“O Rachel to ˈu iˈoa, ua fanauhia vau i roto i te hoê utuafare o tei tavini ia Iehova. I teie nei, te ora nei au i te Repupirita Dominicaine. I te hituraa râ o to ˈu matahiti, ua faaea to ˈu papa i te apiti e te nunaa o Iehova e ua riro mai oia ei taata o tei patoi uˈana i te parau mau. Ei hiˈoraa, ua tamata o ˈna i te peta ia ˈu na roto i te tahi mau taoˈa ta ˈna e nehenehe e horoa mai, mai te peu e faaea vau i te tavini ia Iehova: Te hoê matini afaifai anei, te hoê tere i Disneyland aore ra te hoê tareta moni! I te tahi taime, e tupai roa o ˈna ia ˈu. Ua manaˈo o ˈna e, mai te peu eita vau e nehenehe faahou e paraparau e e hahaere, eita ïa vau e tae i te mau putuputuraa. Aita râ i manuïa, aita te reira i faaaueue ia ˈu, ua tae noa iho â vau i te mau putuputuraa!

 Eita o papa e tupai ia ˈu i mua ia mama. Ua parau mai oia, ia ite noa ˈtu mama te tupai roa o ˈna ia ˈu, e mauiui roa mama! No reira oia i parau ai ia ˈna, te haapiipii ra o ˈna ia ˈu ia taputô.

 Mea apî roa vau e ua riaria roa vau ia papa, aita vau i faatia ia mama i te ohipa e tupu ra, ua faaite râ vau ia Iehova. I ora na matou i te tuhaa fenua Maryland i Marite, e ururaau to muri mai i to matou fare, e i reira, te vai ra te hoê tumu raau rahi. Mea au roa na ˈu e pauma i nia iho e e faaea i nia i te tahi amaa no te paraparau ia Iehova! Ua haamahora vau i to ˈu aau ia Iehova e ua paraparau vau ia ˈna no nia i ta ˈu e rave no ˈna ia paari mai au, mai te peu iho â râ e ora mai au i teie huru oraraa! E paraparau atoa vau ia ˈna no nia i ta ˈu e rave i roto i te ao apî, te huru utuafare ta ˈu e hinaaro, te hau e te oaoa ta ˈu e fanaˈo, eita vau e mauiui e e mǎtaˈu faahou!

 I te mau taime atoa i peta e i tupai mai ai to ˈu papa, ua ite noa vau i te rima o Iehova i te tamahanahanaraa e i te haapuairaa ia ˈu! Ua tauturu mai te Atua ia ˈu ia tapea i te taiva ore e ia puai noa!

 Ua bapetizohia vau i te ahururaa o to ˈu matahiti e ua haamata vau i te taviniraa pionie e piti matahiti i muri iho. I te omuaraa, aita o papa i ite noa ˈˈe. I to ˈna râ iteraa, ua moto mai o ˈna ia ˈu e ua taa roa to ˈu taa!

 Ua parau mai vetahi mea apî roa vau no te taviniraa pionie, ua manaˈo ratou e ohipa hauti noa paha tera no ˈu! I te roaraa o te tau, mea rahi te feia apî ta ˈu i matau tei atea ê ia Iehova, e haere na ratou e arearea e e faaanaanatae. Ia hiˈohia ˈtu, e au ra e mea au roa! I te tahi taime, ua hinaaro atoa vau e rave mai ia ratou. I na ô na vau: E hoa Rachel, aita e fifi ia haere atoa oe e faaanaanatae mai ia ratou! I te mau taime râ e na reira ˈi au i te manaˈo, e paraparau vau ia Iehova.

 I te 15raa o to ˈu matahiti, ua pûpûhia mai te hoê ohipa aufau-maitai-hia i roto i te hoê pu rahi e te tuiroo i te oire o Milan i Italia. Mea au iho â ïa ia parauhia mai, e riro oe ei purotu tuiroo, e itehia to oe hohoˈa i roto i te mau buka e e oomo oe i te ahu moni rahi! A toru atura ïa matahiti au i roto i te taviniraa pionie tamau. Ua ô mai te manaˈo, e nehenehe teie ohipa e aufau i ta ˈu mau haamâuˈaraa e e tauturu mai te reira ia faaea maoro i roto i te taviniraa pionie. Hau atu â, ua faarue mai papa ia mâua mama, e tauturuhia ïa mama i roto i ta ˈna mau haamâuˈaraa.

 Ua paraparau vau ia Iehova no nia i te reira, ua faaite atoa vau ia mama o tei tavini atoa na ei pionie e rave rahi matahiti. E ua paraparau atoa vau i te hoê matahiapo î i te here. E mai ta ˈu i matau, ua haere atoa vau i te tumu raau rahi i muri mai i to matou fare no te pure atu â ia Iehova. Ua pahono mai Iehova i ta ˈu mau pure na roto i te hoê irava ta te tahi matahiapo i horoa mai, Koheleta 5:4 o te na ô ra: ‘I te mau taime atoa e euhe ai oe i te Atua, eiaha e haamaoro i te haapao i te reira. . . . Ta oe i euhe, a haapao.’ Ua euhe au i te tavini ia Iehova ma te aau atoa, e aita vau i hinaaro e vaiiho i teie ohipa ia faaatea ê ia Iehova. No reira, aita vau i farii i te reira.

 Ua ora mai au noa ˈtu te huru oraraa fifi mau ta ˈu i faaruru mai. I teie mahana, mea oaoa roa vau e ta ˈu tane o Jaser e ta mâua tamaiti e iva matahiti o Connor. E matahiapo o Jaser e e taata poro bapetizo-ore-hia o Connor. Fatata 27 matahiti au i roto i te taviniraa taime taatoa.

 Pinepine au i te feruri i te mau taime i paraparau maoro ai au ia Iehova i nia i te tumu raau rahi i muri mai i to matou fare. Ua taparu vau ia Iehova ia tauturu mai ia ˈu e ua na reira iho â o ˈna ma te faahiahia mau! Ua haapuai, ua tamahanahana e ua aratai oia ia ˈu. I te roaraa o to ˈu oraraa, ua faaite noa mai Iehova i tera e tera mahana e Metua faahiahia mau o ˈna! Oaoa roa vau i te tavini ia ˈna ma to ˈu aau atoa, tera te faaotiraa maitai roa ˈˈe ta ˈu i rave!”