Ua paari au i Filelane i te oire no Tampere. Ua haafaufaa râ to ˈu utuafare i te haapiiraa e te peu maitai i to te ohipa faaroo. No Heremani to ˈu mama e i to ˈu nainairaa, e haere au e hiˈo i to ˈu papa e mama ruau i ô.

 Mai to ˈu nainairaa mai, mea au roa na ˈu te ohipa tuaro. Ua tamata vau i te mau huru tuaro. E i te ahuru ma maharaa o to ˈu matahiti, o te tairiraa popo ïa ta ˈu i au roa ˈˈe. Piti matahiti i muri mai, e faaineine au ia ˈu e piti aore ra e toru taime i te mahana, apeehia mai e piti taata faaineine. E i te pô, o vau anaˈe ïa no te haamaitai atu â. Ua au roa vau i te mau tuhaa atoa o teie tuaro, inaha ua tauturu mai tera, ia haapuai i to ˈu feruriraa. E noa ˈtu mea au na ˈu e arearea e to ˈu mau hoa e e inuinu rii i te tahi taime, aita râ vau i topa i roto i te raau taero e te inu-hua-raa i te ava. Te mea faufaa roa no ˈu o te tairiraa popo ïa.

 I te ahuru ma hituraa o to ˈu matahiti, ua faaô vau i roto i te tataˈuraa a te amuitahiraa a te feia tairi popo o te ao nei, parauhia ATP. a Ua tui to ˈu roo i Filelane. E i te piti ahuru ma pitiraa o to ˈu matahiti, ua ô vau i roto i te apaparaa o na pae ahuru feia tairi popo maitai roa ˈˈe o te ao nei.

 Ua tere au na te ao no te tataˈu. Ua mataitai au te mau vahi nehenehe. Ua ite atoa râ vau i te fifi mai te haapoheraa taata, te puhipuhiraa i te raau taero e te viivii o te fenua. No teie mau fifi, ua opanihia matou i te fenua Marite ia haere i te tahi mau vahi. Ua peapea roa ino vau. E noa ˈtu mea au na ˈu te ohipa ta ˈu e rave ra, aita vau e oaoa ra.

 Ua haamata o Sanna, to ˈu hoa vahine, i te haapii i te Bibilia na muri i te mau Ite no Iehova. Ua ata ihora vau i roto ia ˈu iho, aita râ vau i haafifi i ta ˈna haapiiraa. I 1990, ua faaipoipo maua e ua bapetizohia o ˈna ei Ite no Iehova i te matahiti i muri iho. E ere au i te taata faaroo, ua ite râ vau e te vai ra te hoê Atua. Haamanaˈo ra vau i to ˈu mama ruau. Mea taio Bibilia roa o ˈna e ua haapii atoa mai ia ˈu nafea ia pure.

 I te hoê mahana, ua farerei maua Sanna i te hoê Ite no Iehova e ta ˈna vahine. Ua faaite mai o Kari, te tane, te mau parau tohu no nia “i te mau mahana hopea” i papaihia i roto i te Bibilia. (Timoteo 2, 3:1-5) Ua maere roa vau e taa ˈtura ia ˈu no te aha mea ino te oraraa i roto i teie nei ao. Aita râ matou i faahohonu roa ˈtu. Tera râ, mai reira mai, ua haamata maua Kari i te tauaparau no nia i te Bibilia. Ua taa ˈtura ia ˈu i te auraa o te mau mea atoa. Mea varavara maua Kari i te farerei no to ˈu mau tere pinepine e ta ˈu ohipa. Aita râ o ˈna i faarue mai ia ˈu. Ua tamau noa o ˈna i te haapii mai, ma te pahono i ta ˈu mau uiraa ma te papai i te rata. Te vai ra te pahonoraa o te mau uiraa faufaa roa o te oraraa i roto i te Bibilia. E mărû noa, haamata ˈtura vau i te taa i te poroi a te Bibilia oia hoi e faatupu te Faatereraa arii o te Atua i to ˈna hinaaro. Ia ˈu i ite i te iˈoa o te Atua, Iehova, e ta ˈna i rave no tatou, ua putapû roa vau. (Salamo 83:18) Hau atu â ra, Ia ˈna i hô mai i te tusia taraehara. E ere noa i te hoê ohipa taa noa, e tapaˈo râ o to ˈna here faito ore ia tatou. (Ioane 3:16) Ua ite atoa vau e nehenehe e riro ei hoa no te Atua e e ora hau noa i roto i te hoê paradaiso i nia i te fenua nei, e a muri noa ˈtu. (Iakobo 4:8) Feruri atura vau nafea ia faaite i to ˈu mauruuru.

