E poro toru vareau to ratou
Te ora ra Maud i te fenua Farani e te haapao ra o ˈna i te mau piahi huma i te fare haapiiraa. I roto i te hoê piha haapiiraa, te haapii ra te mau tamarii no nia i te Taparahiraa a te mau Nazi e te mau aua haavîraa Nazi. Ua nirahia te tahi mau tapao i nia i te ahu o te mau mau auri e ua rau te û. Na te û e te tapao i faaite eaha te tumu ratou i tapeahia ˈi.
A faahiti ai i te poro toru vareau, ua parau te orometua: “I to ˈu manaˈo, e mahu paha ratou.” I muri iho, ua faaite Maud i te orometua e ua faaohipa te mau Nazi i te poro toru vareau no te mau Ite no Iehova. a Ua hinaaro o ˈna e horoa i te tahi mau haamaramaramaraa no nia i te reira. Ta te orometua ïa i farii e ua ani oia ia Maud ia faaite i te reira i te mau piahi.
I roto i te tahi atu piha haapiiraa, ua tauaparauhia no nia i tera tumu parau. Ua faaohipa te orometua i te hoê tapura o te faataa ra i te mau tapao e û e rave rau tuuhia i nia i te ahu o te mau mau auri. I nia iho, ua ite-maitai-hia te tapao o te mau Ite no Iehova, oia hoi te poro toru vareau. I muri aˈe, ua horoa ˈtu Maud i te tahi mau haamaramaramaraa no nia i te reira. Ta te orometua ïa i farii. Faanaho atura raua i te hoê mahana ia nehenehe Maud e paraparau i te mau piahi.
Te faaite ra Maud i te papai e te video ta ˈna i faaohipa
Ua faataa Maud 15 minuti no ta ˈna tumu parau i mua i te piha matamua, ua na ô râ te orometua: “E vaiiho vau ia oe hoê hora no te paraparau.” Ua faaite na mua Maud i te hoê video no nia i te hamani-ino-raa a te mau Nazi i nia i te mau Ite no Iehova. A faahitihia ˈi e ua faataa-ê-hia 800 tamarii Ite no Iehova e to ratou mau metua, faaea atura Maud i te video no te faatia i te aamu o na tamarii e toru o teie pǔpǔ. I muri iho, ua taio o ˈna i te rata ta te hoê taurearea Ite no Iehova i papai i 1940 i to ˈna na metua tau hora a haapohehia ˈi o ˈna e te Nazi. b No Auteteria teie taurearea e 19 matahiti to ˈna, o Gerhard Steinacher te iˈoa.
Ua na reira atoa Maud i mua i te piti o te piha. Maoti to Maud mǎtaˈu ore, i teie nei i roto i ta raua piha haapiiraa, e faahiti o na orometua e piti e ua hamani-ino-atoa-hia te mau Ite no Iehova i roto i te mau aua haavîraa Nazi.
a I te roaraa o te piti o te Tamaˈi rahi, ua tapeahia te mau Ite no Iehova, pii-atoa-hia Bibelforscher (Feia haapii Bibilia) i Heremani no te mea aita ratou i turu i te faatereraa Nazi.
b Ua faautua-pohe-hia o Gerhard Steinacher no te mea aita o ˈna i hinaaro e faaô i roto i te nuu Heremani. Teie ta ˈna i papai i roto i ta ˈna rata: “E tamarii noa â vau. Maoti noa râ te puai ta te Fatu e horoa mai e mau papu ai au, o ta ˈu ïa e ani ia ˈna.” I te mahana i muri iho, ua haapohehia Gerhard. Teie tei papaihia i nia i to ˈna menema: “Ua pohe o ˈna no te faahanahana i te Atua.”
E au atoa outou . . .
UIRAA A TE TAATA
Eaha ta te mau Ite no Iehova i faaruru i te tau o te Taparahiraa a te mau Nazi?
E maere paha outou a ite ai i te pahonoraa.
TE PAHONO RA TE BIBILIA
No te aha te Atua i vaiiho ai ia tupu te Taparahiraa a te mau Nazi?
E rave rahi taata o te ani nei no te aha te hoê Atua î i te here e vaiiho ai i te mauiui. Te vai ra te mau pahonoraa papu i roto i te Bibilia!