E rave rahi taata te faaea fare hou a faaipoipo ai. E na reira vetahi no te mea te hinaaro ra ratou e ite e tano anei to raua huru. E manaˈo ratou e tauturu rahi te reira ia manuïa to ratou faaipoiporaa. Mea tano anei ia faaea fare hou a faaipoipo ai?

I roto i teie tumu parau

•  Eaha ta te Bibilia e parau ra?

•  E faaineine anei te faaearaa fare ia oe no te faaipoiporaa?

•  E faufaahia anei oe i te pae moni a faaea fare ai hou te faaipoiporaa?

•  E tauturu anei te faaearaa fare hou te faaipoiporaa ia oe ia ore e faaipoipo i te taata tano ore?

•  Te vai ra anei te hoê ravea maitai aˈe?

•   Te patoi ra te Bibilia ia taoto na apiti aita anaˈe raua i faaipoipohia. Ei hiˈoraa, te na ô ra te Bibilia: “Ia haapae i te mau peu taotoraa tia ore e tia ˈi.” (Tesalonia 1, 4:3; Korinetia 1, 6:18) I roto i te mau peu taotoraa tia ore, e ô atoa te taotoraa o na taata e faaea fare ra, noa ˈtu te opua ra raua i te faaipoipo i muri iho. a E paruru te mau ture aveia Bibilia i na apiti i te mau faahopearaa ino atoa o te faaearaa fare hou a faaipoipo ai, mai te fanauraa i te tamarii i rapaeau i te faaipoiporaa.

•   O te Atua te tumu o te faaipoiporaa. I to ˈna haamauraa i te reira, ua parau o ˈna: “No reira te hoê tane e faarue ai i to ˈna metua tane e to ˈna metua vahine, a ati atu ai i ta ˈna vahine faaipoipo, e e riro raua ei hoê.” (Genese 2:24) Ia faaipoipo hoê tane e hoê vahine, e haapao raua ia tapea i ta raua euhe. O te faaipoiporaa ïa te niu maitai roa ˈˈe o te hoê utuafare here e te papu.

 No vetahi, e. Te manaˈo ra ratou e mea rahi ta ratou e haapii a rave ai ratou i te ohipa i te fare e a hiˈopoa ˈi i te mau peu o te tahi. Tera râ, ia manuïa te faaipoiporaa, mea faufaa roa ia faaoti papu i te tapea i te euhe.

 E nafea e piti taata e haapii ai i te ati i to ˈna apiti i te taime oaoa aore ra i te taime fifi? E ere ma te faaea fare hou te faaipoiporaa no te mea i taua taime parauhia “tau faaineineraa,” e nehenehe hoê apiti e faarue i te tahi atu i te mau taime atoa e hinaaro ai o ˈna. E ere ïa tera te ravea no te hoê faaipoiporaa oaoa. Mai te peu râ e euhe na apiti i roto i te faaipoiporaa, e piri atu â raua e e ohipa amui raua no te faaruru i te mau fifi.

 Te mea faufaa: Te manaˈo ra te feia e faaea fare ra hou te faaipoiporaa e te faaineine ra ratou no te faaipoiporaa. Te tanoraa mau râ, te faaineine ra ratou no te faataa-ê-raa.

 Aratairaa Bibilia: “Ta te taata hoi e ueue ra, o ta ˈna atoa ïa e ooti.”—Galatia 6:7.

 No vetahi, e. Ia au i te hoê pu maimiraa, te tumu i faaoti ai maha taata i nia i te ahuru i Marite i te faaea fare hou te faaipoiporaa, o te moni ïa. I muri aˈe râ i to ratou faaearaa fare, te tumu rahi i ore ai ratou i ineine no te faaipoiporaa, o te moni ïa.

 Te vai ra te tahi atu mau faahopearaa no te feia e faaea fare hou te faaipoiporaa, no te mau vahine iho â râ. Ei hiˈoraa, ia faataa ê na apiti, pinepine na te mau vahine e rave i te hopoia e aupuru i te mau tamarii.

 Te mea faufaa: Mea rahi aˈe te mau faahopearaa ino o te faaearaa fare hou te faaipoiporaa, ia faaauhia i te mau faahopearaa parauhia mea maitai.

 Aratairaa Bibilia: “O vau, o Iehova to oe Atua, Tei haapii ia oe ia faufaahia oe.”—Isaia 48:17.

 No vetahi, e. Tera râ, te na ô ra te hoê buka no nia i te mau tutavaraa ia manuïa te faaipoiporaa: “Te manaˈo ra te feia e faaea fare ra hou te faaipoiporaa e mea ohie aˈe ia faataa ê i te tahi atu apiti. E ere roa ˈtu râ tera.” No te aha? Ua taa paha ia ratou e aita ratou e au ra i te huru o te apiti. Tera râ, te vai ra te mau hopoia e titauhia ia amo amui atu, mai te haapaoraa i te urî, te tarahu aore ra te tamarii. Aita ïa ratou e faataa ê no te mea mai te reira to ratou oraraa e aita ratou e nehenehe e taui, a fifi atu ai ratou. b Ia au i te buka faahitihia na mua ˈtu, “e hinaaro vetahi e faataa ê hou te faaipoiporaa. E faaipoipo râ ratou no te mea mea ohie aˈe ia na reira.”—Fighting for Your Marriage.

 Te mea faufaa: A faaea fare ai hou te faaipoiporaa, aita te reira e tauturu ia oe ia rave i te faaotiraa maitai. Mea fifi aˈe râ ia faataa ê e te hoê apiti tano ore.

 Aratairaa Bibilia: “E ite te taata feruriraa haroˈaroˈa i te tupuraa atâta e e tapuni oia, e haere noa ˈtu râ te maˈua a faaruru atu ai i te mau faahopearaa.”—Maseli 22:3.

 E nehenehe oe e ape i te mau fifi o te faaearaa fare hou te faaipoiporaa e e faaineine no te hoê faaipoiporaa oaoa. E nafea ïa? Ma te pee maite i te mau ture aveia Bibilia no nia i te faaipoiporaa. A rave i te taime no te haamatau i te taata ta oe e hinaaro e faaipoipo atu hou a haamata ˈi i te ora mai te hoê apiti faaipoipo. Mea au aˈe ia maiti i te hoê apiti no te mea te tu ra ta orua mau tiaturiraa e to orua mau ture aveia, eiaha râ no te mea mea haviti te tahi atu e mea puai to oe hinaaro e taoto ia ˈna.

 Te horoa ra te Bibilia i te mau aˈoraa o te tauturu atu ia faaineine ia oe no te hoê faaipoiporaa oaoa e te papu. c Ei hiˈoraa, i roto i te Bibilia, te vai ra te mau aratairaa o te tauturu atu . . .

•   ia ore e taiva i te apiti

•   ia riro ei taata faaipoipo maitai

•   ia vai ara i te mau tapao o te faaite e ere paha te taata ta tatou e haamatau ra i te mea tano

 No te ite atu â no nia i tera mau tumu parau, a hiˈo i te tuhaa “Te faaipoiporaa e te utuafare” i nia jw.org.

 Aratairaa Bibilia: “Te mau Papai moˈa atoa, ua papaihia ïa i raro aˈe i te aratairaa a te varua o te Atua, e mea faufaa no te haapii mai.”—Timoteo 2, 3:16.