Te haapii ra anei te Bibilia e ora faahou tatou i roto i te tino ê?

FAAROO NA ROTO TE REO

Te pahonoraa a te Bibilia

Aita te Bibilia e haapii ra i te reira. Ua niuhia teie tiaturiraa i nia i te haapiiraa e ora ˈtu te tahi mea i roto i te taata ia pohe o ˈna. a Tera râ, te haapii ra te Bibilia e ua hamanihia te taata i te repo fenua e ia pohe o ˈna ua faaea o ˈna i te ora. Aita hoê mea i roto ia ˈna e ora noa i muri aˈe i to ˈna pohe.—Genese 2:7, nota; Ezekiela 18:4; Genese 3:19; Koheleta 9:5, 6.

Eaha te taa-ê-raa i rotopu i te tia-faahou-raa e te ora-faahou-raa i roto i te tino ê?

Aita te haapiiraa a te Bibilia no nia i te tia-faahou-raa i niuhia i nia i te haapiiraa e ora ˈtu te tahi mea i roto i te taata ia pohe o ˈna. Maoti te puai o te Atua e faatia-faahou-hia mai tei pohe i te ora. (Mataio 22:23, 29; Ohipa 24:15) E tiaturiraa faahiahia mau ta te tia-faahou-raa e horoa mai ra, ia ora i nia i te fenua e a muri noa ˈtu.—Petero 2, 3:13; Apokalupo 21:3, 4.

Manaˈo hape no nia i te ora faahou i roto i te tino ê e ta te Bibilia e haapii ra

Manaˈo hape: Te parau ra te Bibilia e ua ora faahou te peropheta Elia i roto i te tino o Ioane Bapetizo.

Tupuraa mau: Ua faaite atea te Atua: “Te tono atu nei au i te peropheta Elia ia outou ra.” Ua faaite Iesu e ua tupu teie parau tohu no nia ia Ioane Bapetizo. (Malaki 4:5, 6; Mataio 11:13, 14) Tera râ, aita o ˈna i parau e ua ora faahou Elia i roto i te tino o Ioane Bapetizo. Ua parau hoi Ioane e ere o ˈna o Elia. (Ioane 1:21) Ua haa râ Ioane mai ia Elia ma te faaite i te poroi a te Atua no nia i te tatarahapa. (Te mau arii 1, 18:36, 37; Mataio 3:1) Ua faaite atoa Ioane i te “itoito e te mana mai to Elia.”—Luka 1:13-17.

Manaˈo hape: Te parau ra te Bibilia o te “fanau-faahou-hia” te haapiiraa e ora faahou i roto i te tino ê.

Tupuraa mau: Te faaite ra te Bibilia e nehenehe te hoê taata e fanau-faahou-hia i te pae varua noa ˈtu te ora noa ra oia. (Ioane 1:12, 13) E ere te “fanau-faahou-hia” i te hoê faautuaraa no te mau ohipa i ravehia i na mua aˈe. Tera râ, e haamaitairaa teie no ô mai i te Atua. Na ˈna e horoa i teie tiaturiraa faahiahia mau no a muri aˈe.—Ioane 3:3; Petero 1, 1:3, 4.

a No ô mai i Babulonia i tahito te mau haapiiraa e e ora ˈtu te tahi mea i roto i te taata ia pohe o ˈna e te pohe-ore-raa. I muri iho, ua haapii te mau philosopho Initia i te haapiiraa parauhia karma. Ia au i te hoê buka, te karma o te “ture o te tumu e te faahopearaa, o te parau ra e na te haerea o te hoê taata e faataa i to ˈna oraraa no a muri aˈe.”—Britannica Encyclopedia of World Religions, api 913.