E riro Te pure a te Fatu ei aratai no tatou no te ite e nafea ia pure e eaha te parau i roto i ta tatou mau pure. Ua pahono Iesu i te aniraa a ta ˈna mau pǐpǐ: “E te Fatu, haapii na oe ia matou ia pure.” (Luka 11:1) Tera râ, e ere noa Te pure a te Fatu te pure ta Atua e farii. a Ua horoa Iesu i te hoê hiˈoraa o te mau pure ta te Atua e faaroo.

I roto i teie tumu parau

•  Eaha te parauhia i roto i Te pure a te Fatu?

•  Eaha te auraa o Te pure a te Fatu?

•  O “Te pure a te Fatu” anaˈe te tia ia faahiti-noa-hia?

•  Nafea ia pure?

•  Te tahi atu mau pure i roto i te Bibilia

 Te vai ra te hoê taa-ê-raa o Te pure a te Fatu i te Mataio 6:9-13, i roto i te tahi atu mau huriraa Bibilia. Teie e piti hiˈoraa:

 Huriraa o te ao apî: “‘To matou Metua i te raˈi, ia moˈa to oe iˈoa. Ia tae mai ta oe Faatereraa arii. Ia tupu to oe hinaaro i te fenua nei, mai i te raˈi atoa na. Horoa mai na i ta matou maa no teie mahana, e faaore mai na i ta matou mau tarahu, mai ia matou atoa i faaore i tei tarahu ia matou. E tauturu mai na ia matou ia ore ia hema, faaora mai na râ ia matou i te varua ino.’”

 Te Bibilia Moˈa ra: “E to matou Metua i te ao ra, ia raa to oe iˈoa. Ia tae to oe ra hau. Ia haapaohia to oe hinaaro i te fenua nei, mai tei te ao atoa na. Ho mai i te maa e au ia matou i teie nei mahana. E faaore mai i ta matou hara, mai ia matou atoa e faaore i tei hara ia matou nei. E eiaha e faarue ia matou ia roohia-noa-hia e te ati, e faaora râ ia matou i te ino.” b

 Ua tuea te haapiiraa a Iesu i te toea o te mau Papai, ua papu ia tatou e haamaramarama mai iho â te tahi atu mau tuhaa o te Bibilia i te auraa o Te pure a te Fatu.

“To matou Metua i te raˈi”

 Mea tano iho â ia pii i te Atua “To matou Metua” no te mea na ˈna i poiete ia tatou e i horoa mai i te ora.—Isaia 64:8.

“Ia moˈa to oe iˈoa”

 Mea tia ia faaturahia te iˈoa o te Atua ra Iehova e ia faariro i te reira ei mea moˈa. E na reira te hoê taata i te faahiti i te iˈoa o te Atua, ma te paraparau no nia i to ˈna mau huru maitatai e i ta ˈna mau opuaraa.—Salamo 83:18; Isaia 6:3.

“Ia tae mai ta oe Faatereraa arii”

 Te Faatereraa arii a te Atua, e faatereraa i te raˈi te reira e o Iesu te Arii. Ua haapii Iesu ia tatou ia pure ia nehenehe teie faatereraa ia faatere mai i te fenua taatoa.—Daniela 2:44; Apokalupo 11:15.

“Ia tupu to oe hinaaro i te fenua nei, mai i te raˈi atoa na”

 No te mea aita e ino e e pohe i te raˈi, te hinaaro ra te Atua ia ora te taata e a muri noa ˈtu i te fenua nei ma te hau e te ino ore.—Salamo 37:11, 29.

“Horoa mai na i ta matou maa no teie mahana”

 E maa faufaa te faraoa i te tau o Iesu. Eiaha ïa e haamoˈe o te Atua anaˈe te nehenehe e horoa mai i te mau mea atoa e hinaarohia e tatou nei no te ora.—Ohipa 17:24, 25.

“E faaore mai na i ta matou mau tarahu, mai ia matou atoa i faaore i tei tarahu ia matou”

 Ua faaohipahia i roto i teie tupuraa te taˈo “tarahu” ma te tahi atu taˈo ei hara. (Luka 11:4) Te hara e te hapa nei te taata atoa. Ia hinaaro râ tatou ia faaore mai te Atua i ta tatou mau hapa, e mea titauhia ia ineine atoa tatou i te faaore i ta vetahi atu hapa.—Mataio 6:14, 15.

“E tauturu mai na ia matou ia ore ia hema, faaora mai na râ ia matou i te varua ino”

 Aita te Atua e tamata ia tatou ia rave i te mea ino. (Iakobo 1:13) O Satani râ “te varua ino,” o te pii-atoa-hia te Diabolo o te tamata ra ia tatou. (Ioane 1, 5:19; Mataio 4:1-4) E ani râ tatou ia Iehova ia ore tatou e hema ia turaihia tatou ia faaroo ore ia ˈna.

 Ua horoa mai Iesu Te pure a te Fatu ei hiˈoraa. Eiaha ïa e faahiti noa i te mau taˈo atoa o tera pure. Hau Iesu a faahiti ai Te pure a te Fatu, ua faaara o ˈna: “Ia pure oe, eiaha e tahana i te parau.” (Mataio 6:7) I roto i te tahi atu tupuraa, a faahiti ai oia i te pure tuiroo, ua faaohipa oia i te tahi atu mau taˈo.—Luka 11:2-4.

 Te ravea maitai roa ˈˈe ia pure tatou, ma te faaiteraa ïa i te Atua i to tatou manaˈo e huru aau. (Salamo 62:8)

 Te horoa ra Te pure a te Fatu i te hoê hiˈoraa e nafea ia pure i te Atua. A tapao na e nafea te reira e tu ai i te tahi atu mau irava Bibilia no nia i te pure.

•   A pure i te Atua anaˈe

   Irava: “Na roto . . . i te pure e te taparuparuraa e te haamaitairaa, a faaite i ta outou mau aniraa i te Atua.”—Philipi 4:6.

   Te auraa: E pure tatou i te Atua anaˈe eiaha râ ia Iesu, ia Maria aore ra i te mau peata. Te haapii mai ra te omuaraa parau o Te pure a te Fatu “To matou Metua,” nafea ia pure ia Iehova to tatou Atua.

•   E pure tatou no te mau mea ia au i te hinaaro o te Atua

   Irava: “Eaha ta tatou e ani ia au i to ˈna hinaaro, e faaroo mai o ˈna.”—Ioane 1, 5:14.

   Te auraa: E nehenehe tatou e pure no te mau mea o te tuea ra i te hinaaro o te Atua. Ua haapii mai Iesu te faufaaraa o te hinaaro o te Atua ma te faahiti i roto Te pure a te Fatu te parau “ia tupu to oe hinaaro.” E nehenehe tatou e ite atu â no nia i te hinaaro o te Atua no te fenua e no te huitaata ma te haapii i te Bibilia.

•   A pure ma te aau tae

   Irava: “A huri i ta oe hopoia i nia ia Iehova, e na ˈna e tauturu ia oe.”—Salamo 55:22.

   Te auraa: Te haapeapea mai ra te Atua no tatou. Mai te mau aniraa ta Iesu i faahiti i roto i Te pure a te Fatu, e nehenehe atoa tatou e pure no te mau mea hinaarohia o te mau mahana atoa, ia aratai mai no te rave i te mau faaotiraa faufaa, no te turu mai i roto i te mau taime fifi e ia faaore atoa i ta tatou mau hara. c