Te na ô ra te tahi tamahine o Elaine te iˈoa: “Ia ite au mea rahi to te tahi hoa i nia i te reni faahoaraa, e na ô vau: ‘Iae, e taata au-roa-hia o ˈna!’ I roto ia ˈu, e pohehae rii au!”

 Tera anei to oe huru i te tahi taime? Mai te peu e e, e tauturu teie tumu parau ia oe ia ore e haapeapea rahi roa mea au anei na te taata ia oe i nia i te reni faahoaraa.

•  No te aha mea atâta?

•  Ia manaˈohia mea au na te taata ia oe

•  Mea faufaa mau anei ia rahi to oe hoa?

•  Eiaha e faahua haehaa!

 I roto i te Maseli 22:1, te na ô ra te Bibilia: “Mea au aˈe te hoê iˈoa maitai i te taoˈa rahi.” E ere ïa i te fifi ia hinaaro oe i te hoê iˈoa maitai, oia hoi ia au te taata ia oe.

 Teie nei râ, eiaha oe ia manaˈo e oaoa oe mai te peu noa mea rahi te taata o te au ia oe. Eaha te fifi ia manaˈo oe mai tera? Te na ô ra te hoê tamahine 16 matahiti o Onya te iˈoa:

 “Ua ite roa vau i te tahi i te raveraa i te ohipa maamaa mai te ouˈaraa na nia mai i te tahi fare tahua i ta matou fare haapiiraa. Ua na reira ratou no te mea noa te hinaaro ra ratou ia auhia ratou e te taata.”

 Ia anaanatae mai to ratou mau hoa, e taviri vetahi ia ratou a rave ai i te tahi ohipa maamaa a tuu atu ai i te reira i nia i te reni faahoaraa. Ei hiˈoraa, e rave rau feia apî tei taviri ia ratou a rave ai i te hoê ohipa ta te tahi atu e ore roa ˈtu e rave mai te amuraa i te puohu puˈa.

 Te parau ra te Bibilia: “Eiaha roa e rave i te tahi noa ˈˈe mea . . . ma te faateitei.”—Philipi 2:3.

 A feruri:

•   Te haapeapea ra anei oe ia rahi to oe hoa i nia i te reni faahoaraa?

•   E rave roa anei oe i te hoê ohipa atâta o te tuino paha i to oe tino ia anaanatae noa mai to oe mau hoa?

 Area te tahi atu, e ravea ê ta ratou e faaohipa ia anaanatae mai to ratou mau hoa. Te faataa ra te hoê tamahine 22 matahiti o Erica te iˈoa:

 “E tuu vetahi e rave rahi hohoˈa i nia i te reni faahoaraa mai te huru ra e rave rahi hoa to ratou e e mea rahi te ohipa ta ratou e rave amui. Ia hiˈohia ˈtu, e manaˈohia ïa e taata au-roa-hia ratou!”

 Te faaite ra Cara 15 matahiti i ta te tahi e rave nei. Te na ô ra oia:

 “Ua ite roa vau i te tahi i te pataraa i te hohoˈa ia manaˈohia te arearea ra ratou, nohea aˈenei, tei te fare noa ïa ratou.”

 Ua parau Matthew 22 matahiti tei na reira aˈenei:

 “Ua tuu aˈena vau i te hoê hohoˈa i nia i te reni faahoaraa a tapao atu ai tei nia vau i te mouˈa Everest, aita hoi ïa vau i haere aˈenei i Asia!”

 Te parau ra te Bibilia: “Te hinaaro ra matou ia afaro noa to matou haerea i te mau mea atoa.”—Hebera 13:18.

 A feruri:

•   I nia i te reni faahoaraa, ua turai aˈenei oe ia vetahi ê ia tiaturi i te hoê mea e ere i te mea mau ia anaanatae noa mai te taata ia oe?

•    Te mau hohoˈa e te mau mea ta oe e papai i nia i te reni faahoaraa, te faaite mau ra anei te reira i to oe huru mau e i te mea faufaa no oe?

 E rave rahi o te manaˈo nei, mea titauhia ia rahi roa to oe hoa i nia i te reni faahoaraa. O ta Matthew ïa i manaˈo na:

 “I matau na vau i te ani: ‘Ehia rahiraa hoa to oe i nia i te reni faahoaraa?’ ‘Eaha te faito rahi roa ˈˈe o te taata o tei au i ta oe i tuu i nia i te reni faahoaraa?’ Ia maraa te numera o to ˈu mau hoa i nia i te reni faahoaraa, e hapono hanoa vau i te titau-manihini-raa i te feia atoa, tae noa ˈtu i te feia aita vau i matau ma te tiaturi e apee atoa mai ratou ia ˈu i nia i te reni faahoaraa. E hinaaro rahi to ˈu ia au mai te taata ia ˈu e ua puai roa mai tera hinaaro na roto i te reni faahoaraa.”

 Te parau ra Maria 25 matahiti, te vai atoa ra vetahi o te manaˈo ra mea faufaa te tahi mai te peu noa mea rahi to ˈna hoa i nia i te reni faahoaraa. Te na ô ra oia:

 “Ia tuu te tahi tamahine i to ˈna hohoˈa i nia i te reni faahoaraa e aita i rahi te taata o tei au i te reira, e manaˈo ïa o ˈna e ere o ˈna i te mea nehenehe, mea hape râ hoi! Mea rahi râ te taata o te manaˈo nei mai tera! Te auraa ra, na ratou noa iho â e faateimaha ra ia ratou iho!”

 Te parau ra te Bibilia: “Eiaha tatou e faateitei noa, e tataˈu e e feii te tahi i te tahi.”—Galatia 5:26.

 A feruri:

•   Ia haere oe i nia i te reni faahoaraa, e turai anei te reira ia faaau ia oe i te tahi atu?

•    Eaha te mea faufaa aˈe no oe? Te rahiraa taata o te apee ra ia oe i nia i te reni faahoaraa aore ra te hoa papu o te tâuˈa mau ra ia oe?