No vetahi, ua fiu ratou i te faaea noa i te fare aita e ohipa maitai e mea ino roa ˈtu ïa ia ûa anaˈe. Teie ta Robert e parau ra: “Ia ûa anaˈe, e parahi noa ïa vau aita e taa e eaha te rave.”

 Ua haumani aˈena anei oe mai tera te huru? E tauturu ïa teie tumu parau ia oe:

•  Te tia ia oe ia ite

•  Ta oe e rave

•  To ratou manaˈo

•   Eita paha te ravea apî e tauturu ia oe.

   Mea au roa ia haere i nia i te natirara, tera râ hoi, e rahi faahou atu â to oe haumani. Te na ô ra o Jeremy: “E faaea noa oe i mua i te matini aita e apî.”

   Te parau ra te hoê taurearea tamahine o Elena te iˈoa: “Eita ta te mau ravea apî e tauturu ia oe, e haere noa paha oe i nia iho no te haamâuˈa i to oe taime. Ia tupohe ra oe i te reira, rahi atu â to oe haumani.”

•   Tei te huru o to oe feruriraa.

   Mea rahi anaˈe ta oe ohipa, te auraa anei ïa eita oe e haumani? Tei te huru ïa o to oe anaanatae. Te na ô ra o Karen: “E haumani noa na vau i te fare haapiiraa, noa ˈtu mea rahi te ohipa ta ˈu e rave. Ia rave ra oe ma te aau tae eita oe e haumani.”

 Ua ite anei oe? E ere te fifi no te mea “aita ta oe e ohipa e rave,” e faaohipa râ oe i tera taime no te haamata i te hoê ohipa apî mai te hoê raau tupu e rahi mai i roto te repo maitai.

 Anaanatae e rave rau mea. A imi i te hoa apî, te ohipa ta oe e au roa e rave. A imi i te tahi atu faaanaanataeraa. Eita oe e haumani o oe anaˈe e e anaanatae mai vetahi ia oe!

 Aratairaa Bibilia: “O tei itea ia oe ta to rima e rave ra, a rave ma to puai atoa ra.”—Koheleta 9:10.

 “E ere i te mea maoro ua haapii au i te reo Mandarin, ta ˈu ïa i paraparau i te mau mahana atoa. Ua ite au i te faufaaraa o tera haapiiraa. E fa maitai roa teie. Ua oaoa roa vau i te faaohiparaa i to ˈu taime i te haapiiraa i tera reo.”—Melinda.

 A tiatonu i ta oe fa. Ia taa ia oe i ta oe fa, mai te raveraa i te ohipa haapiiraa anei, e anaanatae atu â oe i te rave i te reira.

 Aratairaa Bibilia: “To te taata nei maitai . . . , ei maitai no ˈna i ta ˈna ra mau ohipa.”—Koheleta 2:24.

 “Aita vau i haapao maitai i ta ˈu haapiiraa i te omuaraa, a hope ai te matahiti haapiiraa, mea horo noa ˈtura. Vaˈu hora te mahana hoê no te haapii hau atu â. Aita râ vau i haumani, no te mea ua hinaaro vau ia naea ia ˈu tera fa: te parau tuite. E ua anaanatae roa vau.”—Hannah.

 A farii i te mau mea ta oe e ore e nehenehe e taui. I te tahi mau taime, te vai ra te mau faaanaanataeraa mea haumani roa aore ra eita paha to oe mau hoa e haere mai i ta oe titau-manihini-raa, o oe noa ˈtu ra ïa. Eiaha ïa e vaiiho i tera mau tupuraa ia haaparuparu ia oe.

 Aratairaa Bibilia: “Tei rearea te aau ra e fanaˈo rahi to ˈna.”—Maseli 15:15.

 “Ua parau te hoê hoa, a oaoa i te taime o oe anaˈe i roto i to oe oraraa, mea faufaa roa ia ite oe i te taime ta oe e faataa e o vetahi e te taime ta oe e faataa o oe anaˈe.”—Ivy.