“Ia hinaaro noa ˈtu â oe e haapii no nia i te Atua, a pee atu i te mau Ite no Iehova.” Ua maere roa vau i tera parau. I tera tau, ua haapii au na muri i te mau Ite no Iehova maa taime iti. No te taa maitai no te aha vau i maere ai, e faatia ˈtu vau ia outou to ˈu aamu.

 Ua fanauhia vau i Quezaltepeque, i te hoê oire no te fenua El Salvador. O vau te onoraa i roto i na ahuru ma pae matou tamarii. Ua haapii mai to ˈu nau metua ia ˈu ia riro ei taata maitai e ia auraro i te ture. Te tahi taime, e haere mai o Leonardo e te mau Ite no Iehova e haapii ia matou no nia i te Bibilia. Aita râ vau e tâuˈa ra i ta ˈu haapiiraa, a rave noa ˈi te faaotiraa tano ore. I te 14raa o to ˈu matahiti, haamata ˈtura vau i te inu i te ava e i te rave i te avaava taero na muri to ˈu mau hoa haapiiraa. Ua faarue pauroa ratou i te fare haapiiraa, no te faaô atu i roto i te hoê pŭpŭ taata ohipa ino. E pee atura vau na muri ia ratou. E taparu matou te moni e eiâ no te haamâha to matou hinaaro na roto i te mau aroa, i te mau mahana atoa.

 Riro mai nei teie pŭpŭ taata ohipa ino ei utuafare no ˈu. Manaˈoraa ïa vau, e horeo ia vai taiva ore noa i te pŭpŭ. I te hoê mahana, ua faahuehue hoê mero o te pŭpŭ i te hoê taata. Ua roaa râ i tera taata ia tapeapea i to ˈu hoa e niuniu atura i te mutoi. No to ˈu riri, ua vavahi au i te pereoo o tera taata ma te manaˈo e tuu o ˈna i to ˈu hoa. Ua taparu mai nei tera taata ia faaea vau i te tuparari i te mau hiˈo e te pereoo taatoa. Aita râ vau i faaea.

 I te 18raa o to ˈu matahiti, ua faaû matou i te mutoi. Te haamata ra vau i te taora i te hoê tupita, a haruru ai i roto i to ˈu rima. Aita vau e taa no te aha. Ta ˈu noa i ite, ua mahaehae to ˈu rima e matapoirihia ˈtura vau. I to ˈu araraa mai i te fare maˈi, ite atura vau aita to ˈu e rima atau faahou, turi te taria atau e ua po to ˈu mata atau.

 Noa ˈtu teie mau pepe, ia ˈu i matara mai i rapae i te fare maˈi, ua hoˈi faahou vau i roto i tera pŭpŭ taata ohipa ino. Aita râ i maoro i muri iho, haruhia vau e te mutoi. E tapeahia ˈtura i roto i te fare auri. I tera taime, puai faahou to matou auhoaraa e to ˈu mau hoa. Matou noa i te mau mahana atoa, mai te taime poipoi, puhipuhi noa ˈi te avaava taero e tae roa ˈtu i te tuiraa po.

 I te fare tapearaa, ua haere mai o Leonardo e farerei ia ˈu. A paraparau noa ˈi maua, ui mai nei o ˈna: “Ua ite anei oe, eaha te auraa o teie tatau?” Pahono atura vau: “E. Te ohipa faufau, te raau taero e te rock and roll.” Parau mai nei ra o Leonardo: “No ˈu, te auraa ïa e fare maˈi, e fare tapearaa e te pohe! Oti te fare mai, tei te fare tapearaa oe i teie nei! Ua ite ihoa oe eaha to muri mai!”

 Ua putapû roa vau i te parau a Leonardo. Ua tano roa hoi o ˈna. Te heru noa nei hoi au i to ˈu apoo. Ua faanaho Leonardo i te taime ia haapii maua i te Bibilia, o ta ˈu ïa i farii. Ua turai mai te reira ia ˈu ia taui i to ˈu oraraa. Te parau nei hoi te Bibilia: “E ino te haerea maitai i te amuimuiraa i te feia iino.” (Korinetia 1, 15:33, nota) Te auraa ïa, te ohipa matamua tei titauhia ia ˈu ia rave o te imiraa i te hoa apî. Ua faaea roa vau i te amuimui i te feia ohipa iino. Ua haamata râ vau i te apiti i te mau putuputuraa a te mau Ite no Iehova faanahohia i te fare tapearaa.I ŏ, ua farerei au ia Andrés, hoê mau auri tei riro ei Ite no Iehova i roto i te fare tapearaa. Pinepine maua i te taofe i te mau poipoi atoa. Mai reira mai, faaea roa ˈtura vau i te puhipuhi i te marijuana. E paraparau ra maua Andrés no nia i te hoê irava Bibilia.

