Ua paari au ei Katolika i Rochester, New York. E vaˈu matahiti to ˈu a faataa ê ai to ˈu na metua. Ua ora ïa vau e to ˈu mama i te hebedoma i roto i te hoê fare tahua no te feia veve e i te hopea hebedoma e to ˈu papa i te hoê vahi maitai aˈe. E ere roa ˈtu i te mea ohie no mama ia faatamaa i ta ˈna na tamarii e ono. No reira o to ˈu hinaaro iti rahi ia monihia to ˈu utuafare.

 Ua hinaaro to ˈu papa ia manuïa vau i roto i te oraraa. Ua faanaho ïa o ˈna ia haere au e hiˈo i te hoê haapiiraa roo maitai no te ohipa hotera. Ua au vau i te reira e ua haere au i tera haapiiraa. No ˈu, te pahono ra te Atua i ta ˈu mau pure ia monihia e ia oaoa vau. E pae matahiti i te maoro, ua haapii au e nafea ia tiaau i te hoê hotera i te pae o te ohipa, te ture e te moni. E i te hoê â taime ua ohipa vau i te hoê hotera e pere moni atoa to roto i Las Vegas, Nevada.

 E 22 matahiti to ˈu a riro mai ai ei taata tauturu i te mono peretiteni o te hoê hotera e pere moni to roto. E hiˈohia vau mai te hoê taata moni e te manuïa, e pinepine vau i te fanaˈo i te maa maitai roa ˈˈe e te uaina e te ava puai moni roa ˈˈe. Parau mai to ˈu mau hoa ohipa: “A haamanaˈo o te moni te mea faufaa roa ˈˈe i te ao nei.” No ratou, maoti te moni e itehia ˈi te oaoa mau.

 I te ohipa, na ˈu e haapao i te mau hinaaro atoa o te feia moni o te haere mai i Las Vegas no te hauti i te pere moni. Noa ˈtu mea moni ratou, e au ra e aita ratou i oaoa. Haamata atoa atura vau i te ore e oaoa faahou. Inaha, pue noa ˈtu â ta ˈu moni, pue noa ˈtu â to ˈu ahoaho e aita vau i taoto rahi faahou i te po. Ua feruri au e haapohe ia ˈu. No to ˈu inoino i to ˈu huru oraraa, ua huri au i te Atua ra no te ani ia ˈna: “Ihea vau e nehenehe ai e ite i te oaoa mau?”

 I tera tau, e piti o to ˈu nau tuahine tei riro mai ei Ite no Iehova tei haere mai i Las Vegas. Noa ˈtu aita vau i farii i ta raua mau papai, ua farii au i te taio i ta ˈu iho Bibilia e o raua. I roto i ta ˈu Bibilia, ua neneihia te mau parau a Iesu e te ǔ uteute. I te mea e ua farii au i te mau parau atoa a Iesu, ua paraparau noa mai ïa to ˈu na tuahine no nia ia Iesu. Ua taio atoa vau i te Bibilia o vau anaˈe.

 Ua maere au i te mea e rave rahi ta ˈu i taio. Ei hiˈoraa, ua parau Iesu: “Ia pure oe, eiaha e tahana i te parau mai ta te feia o te mau nunaa ěê. Te manaˈo ra hoi ratou e no te rahi o te parau e faaroo ai te Atua ia ratou.” (Mataio 6:7) Inaha, ua horoa mai te hoê perepitero i te hoê hohoˈa o Iesu e ua parau mai ia pure i te hohoˈa ma te faahiti ahuru Pure a te Fatu e ahuru Ave Maria. Parau mai o ˈna e i reira te Atua e horoa mai ai i te rahiraa moni ta ˈu e hinaaro. Tera râ, ma te na nia iho e te na nia iho noa, aita anei au e tahana ra i te parau? Ua taio atoa vau i teie mau parau a Iesu: “Eiaha atoa e parau i te taata o te fenua nei e metua no outou, hoê anaˈe hoi Metua to outou, tei te raˈi ïa.” (Mataio 23:9) Ua uiui atoa ïa vau: “No te aha vau e to ˈu mau hoa Katolika e pii ai i ta matou mau perepitero ‘Metua’?”

