Mautini: I Beretane, mai te matahiti 500 tae atu i te 1500, ei faahoˈiraa no te mau pure ta ratou i faaoti no te feia pohe, i haere na te taata na te mau fare e ani i te maa. Ua matau ratou i te faaohipa i te mau nave. E tâpû ratou i te niaraa, a tuu atu ai i te tahi mori hinu i roto. Ua faahohoˈa te mori hinu i te tahi varua tei tapeahia i roto i te vahi haamauiuiraa. Ia au i te tahi mau aivanaa, ua faaohipahia te mau mori hinu no te faariaria i te mau varua ino. I te mau matahiti 1800, i Marite no apatoerau, ua mono te taata i te mau nave i te mau mautini, no te mea mea rahi aˈe te mautini e mea ohie aˈe ia pao e ia tarai atu.

 Oia mau. Noa ˈtu no te tahi mau taata e ere te oroa Halloween i te mea ino, eita te mau peu faatupuhia i tera oroa e tuati ra i ta te Bibilia e haapii ra. Ua niuhia teie oroa Halloween i nia i te mau haapiiraa hape no nia i te feia pohe e te mau varua parau-atoa-hia demoni.

 A tapao na i to muri nei mau irava Bibilia o te faaite ra eaha to te Atua manaˈo no nia i te mau haapiiraa niuhia i nia i te oroa Halloween:

•   “Eiaha ia itehia i ǒ oe te taata o te . . . haere e hiˈo i te hoê taata e demoni hiˈohiˈo to ˈna, te hoê taata hiˈohiˈo, aore ra te taata o te uiui i te feia pohe.”—Deuteronomi 18:10-12.

   Te auraa: Aita roa ˈtu te Atua e farii i te mau tutavaraa ia paraparau i te feia pohe aore ra ia haa mai te huru ra e te paraparau ra te tahi taata i te feia pohe.

•   “Aita râ te feia pohe i ite i te tahi mea.”—Koheleta 9:5.

   Te auraa: I te mea e aita te feia pohe e ite i te tahi noa ˈˈe mea, aita ïa ratou e nehenehe e paraparau atu i te feia ora.

•   “[Eiaha] outou [e apiti] i te mau demoni. Eita outou e nehenehe e inu i te auˈa a Iehova e i te auˈa a te mau demoni.”—Korinetia 1, 10:20, 21.

   Te auraa: Ia hinaaro te hoê taata e fanaˈo i to te Atua farii maitai, e titauhia ia ˈna ia patoi roa ˈtu i te mau demoni.

•   “Ia mau papu [outou] i mua i te mau ravea paari a te Diabolo. E ere hoi te taata ta tatou e aro nei, . . . te mau varua ino i te raˈi [râ].”—Ephesia 6:11, 12.

   Te auraa: E titauhia ia patoi te mau Kerisetiano i te mau varua ino e ia ore e haa mai te huru ra e te faatupu ra ratou i te hoê oroa e o ratou.