“I te taime matamua ua aparau mâua i ta mâua tamahine no nia i te ava, e ono noa matahiti to ˈna. Ua maere roa mâua, mea rahi hoi ta ˈna i ite no nia i te ava.”—Alexander.

•  Te tia ia ite

•  E nafea ïa?

•  Ta te Bibilia e parau ra no nia i te ava

 Mea faufaa ia paraparau i ta ˈu tamarii no nia i te ava. Eiaha e tiai ia paari ta oe tamarii. Te na ô ra Khamit no Rusia: “Ahani mâua i paraparau ai i ta mâua tamaiti no nia i te ava i to ˈna nainairaa. Aita vau i taa oioi i te faufaaraa ia na reira. Ua haamata hoi ta ˈu tamaiti i te inu pinepine i te ava i te 13raa o to ˈna matahiti.”

 No te aha mea faufaa?

•   E nehenehe te mau hoa haapiiraa, te poroi faatianiani e te afata teata e tuu i roto i te feruriraa o ta oe tamarii i te manaˈo tano ore no nia i te ava.

•   Ia au i te Pu Marite no te hiˈopoaraa i te maˈi, 11 i nia i te hanere o te feia apî te inu ra i te ava i Marite.

 No reira, te faaitoito ra te pu o te ea i te mau metua ia faaara i ta ratou mau tamarii i to ratou nainairaa no nia i te faahopearaa ino o te ava.

 A faaineine maite ia oe no te pahono atu. Mea au na te tamarii apî ia aniani no nia i te mau mea atoa, hau atu â râ te mau taurearea. No reira, a faaineine maite ia oe. Ei hiˈoraa:

•   Ia uiui ta oe tamarii mai te aha ra te huru o te ava, e pahono paha oe, e au te uaina i te pape maa hotu maramara e mea avaava roa te pia.

•   Ia hinaaro ta oe tamarii e tamata i te ava, e nehenehe oe e parau aita e tano ia inu te tamarii i te ava. A faaite eaha te nehenehe e tupu: E nehenehe te ava e faaoaoa i te taata. Tera râ, ia inu hua te taata i te ava e mauiui paha to ˈna upoo, e nehenehe o ˈna e rave i te ohipa maamaa e e faahiti i te parau ta ˈna e tatarahapa i muri iho.—Maseli 23:29-35.

 Ia maramarama oe no nia i te ava. Te na ô ra te Bibilia: “E ohipa te taata feruriraa haroˈaroˈa ma te ite.” (Maseli 13:16) Ia taa maitai ia oe eaha te mau faahopearaa o te inuraa ava e eaha te mau titauraa a te ture no nia i te reira i to oe fenua. Ia ineine maitai oe, e nehenehe ïa oe e tauturu i ta oe tamarii.

 Na oe e haamata i te aparauraa. Te na ô ra Mark, te hoê metua tane no Beretane: “Mea fifi no te tamarii ia taa mea maitai anei aore ra mea ino ia inu i te ava. Ua uiui ïa vau i ta ˈu tamaiti e vaˈu matahiti i to ˈna manaˈo no nia i te reira. Ua maiti au i te hoê vahi au mau e te taime tano no te aparauraa. Mea ohie aˈe ïa no ˈna ia faaite i to ˈna mau manaˈo ma te taiâ ore.”

 Mea faufaa roa ia aparau no nia i te ava e rave rahi taime. Ia au i te faito matahiti o te tamarii, e nehenehe oe e tauaparau atoa no nia i te tahi atu tumu parau mai te haapao-maitai-raa ia haere o ˈna i nia i te purumu e te taatiraa i te pae tino.

 A faaite i te hiˈoraa maitai. E au te tamarii i te hoê rimu o te apo mai i te mau mea atoa. Ia au i te tahi maimiraa, e pee iho â te tamarii i te hiˈoraa o to ratou mau metua. Te auraa, ia inu anaˈe oe i te ava no te tamǎrû ia oe aore ra ia hepohepo oe, e manaˈo paha ïa ta oe tamarii e ua riro te ava ei ravea no te faaafaro te mau fifi o te oraraa. A horoa ïa i te hiˈoraa maitai a inu ai oe i te ava ma te tano noa.