E piti taime te faahitiraahia te parau “Ierusalema apî” i roto i te Bibilia. E oire taipe teie o te faahohoˈa ra i te mau pǐpǐ a Iesu o te haere i te raˈi no te faatere e o ˈna i roto i te Faatereraa arii a te Atua. (Apokalupo 3:12; 21:2) Ia au i te Bibilia, e pii-atoa-hia teie pǔpǔ, te vahine faaipoipo a te Mesia.

1.   Tei te raˈi te Ierusalema apî. I te mau taime atoa e faahiti ai te Bibilia i te Ierusalema apî, te parauhia ra e pou mai te reira mai te raˈi mai e na te melahi e tiai ra i te mau uputa o te oire. (Apokalupo 3:12; 21:2, 10, 12) Hau atu â, no to ˈna rahi, e ere te reira i te oire i nia i te fenua. E maha pae to te oire. To ˈna faito, “12 000 ïa setadia.” a (Apokalupo 21: 16) Te faito o na pae e maha, fatata ïa 560 kilometera te teitei.

2.   E pǐpǐ na Iesu te mau mero o te Ierusalema apî, oia hoi te vahine faaipoipo a te Mesia. E “vahine faaipoipo na te Arenio” te Ierusalema apî. (Apokalupo 21:9, 10) Te Arenio, o Iesu Mesia ïa. (Ioane 1:29; Apokalupo 5:12) Te vahine a te Arenio, oia hoi ïa te vahine faaipoipo a te Mesia e te faahohoˈahia ra te reira i te mau Kerisetiano o te tahoê atu ia Iesu i te raˈi. Te faahohoˈa ra te Bibilia i to ratou hoêraa i te taatiraa e vai ra i rotopu i te hoê tane e ta ˈna vahine faaipoipo. (Korinetia 2, 11:2; Ephesia 5:23-25) Hau atu â, i nia iho i te mau ofai niu o te Ierusalema apî, te vai ra ïa “na iˈoa 12 . . . o na aposetolo 12 a te Arenio.” (Apokalupo 21:14) Te haapapu mai ra te reira o vai mau na te Ierusalema apî, oia hoi te mau Kerisetiano tei maitihia no te ora i te raˈi e ua patuhia ratou i “nia i te niu o te mau aposetolo e te mau peropheta.”—Ephesia 2:20.

3.   E faatereraa te Ierusalema apî. I tahito ra, ua riro Ierusalema te oire pu o Iseraela ei parahiraa no “to Iehova terono.” (Paraleipomeno 1, 29:23) E parauhia na Ierusalema “te oire moˈa” o no te mea i reira ta te Atua faatereraa e faatere mai ai na roto i te arii Davida, ta ˈna tamaiti o Solomona e to ˈna huaai atoa. (Nehemia 11:1) E oire moˈa atoa te Ierusalema apî, te faahohoˈa ra hoi te reira i te mau mero o te haere i te raˈi no te faatere i te fenua e o Iesu “ei arii.”—Apokalupo 5:9, 10; 21:2.

4.   E haamaitaihia to te fenua na roto i te Ierusalema apî. Ia au i te Bibilia, e itehia te Ierusalema apî ia pou mai “mai te raˈi mai no ǒ i te Atua.” E faaohipa ïa te Atua i te Ierusalema apî no te tahi tapura ohipa i nia i te fenua. (Apokalupo 21:2) Te haapapu atoa ra te reira e tuatiraa te vai ra i rotopu i te Ierusalema apî e te Faatereraa arii a te Atua o ta ˈna hoi e faaohipa no te faatupu i to ˈna hinaaro i “te fenua nei, mai i te raˈi atoa na.” (Mataio 6:10) Teie te tahi o te mau maitai ta te Atua e opua ra no te feia e parahi ra i te fenua:

   •   E faaorehia te hara. E tahe mai “te hoê anavai pape o te ora” na roto mai i te Ierusalema apî o te faatupu mai i “te mau tumu raau o te ora” no “te faaora . . . i te maˈi o te mau nunaa.” (Apokalupo 22:1, 2) E faaorahia te taata i te pae tino e i te pae varua, e faaore-roa-hia te hara e e nehenehe ratou e fanaˈo i te ora tia roa mai ta te Atua i opua i te matamua ra.—Roma 8:21.

   •   Te hau e o te Atua, e i rotopu i te taata atoa. No te hara, ua atea ê te taata i te Atua. (Isaia 59:2) Ia faaorehia râ te hara, e tupu roa teie parau tohu o te na ô ra: “Tei te huitaata ra te tiahapa o te Atua, e e faaea oia ia ratou ra, e e riro ratou ei nunaa no ˈna. Ei pihai iho te Atua ia ratou.”—Apokalupo 21:3.

   •   E ore te mauiui e te pohe. Maoti ta ˈna Faatereraa arii, “e tamǎrô [te Atua] i te mau roimata atoa o to ratou mata. E ore roa te pohe, e ore atoa te oto e te auê e te mauiui.”—Apokalupo 21:4.