I te mau matahiti mairi aˈenei, i te tahi mau fenua, ua maraa te numera o te mau taurearea tei haapohe ia ratou. No te aha râ? Te faaruru anei ra ta outou tamarii i teie huru tupuraa?

I roto i teie tumu parau

•  Te mau tamarii e te hinaaro e haapohe ia ratou, no te aha e tia i te mau metua ia haapeapea?

•  E nafea outou ia ite e te faaruru ra ta outou tamarii i teie fifi?

•  Eaha te rave mai te peu e hinaaro ta outou tamarii e haapohe ia ˈna?

 Mai te matahiti 2009 tae atu 2019, ua tapao te hau Marite e ua hau i te maha ahuru i nia i te hanere feia apî te ahoaho ra. I tera area taime, ua maraa atoa te numera o te feia apî tei hinaaro e haapohe ia ratou. a

 “Te faaruru nei te feia apî i te mau haafifiraa aita e nehenehe e faaau . . . Ua ino roa to ratou vai-maitai-raa i te pae o te feruriraa.”—Vivek H. Murthy, U.S. Surgeon General.

 Aratairaa Bibilia: “E ere roa . . . te taata i to ˈna puai i te aau hepohepo.”—Maseli 17:22.

 E hiˈopoa anaˈe i to muri nei mau manaˈo.

•  ● Tupuraa. Ua faaruru anei ta outou tamahine i te tahi ati? Ua faaruehia anei o ˈna e to ˈna hoa? Te oto ra anei o ˈna no te pohe o tei herehia? Mai te peu e e, te mauiui noa ra paha o ˈna, b aita râ paha outou i manaˈo e ino roa ˈtu â te reira.

•  ● To ratou huru. Mea au aˈe anei na ta outou tamahine e faaea o ˈna anaˈe? Ua faaea anei o ˈna i te rave i te mau ohipa ta ˈna i au roa ˈˈe? Ua faaea anei o ˈna i te tâuˈa i te tahi taoˈa ta ˈna i poihere noa na?

•  ● Ta ratou mau parau. Mea pinepine anei o ˈna i te faahiti i te parau o te pohe? Aore ra e parau anei oia: “Mea au aˈe na ˈu te pohe i te ora?” E parau anei o ˈna e aita oia e hinaaro ra e faateimaha ia outou?

   Papu, i te tahi taime, e nehenehe teie mau taˈo e riro “ei parau feruri-ore-hia.” (Ioba 6:3) I te tahi râ taime, e tapao te reira e te hinaaro mau ra te tamarii i te tauturu. No reira, eiaha roa ˈtu e haafaufaa ore ia parau mai ta outou tamarii e hinaaro o ˈna e pohe.

 Ia parau mai o ˈna e ua feruri aˈena o ˈna i te haapohe ia ˈna, e nehenehe outou e ani: “Ua feruri aˈena oe afea e e nafea oe e na reira ˈi?” Na ta ˈna pahonoraa e faaite mai e mea ino anei to ˈna tupuraa aore ra aita.

 “Ei metua, e taiâ rii tatou i te ui atu i ta tatou mau tamarii no te mea te riaria nei tatou i ta ratou e pahono mai. Tera râ, e faaite mai ta ratou mau pahonoraa eaha to roto i to ratou aau, mea au aˈe ïa ia tauaparau no nia i te reira.”—Sandra.

 Aratairaa Bibilia: “E au te manaˈo o te taata i te pape hohonu, na te taata haroˈaroˈa râ e huti mai i te reira.”—Maseli 20:5.

•  ● Ma te here, a tamata i te ite eaha to roto i to ˈna aau. Na mua roa, a haamauruuru ia ˈna no to ˈna faaiteraa mai i te parau mau. E nehenehe atoa outou e parau: “Hinaaro vau ia faatia mai oe eaha ta oe e faaruru ra. Eaha mau na tei tupu?” aore ra “Nehenehe anei oe e faataa mai eaha to oe huru i mua i tera tupuraa?”

   A faaroo maite i te pahonoraa a ta outou tamarii. Eiaha e haava ia ˈna aore ra e imi oioi i te mau ravea no te faaafaro i to ˈna fifi.

   Aratairaa Bibilia: “Ia ineine te taata atoa i te faaroo e tia ˈi, eiaha e ru i te paraparau, eiaha e ru i te riri.”—Iakobo 1:19.

•  ● A haamau i te hoê porotarama no te tauturu i ta outou tamarii. A tauturu i ta outou tamarii ia ite e ia papai i to muri nei mau manaˈo:

   Te mau tapao faaararaa. Eaha te mau tupuraa aore ra manaˈo e turai ra ia ˈna ia hinaaro e haapohe ia ˈna?

   Te mau ohipa. Eaha te tahi mau ohipa o te nehenehe e tamarû i to ˈna aau e feruriraa?

   Te mau hoa. E hoa anei ta to outou tamarii ta ˈna e nehenehe e turui atu no te ani i te tauturu? E nehenehe atoa outou, te tahi atu taata paari aore ra te hoê taote e tauturu ia ˈna. E nehenehe atoa te hoê taatiraa e haapao ra i te feia e hinaaro e haapohe ia ratou e tauturu ia outou.

   Aratairaa Bibilia: “E manuïa iho â te mau opuaraa a te taata itoito.”—Maseli 21:5.

•  ● A vai ara. A tamau i te vai ara noa ˈtu e au ra e ua maitai mai ta outou tamarii.

   “I to ta ˈu tamaiti parauraa mai eita faahou o ˈna e hinaaro e haapohe ia ˈna, ua manaˈo vau e ua oti ïa tera tupuraa. Hape mau! E nehenehe te hoê taata e topa faahou i roto i teie herepata e e hinaaro e haapohe ia ˈna. E nehenehe te reira e tupu taue noa mai.”—Daniel.

   A tauturu i ta outou tamarii ia taa i te parau mau no nia i te mau huru aau: Eita te reira e vai noa mai. Te na ô ra te hoê buka The Whole-Brain Child: “E au te reira i te huru o te reva. Ia topa anaˈe te uâ, mea maamaa ia faaea noa i raro aˈe i te uâ, ma te manaˈo e aita te uâ e topa ra. Tera râ, mea maamaa roa ˈtu ïa, ia manaˈo e aita te mahana e fa mai i muri iho.”

•  ● A tamahanahana: A faaite i ta outou tamarii e mea here na outou ia ˈna e e nehenehe o ˈna e turui i nia ia outou. A parau roa ˈtu: “E rave au i te mau mea atoa no te tauturu ia oe no te faaruru i teie tupuraa.”

   Aratairaa Bibilia: “E faaite te hoê hoa mau i te here i te mau taime atoa e e taeae oia tei fanauhia no te taime ahoaho.”—Maseli 17:17.