 Ua feruri maitai au i nia i to ˈu oraraa. Te parau ra hoi te Bibilia, e mea “rahi aˈe te oaoa ia horoa ˈtu”, hinaaro atura vau e faaite ia vetahi ê ta ˈu i haapii mai. (Ohipa 20:35) Ei maona, aita vau i te fare piti hanere mahana i te matahiti hoê. Te mea faufaa roa ˈˈe no ˈu e to ˈu utuafare: o ta ˈu toroa ïa. Ua taa ïa ia ˈu e titauhia ia rave i te tauiraa.

 Ua ite au e, faarue i tera toroa faahiahia no te ohipa faaroo, e rave rahi te ore e farii i ta ˈu faaotiraa. No ˈu râ, mea faufaa aˈe ia ite atu â no nia ia Iehova e ia fanaˈo i te ora mure ore i te mau re atoa te nehenehe e noaa mai i te tairiraa popo. Ua faaoti ïa vau i te faarue atu, ma te ore e haapao i te parau a vetahi ê. Ua faaitoito mai te hoê irava Bibilia ia ˈu ia mau papu noa ˈtu te mau faaheporaa. Tei roto i te Salamo 118:6 “Tei pihaiiho Iehova ia ˈu ra, e ore au e mǎtaˈu; eaha ta te taata ia rave mai ia ˈu ra?”

 I tera area taime, ua pupu te tahi mau taiete turu i te tino moni maitai ia tamau noa vau i te hauti ma te ore e haapeapea no a muri aˈe. Aita râ vau i fati noa ˈˈe. Ua faarue roa vau i te tataˈuraa. Ua tamau vau i te haapii i te Bibilia e i te 2 no Tiurai 1994, ua bapetizohia vau ei Ite no Iehova.

 Aita vau i imi i te parau mau, aita atoa vau i imi i te Atua i mua i te tahi tupuraa fifi. No ˈu, e oraraa maitai ta ˈu e fanaˈo nei. Maoti ra te Bibilia, ua ite au eaha te fa o te oraraa. E oraraa maitai atu â to ˈu. Mea puai aˈe to ˈu utuafare e mea hoê atu â. Ua oaoa roa vau, no te mea ua pee ta ˈu na tamaiti e toru i to ˈu hiˈoraa ma te riro ei Kerisetiano, eiaha râ ei taata tuaro.

 Te hauti noa râ vau i te tairiraa popo. I te roaraa o te mau matahiti, ua ohipa vau ei taata faaineine no teie tuaro e ei taata faatere no te hoê pû tairiraa popo. Na mua ˈˈe no te riro ei aito, e faaineine vau ia ˈu ehia hora te maoro i te hepetoma atoa. Teie nei, ei pionie tamau, te faaohipa ra vau i to ˈu taime no te tauturu ia vetahi ê ia haapii e ia faaohipa te mau aratairaa Bibilia tei taui to ˈu oraraa. To ˈu oaoaraa rahi roa ˈˈe oia hoi to ˈu auhoaraa e o Iehova, e te faaiteraa ia vetahi ê to ˈu tiaturiraa no te hoê a muri aˈe faahiahia mau.—Timoteo 1, 6:19.