Oia hoi, ia tamau noa te hoê taata i te rave i te hara ma te ore e taui i to ˈna huru feruriraa e haerea, aita roa ˈtu te Atua e faaore i ta ˈna mau hara. Mea nafea te reira e haamata ˈi?

 E faaore te Atua i te mau hara a te hoê taata mai te peu e tatarahapa o ˈna, e auraro o ˈna i te mau ture aveia a te Atua i roto i to ˈna oraraa e e faatupu oia i te faaroo i roto ia Iesu Mesia. (Ohipa 3:19, 20) Tera râ, e nehenehe te hoê taata e tamau noa i te rave i te hara ma te ore roa ˈtu e taui i to ˈna huru feruriraa aore ra haerea. Te parau ra te Bibilia no nia i teie taata e “aau ino” to ˈna e ua “etaeta i te puai haavare o te hara.” (Hebera 3:12, 13) Mai te hoê farii araea amâ o te ore e nehenehe e tarai faahouhia, oia atoa te aau o te hoê taata o te patoi etaeta ra i te Atua. (Isaia 45:9) Aita faahou e tumu no te faaore i ta ˈna mau hara. No reira, ua rave ïa o ˈna i te hara tei ore roa e faaorehia.—Hebera 10:26, 27.

 I te tau o Iesu ua rave te tahi mau tia haapaoraa ati Iuda i te hara tei ore roa e faaorehia. Ua ite hoi ratou e ua faatupu Iesu te mau semeio maoti te puai o te varua moˈa a te Atua. Noa ˈtu râ, ua pari haavare ratou e no ô mai i te Diabolo ra o Satani to ˈna mana.—Mareko 3:22, 28-30.

Te tahi mau hara te nehenehe e faaorehia

•  Te faaino i te Atua no te taa ore. I na mua ˈˈe e taata faaino i te Atua te aposetolo Paulo no reira o ˈna i parau ai i muri iho: “Ua arohahia mai râ vau, no te mea i na reira na vau no te taa ore e te ereraa i te faaroo.”—Timoteo 1, 1:13.

•  Te faaturi. Te faahiti ra te Bibilia te tahi mau taata tei faaturi i na mua ˈˈe. Tera râ, ua taui ratou i to ratou haerea e ua faaore te Atua i ta ratou mau hara.—Korinetia 1, 6:9-11.

“Ua rave anei au i te hara tei ore roa e faaorehia?”

 Mai te peu e tatarahapa mau oe i ta oe mau hara e e hinaaro mau oe e taui, aita ïa oe i rave i te hara tei ore roa e faaorehia. Mai te peu aita to oe aau i ino e i etaeta roa ˈi, e nehenehe ïa te Atua e faaore i ta oe mau hara noa ˈtu e topa faahou oe i roto i taua hara ra.—Isaia 1:18.

 E manaˈo vetahi e ua rave ratou i te hara o te ore roa e faaorehia no te mea e faahapa noa to ratou aau ia ratou iho. Tera râ, te haapii ra te Bibilia aita tatou e nehenehe e tiaturi to tatou aau. (Ieremia 17:9) Aita te Atua e hinaaro ia haava tatou ia vetahi ê aore ra ia tatou iho. (Roma 14:4, 12) Noa ˈtu te faahapa noa ra to tatou aau ia tatou, ua faaore aˈena te Atua i ta tatou mau hara.—Ioane 1, 3:19, 20.

Ua rave anei Iuda Isakariota i te hara tei ore roa e faaorehia?

 Oia mau. Na te nounou e turai ia ˈna ia rave i te moni horoahia no te haamoriraa. Ua haavare o ˈna e te haapeapea ra o ˈna no te feia veve. Tera râ, to ˈna hinaaro mau ia eiâ te moni i roto i te afata. (Ioane 12:4-8) I te mea ua etaeta roa to ˈna aau i te rave i te mea ino ua taiva ïa Iuda ia Iesu e ua hoo ia ˈna no e 30 moni ario. Ua ite mau Iesu aita roa ˈtu Iuda Isakariota e tatarahapa no ta ˈna i rave. No reira Iesu i parau ai no Iuda e o ˈna “te taata o te haamouhia.” (Ioane 17:12) Te auraa ïa e pohe mure ore to Iuda, aita o ˈna e tia faahou mai.—Mareko 14:21.

 Aita Iuda i tatarahapa mau no te hara ta ˈna i rave. Ua faaite râ i to ˈna tatarahapa i mua i te mau tia haapaoraa ta ˈna i turu, eiaha râ i mua i te Atua.—Mataio 27:3-5; Korinetia 2, 7:10.