Te pahonoraa a te Bibilia

 Aita te Bibilia e faataa ra e hitu hara o te pohe te utua. Tera râ, te haapii ra te Bibilia ia rave te hoê taata i te hara rahi aita ïa o ˈna e faaorahia. Ei hiˈoraa, te faahiti ra te Bibilia eaha te mau hara rahi “ta te tino hara e faatupu,” oia hoi te peu taotoraa tia ore, te haamoriraa idolo, te peu tahutahu, te iria e te taero ava. Teie te parauhia i te pae hopea: “E ore roa te feia o te rave noa i teie mau peu e fatu i te Faatereraa arii a te Atua.”—Galatia 5:19-21. a

Aita anei te Bibilia i faahiti na e “hitu ohipa mea au ore roa na [te Atua]”?

 E. Te parau ra te Bibilia i roto i te Maseli 6:16: “E ono ohipa mea hae na Iehova, oia mau, e hitu ohipa mea au ore roa na ˈna.” Tera râ, noa ˈtu te faahiti ra te Maseli 6:17-19 i te hoê anairaa hara e ere te auraa tera anaˈe te hara ta te hoê taata e rave. E nehenehe atoa tatou e hara na roto i te manaˈo, te parau e te ohipa. b

Eaha te auraa o te parau “te hara o te pohe te utua”?

 Te faaite papu ra te Bibilia e aratai pauroa te mau hara i te pohe. Tera râ, e faaorahia tatou i te hara e te pohe maoti te tusia taraehara o Iesu Mesia. (Roma 5:12; 6:23) No reira, “te hara o te pohe te utua” aita ïa te tusia o te Mesia e faaore i te reira. (Ioane 1, 5:16). Te hoê taata o tei rave i taua hara ra e o te tamau noa i te na reira, aita ïa o ˈna e hinaaro e taui i to ˈna huru feruriraa e haerea. Te parau hoi te Bibilia no teie huru hara “e ore ïa e faaorehia.”—Mataio 12:31; Luka 12:10.