No te parau a to oe hoa faaipoipo aore ra te tahi ohipa ta ˈna i rave, ua riri oe e e tamata oe i te huna i te reira. Tera râ, te ite ra to oe hoa faaipoipo aita oe e afaro ra e e haamata o ˈna i te uiui atu. Ua rahi roa ˈtu â to oe riri. E nafea ia haavî i to oe riri i roto i teie tupuraa?

•  Te tia ia ite

•  E nafea ïa?

•   Mea ino te riri no to oe ea. Te faaite ra te mau maimiraa, ia ore te taata e haavî i to ˈna riri e nehenehe te reira e haafifi i to ˈna ea, mai te neˈiraa toto puai, te maˈi mafatu, te hepohepo e te maˈi opu. Aita atoa te taoto e topa, e rahi roa te ahoaho, e tupu te maˈi o te iri e te maˈi i roto i te roro. Mea tano ïa ta te Bibilia e parau ra: “A tuu i te riri . . . e aratai hoi te reira i te ino ra.”—Salamo 37:8, nota.

•   Mea ino atoa ia tapea te riri i roto ia oe. Mai te peu e tapea noa oe i te riri, e nehenehe e faaau i te reira mai te hoê maˈi o te uˈana ra i roto ia oe. Ei hiˈoraa, e faatupu paha oe i te hoê huru feruriraa ino o te nehenehe e haafifi i to oe faaipoiporaa.

•   A imi i te mau huru maitatai o to oe hoa faaipoipo. A tapao e toru huru maitatai ta oe e au roa. I te taime a riri ai oe ia ˈna, a haamanaˈo i teie mau huru maitatai ta oe i tapao. Na te reira e tauturu ia haavî i to oe riri.

   Aratairaa Bibilia: ”Ia mauruuru . . . outou.”—Kolosa 3:15.

•    A faaore i te hapa. Na mua roa, mea faufaa ia taa maitai ia oe te manaˈo o to oe hoa faaipoipo. E tauturu te reira ia oe ia faaite i te “aumauiui.” (Petero 1, 3:8) I muri aˈe, a ani ia oe iho: “Te vai ra anei te tumu papu ia ore au e faaore i te hapa?”

   Aratairaa Bibilia: “Mea nehenehe ia ore oia ia tâuˈa i te hara.”—Maseli 19:11.

•    A faaite i to oe mau manaˈo ma te mǎrû e te hamani maitai. Ia faaite oe i to oe manaˈo, a faaohipa i te taˈo “vau” eiaha râ “oe.” Ei hiˈoraa, eiaha e parau: “Haapao noa oe ia oe iho, aita oe i taniuniu mai no te faaite teihea ra oe!” Mea maitai aˈe ia parau: “Ua haapeapea roa vau no oe, ua po hoi e aita vau i ite e ua maitai anei oe.” Ia faaite oe i te mǎrû e tauturu te reira ia haavî i to oe riri.

   Aratairaa Bibilia: “Ei parau nehenehe noa ta outou e te tamitihia.”—Kolosa 4:6.

•    A faaroo ma te tura. Ia oti anaˈe oe i te paraparau, a vaiiho i to oe hoa faaipoipo ia pahono mai ma te ore e tâpû i ta ˈna parau. Ia ore oe i taa maitai te tahi mau mea ta ˈna i faahiti, a ani atu ia tatara-maitai-hia te reira. E tauturu te faaroo-maite-raa ia haavî i to oe riri.

   Aratairaa Bibilia: “Ia ineine te taata atoa i te faaroo e tia ˈi, eiaha e ru i te paraparau.”—Iakobo 1:19.