Mea tere te pereoo o Bob i tera mahana toˈetoˈe e te mataˈi i Alberta i Kanada. Fatata 100 kilometera i te hora te tere, paaina taue atura te huira aui i muri o to ˈna pereoo. I te omuaraa, aita Bob i haapao. Tamau noa ˈtura o ˈna i te tere, e pae noa hoi kilometera e toe ra no te tapae atu i to ˈna fare.

 Ua hapono Bob i te hoê rata i te Piha a te Basileia a te mau Ite no Iehova o tera vahi no te faataa i te ohipa i tupu. Ua papai oia: “E pae feia apî to roto i te hoê pereoo tei tapiri mai e tei tuu i to ratou hiˈo i raro. Ua tarape mai ratou no te faaite ua paaina to ˈu huira. Tapea ˈtura matou i te hiti e parau mai nei e taui ratou i te huira. Aita ïa vau i ite e huira taui anei e e mauhaa amo pereoo anei ta ˈu! A parahi noa ˈi au i nia i to ˈu parahiraa turairai, nee atura ratou i raro aˈe i te pereoo e itehia mai nei ia ratou te huira taui e te mauhaa. Ua taui ratou i to ˈu huira noa ˈtu e mahana toˈetoˈe e ua topa atoa te hiona! Mea nehenehe roa hoi ratou i roto i to ratou ahu! Aita râ ratou i ape mai, ua taui roa ratou i to ˈu huira e ua nehenehe faahou vau e tere! Ahani o vau anaˈe, eita e haere ia ˈu ia taui i te huira!”

 Ua papai â Bob: “Te haamauruuru nei au i na pae taurearea Ite no Iehova. Ua tere mai ratou no te poro na tera vahi. Ua faaohipa mau ratou i ta ratou i poro! Ahani aita ratou, ua fifi-roa-hia ïa vau! Te mauruuru mau nei au no ta ratou i rave! O vai i ite na te Atua i tono mai i teie mau taurearea i tera mahana i nia i to ˈu purumu?”