I 2005 i te fenua Initia, ua pohe te tane a te hoê vahine o Sowbhagya te iˈoa. Ua aupuru maitai ta ˈna tane ia ˈna e ta raua tamahine e toru matahiti o Meghana te iˈoa. I teie nei, mea fifi no Sowbhagya ia aupuru ia raua.

 Aita i navai noa i te reira, ua patoi-atoa-hia Sowbhagya na to ˈna fetii, ua faariro ratou ia ˈna ei taata taparu, e pinepine ratou i te parau ia ˈna e mea ohipa rahi no ratou ia aupuru ia ˈna e ta ˈna tamahine. Ua imi Sowbhagya i te tamahanahanaraa ma te haere i te fare pureraa, ua vahavaha râ te taata ia ˈna no te mea e taata veve o ˈna. Ua imi o ˈna i te ohipa, aita râ i itehia mai ia ˈna.

 Ua parau Sowbhagya: “Ua oti roa vau, ua hinaaro ïa vau i te haapohe ia ˈu. Tera râ, mai te peu aita vau, e faaruru ta ˈu tamahine e rave rahi fifi. Ua faaoti ïa vau i te haapohe ia mâua.” Ma te manaˈo haafaufaa ore, haere atura Sowbhagya e hoo mai i te raau taero.

 I roto i te pereoo au auahi, ua tapiri te hoê Ite no Iehova o Elizabeth te iˈoa ia Sowbhagya no te paraparau ia ˈna. Ua faataa ˈtu o Sowbhagya aita ta ˈna e ohipa e ua tauturu Elizabeth ia ˈna ia imi mai i te hoê ohipa. Ua parau atoa ˈtu Elizabeth e te haere ra oia e faatere i te hoê haapiiraa Bibilia. Ua maere roa Sowbhagya, no te mea i roto i te tahi atu mau fare pureraa, aita o ˈna i faaroo aˈenei te parau o te feia haapii Bibilia. Ua titau manihini ïa Elizabeth ia Sowbhagya i to ˈna fare ia hinaaro oia e ite hau atu â no nia i te hoê haapiiraa Bibilia.

 I to Sowbhagya taeraa i te fare, ua opua noa oia i te haapohe ia ˈna. Tera râ, aita o Meghana i te fare, ua tiai ïa Sowbhagya i ta ˈna tamahine ia hoˈi mai no te faahope roa i ta ˈna opuaraa.

 A tiai noa ˈi i ta ˈna tamahine, ua haere oia ia Elizabeth e ua farii popou oia ia ˈna. I roto i ta raua aparauraa, ua faaite Elizabeth i te buka Eaha ta te Bibilia e haapii mau ra? No te mea aita i maoro ua pohe ta ˈna tane, ua anaanatae roa Sowbhagya i te pene “Teihea te feia pohe?“ E i tera mahana, ua farii Sowbhagya i te hoê haapiiraa Bibilia.

 Ua titau manihini Elizabeth ia Sowbhagya i te hebedoma i muri nei no te hoê tairururaa e ua farii Sowbhagya. Ua anaanatae roa o ˈna i te putuputuraa e ua hinaaro oia e riro mai ei Ite no Iehova. E i to ˈna hoˈiraa i te fare mai te tairururaa ua roaa mai ia ˈna i te hoê ohipa.

 Ua tamau Sowbhagya i te haapii i te Bibilia. I teie nei, aita o ˈna e hinaaro e pohe, ua roaa mai râ ia ˈna te tumu papu no te ora. Ua bapetizohia o ˈna e ta ˈna tamahine Meghana. I teie mahana, te tavini nei raua ei pionie tamau e te ohipa nei Meghana ei rima tauturu i te hoê o te mau piha ohipa huriraa i Initia.

 Ua mauruuru roa Sowbhagya e Meghana i to Elizabeth tapiriraa mai ia Sowbhagya i roto i te pereoo au auahi, i to ˈna faaiteraa i te anaanatae e faataaraa i te parau mau ia ˈna. Ua mauruuru mau â raua ia Iehova. Te parau nei Meghana: “Mai te peu aita mâua i ite i te parau mau ua pohe aˈena mâua. I teie nei ua oaoa roa mâua. Te tiai ru nei mâua i te farerei faahou i to ˈu papa, e ia haapii o vai Iehova e mea nafea Iehova i te faaoraraa ia mâua.”