 Ua haamata vau i te feruri maitai i to ˈu oraraa a taio ai i te buka Bibilia a Iakobo. I te pene 4, ua papai Iakobo: “Aita anei outou i ite e te faahoaraa i to teie nei ao, e enemiraa ïa e te Atua? No reira, te taata e hinaaro ra e riro ei hoa no teie nei ao, te faariro ra ïa ia ˈna iho ei enemi no te Atua.” (Iakobo 4:4) Ua oti roa atoa vau a taio ai i te irava 17: “Ia ite te tahi taata eaha te mea maitai ia rave e aita râ e rave ra, te hara ra ïa oia.” Taniuniu atura vau i to ˈu na tuahine no te faaite e te faarue ra vau i te tapihaa o te pere moni no te mea te apiti ra vau i te mau mea ta ˈu e ore e farii faahou, oia hoi te pere moni e te nounou.

 Ua hinaaro vau e piri atu â i te Atua, oia atoa i to ˈu na metua e taeae e tuahine. Ua faaoti ïa vau e faaohie i to ˈu oraraa ia rahi atu â to ˈu taime no ratou. E ere râ i te mea ohie. Ei hiˈoraa, ua pûpûhia mai te tiaraa rahi aˈe i roto i te tapihaa o te pere moni, te auraa ïa e tataipiti aore ra e tataitoru te tino moni e aufauhia mai. I muri iho râ i te pureraa no nia i te reira, ua faaoti au aita vau e hinaaro ra i tera huru oraraa. Ua faarue au i ta ˈu ohipa e ua tataî i te hoê tuhaa o te fare o to ˈu mama no te ora i reira. Ta ˈu ohipa apî, o te tuuraa ïa i te mau tapura no te maa a te mau fare utuutu maa i roto i te urina paari.

 Ua tauturu mai te Bibilia ia rave i te mau faaotiraa maitai aˈe i roto i te oraraa. Tera râ, aita â vau i hinaaro e haere i te mau putuputuraa a te mau Ite no Iehova. Ua ani mai to ˈu na tuahine no te aha vau i inoino ai i te mau Ite no Iehova. Pahono atura vau: “No te mea e faataa ê to outou Atua ra o Iehova i te mau utuafare. Te taime noa e amui ai te utuafare, tei te Noela ïa e te mau oroa fanauraa, e aita orua e faatupu i tera mau oroa.” Haamata aˈera hoê o to ˈu na tuahine i te taˈi e ani mai ra: “Teihea roa oe i te tahi atu mau mahana? E vai matara noa to mâua uputa no oe. Hinaaro noa râ oe e haere mai no tera mau oroa no te mea noa e titauhia.” Putapû roa to ˈu aau e taˈi atoa atura vau.

 Te here mau ra te mau Ite no Iehova i to ratou utuafare. Ua taa ia ˈu ua hape au. Ua faaoti ïa vau e haere i te hoê putuputuraa i te Piha a te Basileia. I reira to ˈu farereiraa ia Kevin, te hoê taata haapii Bibilia aravihi, e ua haamata vau i te haapii i te Bibilia e o ˈna.

 E oraraa au noa to Kevin raua ta ˈna vahine ia nehenehe raua e faataa i te taime rahi no te tauturu i te tahi atu ia taa i te Bibilia. Ua navai atoa te moni ta raua i noaa mai no te tere i Afirika e i Marite no ropu no te tauturu ia patu i te mau piha ohipa no te mau Ite no Iehova. Mea oaoa e mea here raua ia raua. Tera te huru oraraa ta ˈu i hinaaro.

 Ua faaite mai Kevin i te hoê video no nia i te mau oaoa o te taviniraa mitionare e ua faaoti au tera ta ˈu e hinaaro e rave. I 1995, i muri iho i te haapii-tamau-raa i te Bibilia e ono avaˈe, ua bapetizohia vau ei Ite no Iehova. Aita vau i pure faahou i te Atua ia monihia vau, teie râ ta ˈu i pure: “Eiaha e tuuhia mai te veve e te taoˈa rahi ia ˈu nei.”—Maseli 30:8.

 E taata taoˈa rahi au i teie nei, i te pae varua râ eiaha i te pae materia. Ua farerei au i ta ˈu vahine here o Nuria i Honduras e ua tavini mâua ei mitionare i Panama e Mehiko. Parau mau iho â teie irava Bibilia: “Na Iehova te maitai i taoˈahia ˈi te taoˈa; e ore hoi e apiti-atoa-hia mai te ino i te reira”!—Maseli 10:22.