Aita te Bibilia e faahiti rahi nei i te parau o te hauti pere. Noa ˈtu râ, maoti te mau faaueraa tumu Bibilia, e ite tatou e hara te hauti pere no te Atua.—Ephesia 5:17. a

•   E hauti pere te taata no to ˈna nounou, e huru tera ta te Atua e au ore nei. (Korinetia 1, 6:9, 10; Ephesia 5:3, 5) E noaa i te taata hauti pere te moni o ta te tahi atu i ere. Te patoi nei râ te Bibilia ia nounou i ta vetahi ê mau taoˈa.—Exodo 20:17; Roma 7:7; 13:9, 10.

•   Noa ˈtu mea iti te tino moni faaohipahia no te hauti pere, e turai te reira ia tatou ia riro ei taata nounou moni.—Timoteo 1, 6:9, 10.

•   Pinepine te taata hauti pere i te rave i te tahi mau ohipa niuhia i nia i te mau tiaturiraa manamana aore ra i te tiatonu i nia i te manaˈo e nehenehe o ˈna e manuïa. Tera râ, no te Atua, ua riro tera mau tiaturiraa ei ohipa haamori idolo, mea au ore roa hoi na ˈna te reira.—Isaia 65:11.

•   Aita te Bibilia e faaitoito ra ia hinaaro i te tahi taoˈa ma te ore e ohipa, te faaitoito nei râ ia haa rahi ia noaa mai te tahi mea. (Koheleta 2:24; Ephesia 4:28) E nehenehe te feia e pee ra i te mau aˈoraa Bibilia e amu “i te maa i noaa ia ratou.”—Tesalonia 2, 3:10, 12.

•   E faatupu te hauti pere i te manaˈo tataˈu, e huru hoi tera o ta te Bibilia e patoi ra.—Galatia 5:26.