 Ua ite maitai te mau mero o to ˈu pŭpŭ taata ohipa ino i to ˈu tauiraa. I hinaaro roa ˈi te hoê raatira o te pŭpŭ e paraparau ia ˈu. Ua mǎtaˈu vau no te ite ore eaha te tupu i muri mai. E ere i te mea ohie ia faarue i te pŭpŭ. Parau mai nei ia ˈu: “Aita faahou oe e apiti nei i ta matou mau putuputuraa. Te apiti ra râ oe, i ta te mau Ite no Iehova. Eaha ta oe e opua nei?” Ua pahono vau e, te hinaaro nei au e tamau i te haapii i te Bibilia e i te taui i to ˈu oraraa. Ma te maere, ua parau mai nei o ˈna ia ˈu e, e faatura mai te pŭpŭ ia ˈu, a tamau noa ˈi au i te faaite e e hinaaro ihoa vau e riro ei Ite no Iehova. Ua parau faahou mai: “Ia hinaaro noa ˈtu â oe e haapii no nia i te Atua, a pee atu i te mau Ite no Iehova. Te tiaturi nei matou e, e faaea oe i te rave i te ohipa ino. Haapopou nei au ia oe. Tei nia oe i te eˈa maitai. E nehenehe ihoa te mau Ite no Iehova e tauturu ia oe. Ua haapii au na muri ia ratou i Marite e e Ite no Iehova vetahi o to ˈu mau fetii utuafare. Eiaha e mǎtaˈu, a faaitoito.” Ua mǎtaˈu ihoa ïa vau. I tera râ taime, ua oaoa atoa vau. Ua haamauruuru vau ia Iehova i roto ia ˈu. E au atura ïa vau i te hoê manu tei tuuhia ˈtu e ua taa ia ˈu ta Iesu mau parau: “E ite outou i te parau mau e na te parau mau e faatiamâ ia outou.”—Ioane 8:32.

 Ua tamata râ vetahi o to ˈu mau hoa tahito ia rave faahou vau i te raau taero. Ua hema ihoa vau i te tahi mau taime. I muri aˈe râ, maoti te pure hohonu, ua nehenehe au e faaore roa i tera peu iino.—Salamo 51:10, 11.

 Rave rahi tei manaˈo e, i to ˈu matararaa mai i te fare tapearaa, e hoˈi faahou â vau i to ˈu oraraa tahito. Aita roa ˈtu râ. Ua hoˈi noa vau i te fare tapearaa no te faaite i te mau taata mau auri i ta ˈu i haapii i roto i te Bibilia. Papu roa ˈtu ra i to ˈu mau hoa tahito i to ˈu tauiraa, aita râ no te mau pŭpŭ enemi.

 I te hoê mahana, te poro ra vau e te hoê taeae, ua haaatihia maua e te hoê pŭpŭ taata ohipa ino enemi. E pupuhi ta ratou. Ua hinaaro ratou e haapohe ia ˈu. Ua faataa te taeae ia ratou ma te tura e te itoito, aita faahou vau i roto i te pŭpŭ taata ohipa ino. O vau râ i tera taime, ua faaea hau noa ïa. I muri mai i to ratou taparahiraa ia ˈu, ua parau roa mai ratou: “Eiaha e hoˈi faahou mai i ŏ nei!” E tuu atura ia maua. Ua taui mau te Bibilia i to ˈu oraraa. Na mua ˈˈe, taata tahoohoo roa vau. Teie nei râ, e pee au i te faaueraa Bibilia i roto i te Tesalonia 1, 5:15: “A ara eiaha te tahi ia tahoo i te tahi i te ino, ia tapi noa râ outou i te mea maitai no te tahi e te tahi, e te taata atoa.”

 Ei Ite no Iehova i teie nei, ua tutava noa vau no te riro ei taata maitai. E ere i te mea ohie. Maoti râ te tauturu a Iehova, te mau aˈoraa no roto mai i te Bibilia e te turu a te mau taeae e tuahine, ua raea ia ˈu tera fa. Aita roa vau e hinaaro faahou e hoˈi i to ˈu oraraa na mua ˈˈe.—Petero 2, 2:22.

 Na mua ˈˈe, e taata ino mau vau e te riri hanoa. Papu ia ˈu ahani au i tamau noa mai te reira, ua pohe aˈe na vau. Ua taui roa vau maoti ta ˈu i haapii i roto i te Bibilia. Ua faaore roa vau i te mau peu iino. Ua haapii au i te faaea hau noa e to ˈu mau enemi. (Luka 6:27) Te tauturu ra to ˈu mau hoa ia ˈu ia faatupu i te mau huru maitatai. (Maseli 13:20) E fa to to ˈu oraraa. Te oaoa nei au i te tavini i te hoê Atua tei faaore i to ˈu mau hara atoa.—Isaia 1:18.

 I 2006, ua haere au i te hoê haapiiraa Bibilia no te mau taeae taa noa. Tau matahiti i muri mai, ua faaipoipo vau e e tamahine ta maua ta ˈu vahine. Te horoa nei au i to ˈu taime no te haapii ia vetahi ê te mau faaueraa Bibilia tei tauturu mai ia ˈu. E matahiapo atoa vau i roto i ta ˈu amuiraa. E te tauturu nei au i te feia apî eiaha e pee i te eˈa ta ˈu i rave i to ˈu apîraa. I teie mahana, ua taui roa to ˈu oraraa. Inaha te patu nei au i to ˈu ananahi i nia i te mau parau fafau a te Atua e vai ra i roto i te Bibilia.