E Ite no Iehova Ong-Li e ora ra i Bulgarie. Te faatere ra oia i te haapiiraa a te tahi vahine apî o Zlatka, aita râ te tane a Zlatka e haapii ra i te Bibilia. Te faatia ra Ong-Li: “I roto i ta mâua aparauraa no nia i te oraraa utuafare, ua faataa maitai au i te faufaaraa ia parau i to tatou hoa faaipoipo e i ta tatou mau tamarii mea here na tatou ia ratou.” Hiˈo mai nei Zlatka ia ˈu ma te peapea, parau mai nei oia aita o ˈna i parau aˈenei i ta ˈna tane aore ra i ta ˈna tamahine e iva matahiti mea here na ˈna ia raua.

 Ua faataa Zlatka: “E nehenehe au e rave i te mau mea atoa no raua, tena râ mau parau, eita e haere ia ˈu ia parau!” Ua na ô â oia: “Aita to ˈu mama i parau aˈenei ia ˈu mea here na ˈna ia ˈu. E aita atoa hoi to ˈu mama ruau i parau aˈenei i to ˈu mama mea here na ˈna ia ˈna!” Ua faaite râ Ong-Li ia Zlatka i te hiˈoraa o Iehova o tei parau tia roa ˈtu mea here na ˈna ia Iesu. (Mataio 3:17) Ua faaitoito oia ia Zlatka ia pure ia Iehova e ia haamau i te fa ia parau roa i ta ˈna tane e i ta ˈna tamahine mea here na ˈna ia raua.

 Te na ô ra Ong-Li: “E piti mahana i muri iho, parau mai nei Zlatka ma te oaoa ua pure o ˈna ia Iehova no te ani i te tauturu. I te hoˈiraa mai ta ˈna tane i te fare, ua parau atu oia na roto i ta ˈna haapiiraa ua ite oia i te faufaaraa no te hoê vahine ia faatura e ia here i ta ˈna tane. Ua faaea rii oia maa taime, e i muri iho, ua parau roa ˈtu oia mea here roa na ˈna i ta ˈna tane. I te hoˈiraa mai ta ˈna tamahine i te fare, ua haru Zlatka i ta ˈna tamahine e ua parau roa ˈtu mea here na ˈna ia ˈna. Na ô mai nei Zlatka: ‘Mâmâ roa to ˈu aau i teie nei! Tera rahiraa matahiti, aita i haere ia ˈu ia faaite i to ˈu mau manaˈo hohonu. Maoti râ te tauturu a Iehova, ua nehenehe au e faaite i to ˈu here i to ˈu utuafare!’”

 Te na ô faahou ra Ong-Li: “Hoê hebedoma i muri aˈe, ua farerei au i te tane a Zlatka o tei parau: ‘E rave rahi taata tei parau mai eiaha Zlatka ia haapii i te Bibilia na muri ia oe, ua ite râ vau ua hopoi mai ta ˈna haapiiraa Bibilia i te maitai no to matou utuafare. Mea oaoa e mea piri aˈe matou i teie nei!’”