Ua haamata o Ed e ta ˈna vahine o Jennie i te poro na roto i te niuniu paraparau i 2010. a Ua na ô râ Jennie: “Aita vau i au noa ˈˈe, ua parau vau i ta ˈu tane eita vau e hinaaro e poro faahou na roto i tera ravea.” Aita atoa o Ed i au i tera huru pororaa. Te na ô ra oia: “O vau noa hoi eita vau e au ia niuniu mai te tahi taata no te hoohoo haere i te taoˈa, eaha ˈtu â ïa te huru o te taata ia niuniu atu vau no te poro ia ratou!”

 Tupu mai nei râ te COVID-19 e ua faaea te mau Ite no Iehova i te haere na tera e tera fare. No te auraro râ i ta Iesu faaueraa ia poro i te parau apî oaoa, ua tamau te mau Ite no Iehova i te poro na roto i te papairaa i te rata e te niuniu paraparau. (Mataio 24:14; 28:19, 20) I te hoê â taime, ua faatupuhia te mau putuputuraa atoa mai te putuputuraa no te pororaa na roto i te natirara. I te tahi putuputuraa, ua tamata â Ed i te poro na roto i te niuniu paraparau noa ˈtu e ere i te mea ohie no ˈna. Eaha to ˈna huru i tera taime? Te pahono ra oia: “Ua taiâ roa vau! Ua ani au i te tauturu na roto i te pure e niuniu atura vau.” Pahono mai nei o Tyrone. b

 Te ora ra o Tyrone e ta ˈna vahine o Edith i te tuhaa fenua Kentucky i Marite. E 83 matahiti to Tyrone e ua mohimohi roa to ˈna mata. Noa ˈtu râ, ua farii oia i te hoê haapiiraa Bibilia. E taio na oia i ta ˈna buka maoti te hoê hiˈo o te faaorarahi i te mau papai e ua haamata oia i te haapii tamau i te Bibilia e o Ed maoti te niuniu paraparau.

 Fatata hoê avaˈe i muri aˈe, ua apiti mai o Tyrone e ta ˈna vahine o Edith i te mau putuputuraa a te amuiraa. I te mea râ aita ta raua e natirara, ua apiti mai raua na roto i te niuniu paraparau. Eaha te huru o Edith?

 Ia faatupu-anaˈe-hia te haapiiraa a Tyrone, e faaroo o Ed raua Jennie ia Edith ia tauturu ia Tyrone ia pahono e ia paimi i te mau irava Bibilia. Aita râ oia i paraparau noa ˈˈe ia raua. Te na ô ra Jennie: “Na roto i to ˈna reo te taahia ra e te peapea ra o ˈna, aita râ mâua Ed i ite noa ˈˈe no te aha.”

 I te hoê mahana, ua hinaaro Jennie e paraparau ia Edith. I te taime tano, ua ani oia ia Ed i te niuniu e ua na ô atu: “Tyrone, te faaroo ra vau i te reo o ta oe vahine. Hinaaro noa vau e ani ia ˈna ia taio mai te hoê irava Bibilia e ia horoa mai to ˈna manaˈo.”

 Aita o Edith i pahono oioi mai. I muri mai râ, ma te reo mârû ua parau mai o Edith: “Ua hinaaro iho â vau e paraparau ia oe, e Ite no Iehova vau. Aita râ vau i haere faahou i te putuputuraa a 40 matahiti i teie nei.”

 Ua hitimahuta roa o Jennie e na ô atura: “E tuahine ïa oe no ˈu!” E taˈi atura raua.

 I muri mai, ua horoa o Ed ia Edith i te buka rairai A hoˈi mai ia Iehova ra. I te mau hebedoma i muri iho, ua tapao o Ed raua Jennie i te tahi tauiraa i nia ia Edith. Te na ô ra o Ed: “I te omuaraa, e faaroohia te peapea i roto i to ˈna reo, area i teie nei, te itehia ra te oaoa.” Ua maitai faahou mai Edith i te pae varua e ua riro faahou mai ei taata poro oaoa. Ua bapetizohia ta ˈna tane ei Ite no Iehova i Tiurai 2022.

 Ia feruri o Ed i to ˈna manaˈo na mua ˈˈe no nia i te pororaa na roto i te niuniu paraparau, e haamanaˈo atoa oia i ta ˈna aparauraa e o Tyrone. Ua taio o Ed i te Ioane 6:44 e ua faataa oia e na Iehova e aratai mai i te taata ia ˈna ra. E tera iho â ta Tyrone i hinaaro, no reira oia i parau ai: “Ua tiai noa vau ia niuniu mai te mau Ite no Iehova.” Ua oaoa roa atoa o Jennie ua faaitoito o ˈna e ta ˈna tane i te poro na roto i te niuniu paraparau. Te na ô ra oia: “E haamaitai iho â Iehova i ta tatou mau tutavaraa.”