Te ora ra Irma i Heremani, fatata to ˈna e 90 matahiti. Ua topa oia e piti taime e ua titauhia ia tâpûhia o ˈna. Eita ˈtu ra o ˈna e nehenehe faahou e poro i tera e tera fare mai na mua ˈˈe. Ua nafea ïa oia? E papai Irma i te rata i to ˈna fetii e i te feia ta ˈna i matau. Ua farii maitai te taata i ta Irma mau rata faaitoitoraa. E pinepine ratou i te ani ia ˈna afea o ˈna e hapono atu ai i to muri iho rata. E rave rahi atoa taata tei faatae atu i te mau rata haamauruururaa ma te ani atoa ˈtu ia ˈna ia papai faahou mai. Te na ô ra Irma: “Oaoa roa vau e te tauturu mai ra te reira ia tamau i te poro.”

 E papai atoa Irma i te rata i te feia ruhiruhia. Te faatia ra oia: “Ua niuniu mai te tahi vahine paari no te parau mai ua tamahanahana rahi mau ta ˈu rata ia ˈna i muri aˈe i te poheraa o ta ˈna tane. E faaherehere oia i te reira i roto i ta ˈna Bibilia e pinepine oia i te taio i te reira i te po. Area no te tahi atu vahine no pohe noa ˈtu ra ta ˈna tane, ua parau mai ïa ua tauturu rahi aˈe ta ˈu rata ia ˈna i te aˈoraa a te perepitero. Mea rahi ta ˈna uiraa e ua ani mai oia e nehenehe anei ta ˈna e haere mai e farerei ia ˈu.”

 Ua haere te tahi vahine ta Irma i matau e ora i te hoê vahi atea roa e ua ani mai ia Irma ia papai ia ˈna. Te na ô ra Irma: “Ua faaherehere teie vahine i te mau rata atoa ta ˈu i papai ia ˈna. I muri aˈe i to ˈna poheraa, niuniu mai nei ta ˈna tamahine e ua faaite mai oia ua taio o ˈna i te mau rata atoa ta ˈu i papai i to ˈna mama. E ua ani mai oia e farii anei au i te hapono atu i te mau rata ma te horoa ˈtu i te tahi mau manaˈo Bibilia.”

 Te oaoa nei Irma i te rave faahope roa i ta ˈna taviniraa. Te na ô ra oia: “Ua taparu vau ia Iehova ia tamau i te horoa mai i te puai no te tavini ia ˈna. Noa ˈtu eita faahou vau e nehenehe e poro i tera e tera fare, te rave nei au i te maraa ia ˈu.”