E Ite no Iehova o Daiane e e pionie tamau o ˈna i Beresilia. I te hoê mahana, ua poro oia na roto i te niuniu paraparau i na hoa faaipoipo apî o tei anaanatae. Ua parau raua ia Daiane e e haere raua e faaea i roto i te hoê oire iti moˈemoˈe, aita e uira e natirara i ǒ. Aita atoa e Ite no Iehova i tera vahi. Ua horoa raua i te numera o te piha niuniu paraparau o tera oire ia nehenehe ratou e tamau i ta ratou aparauraa Bibilia. Ua faaoti ïa ratou te mahana e te hora e vata ˈi ratou.

 I te taime faataahia, ua niuniu Daiane i te piha niuniu paraparau e ua pahono na hoa faaipoipo. I te roaraa o na hebedoma e piti, ua paraparau Daiane ia raua e toru taime.

 I muri iho râ, aita raua i pahono faahou. Noa ˈtu râ, aita o Daiane e faaea i te taniuniu e toru taime i te hebedoma, e ua poro o ˈna i te taata o tei pahono mai. Maoti te reira, ua haamata ïa Daiane i te tahi mau haapiiraa Bibilia i roto i tera oire iti.

 I te hoê mahana, a faatere ai Daiane e ta ˈna tane i te haapiiraa Bibilia a te hoê taata apî maoti te piha niuniu paraparau, ua faarooroo te tia haapaoraa i ta ratou aparauraa e ua tapiri maira o ˈna no te faaroo atu â. I muri iho, ua ani aˈera o ˈna ia paraparau ia Daiane e ta ˈna tane. Ua anaanatae roa hoi o ˈna i ta ˈna i faaroo e ua hinaaro atoa o ˈna e haapii i te Bibilia!

 I te pae hopea, e ono haapiiraa Bibilia ta Daiane e ta ˈna tane i faatere na roto i te niuniu, tei roto atoa te tia haapaoraa. E piti piahi tei apiti mai i te mau putuputuraa Kerisetiano maoti teie piha niuniu paraparau. Ua hamani roa te tahi piahi i te hoê parahiraa i tera vahi no ta ratou mau haapiiraa Bibilia.

 Ua mauruuru Daiane e ta ˈna tane i te poro i te parau apî oaoa o te Faatereraa arii a te Atua i roto i teie oire iti. Te parau ra Daiane: “E nehenehe iho â Iehova e rave te tia ia rave no te faaite i te parau apî oaoa i te mau taata atoa, noa ˈtu te ora ra ratou i te hoê vahi moˈemoˈe.”