Ua fanauhia vau i La Ceiba, i Honduras. O vau te tamarii hopea o na tamarii e pae, hoê anaˈe tamaroa, o vau ïa. O vau atoa anaˈe te tamarii tariˈa turi o te utuafare. Ua ora vau e to ˈu utuafare i roto i te hoê aroâ fifi mau e ua veve roa matou. Ua rahi atu â te fifi a pohe ai to ˈu metua tane i roto i te hoê ati i te vahi ohipa. E maha ïa matahiti to ˈu.

 Ua rave to ˈu mama i ta ˈna i nehenehe no te aupuru ia ˈu e i to ˈu mau tuahine. I te rahiraa râ o te taime, aita i navai i te moni no te hoo mai i te ahu no ˈu. I te taime ûa, ua toetoe roa vau no te mea aita e ahu mahanahana to ˈu.

 A paari ai au, ua haapii mai au i te reo apǎraa rima Honduras (LESHO). Maoti tera ravea, ua nehenehe au e aparau e te tahi atu mau taata tariˈa turi. Aita râ to ˈu mama e to ˈu mau tuahine i ite i te reo LESHO. I te mea e ua ite ratou i te tahi noa ˈˈe mau aparaa rima, ua haamau ïa ratou i ta ratou iho mau aparaa rima no te paraparau ia ˈu. Ua here râ to ˈu mama ia ˈu e ua paruru atoa oia ia ˈu i te mea atâta. Maoti te tahi noa mau apǎraa rima ta ˈna i ite, ua faaara oia ia ˈu i te mea ino, mai te pupuhiraa i te avaava e te inu-hua-raa i te ava. I te pae hopea, ua mauruuru roa vau ia ˈna no te mea aita vau i rave i te mau peu ino i to ˈu paariraa mai.

 I to ˈu apîraa mai, ua matau to ˈu mama i te afai ia ˈu i te ekalesia Katolika. Aita râ vau i taa i tei haapiihia no te mea aita hoê aˈe taata tei huri i te reira na roto i te reo apǎraa rima no ˈu. Ua fiu roa vau, ua faaea vau i te haere i te fare pureraa. Ahuru matahiti ïa to ˈu i taua taime ra. Ua hinaaro râ vau e ite atu â no nia i te Atua.

 I 1999, 23 ïa matahiti to ˈu, ua farerei au i te hoê vahine no te Hau Amui no Marite, e mero oia o te Ekalesia Evanelia. Ua horoa mai oia i te mau haapiiraa Bibilia e ua haapii atoa oia i te reo apǎraa rima Marite (ASL) ia ˈu. Mea au roa na ˈu e haapii mai i te Bibilia, ua riro ïa vau ei orometua. Ua haere au i Porto Rico no te fanaˈo i te faaineineraa i te hoê pû faaineineraa Kerisetiano no te mau taata tariˈa turi. I to ˈu hoˈiraa i La Ceiba i 2002, ua haamau vau i te hoê ekalesia no te feia tariˈa turi maoti te tauturu a te tahi mau hoa. O Patricia hoê o tera mau hoa, e ua riro oia ei vahine faaipoipo na ˈu.

 Ei orometua o te ekalesia, ua vauvau vau i te mau oreroraa parau na roto i te reo LESHO, ua faaite atoa vau i te tahi mau hohoˈa o te mau aamu Bibilia. Oia atoa, ua hauti vau i te mau aamu no te tauturu i te mau taata tariˈa turi ia taa. Ua haere atoa vau e farerei i te mau taata tariˈa turi i te mau oire piri no te faaitoito atu ia ratou e no te tauturu atu ia faaruru i to ratou mau fifi. Ua rave atoa vau i te hoê tere mitionare i te Hau Amui no Marite e i Zambie. Aita râ vau i ite maitai i te Bibilia. Ua faaite noa vau i ta ˈu i haapii mai e i ta ˈu i taa, maoti te mau hohoˈa. Mea rahi aˈe ta ˈu mau uiraa i ta ˈu mau pahonoraa.

 I te hoê mahana, ua haamata te tahi mau mero o te ekalesia i te haaparare i te mau parau haavare no nia ia ˈu. Ua parau ratou e e taata taero ava vau e ua taiva vau i ta ˈu vahine faaipoipo. Ua inoino roa vau a riri atu ai. Tau taime noa i muri aˈe, ua faarue mâua Patricia i tera fare pureraa.

 Mea pinepine te mau Ite no Iehova i te haere mai e farerei ia mâua Patricia, aita râ mâua i farii ia ratou. I muri aˈe râ i to mâua faarueraa i te fare pureraa, ua farii Patricia i te haapii mai i te Bibilia e na hoa faaipoipo Ite no Iehova, o Thomas e o Liccy. Ua maere roa vau i to ˈu iteraa e ua ite raua i te reo apǎraa rima, noa ˈtu e e ere raua i te taata tariˈa turi. Aita i maoro, ua apiti vau ia Patricia i ta ˈna haapiiraa Bibilia.

 Ua haapii mai mâua i te Bibilia tau avaˈe i te maoro ma te faaohipa i te mau video na roto i te reo ASL. Ua pari haavare râ te tahi o to mâua mau hoa i te mau Ite no Iehova ma te parau e ua pee noa ratou i te taata. Ua faaea ïa mâua i ta mâua haapiiraa Bibilia. Noa ˈtu e ua horoa mai Thomas i te mau haapapuraa no te faaite e aita te mau Ite no Iehova e pee i te mau aratai taata, aita vau i tiaturi ia ˈna.

 Tau avaˈe i muri aˈe, ua hepohepo rahi o Patricia. Ua pure oia i te Atua ma te ani atu ia faahoˈi mai i te mau Ite no Iehova i te fare. I muri iho, ua haere mai te hoê taata tapiri Ite no Iehova e farerei ia Patricia. Ua parau oia e e ani atu oia ia Liccy ia hoˈi mai e paraparau ia ˈna. Ua haa o Liccy mai te hoê hoa mau. Ua hoˈi mai oia e farerei ia Patricia i te mau hebedoma atoa no te faaitoito atu e no te haapii i te Bibilia e o o ˈna. Aita râ vau i tiaturi roa i te mau Ite no Iehova.

 I 2012, ua apiti te mau Ite no Iehova i te hoê opereraa taa ê no te pûpû i te video na roto i te reo LESHO, E hinaaro anei oe e ite i te parau mau? Ua afai mai Liccy i te video. A mataitai ai au i te reira, ua huru ê roa vau i te iteraa e aita i faahitihia i roto i te Bibilia, ta ˈu i matau i te haapii atu, mai te haapiiraa o te po auahi aore ra te haapiiraa e e ora ˈtu te tahi mea i roto i te taata ia pohe o ˈna.

 Te hebedoma i muri iho, ua haere au i te Piha a te Basileia a te mau Ite no Iehova no te paraparau atu ia Thomas. Ua faaite atu vau i to ˈu hinaaro e haapii atu i te mau pue parau mau Bibilia i te taata tariˈa turi, eiaha râ ei Ite no Iehova. Ua hinaaro vau e haamau i to ˈu iho fare pureraa no te feia tariˈa turi. Ua haapopou Thomas ia ˈu no to ˈu itoito rahi. Ua faaite mai râ oia i te Ephesia 4:5 o te haapapu ra i te faufaaraa ia vai tahoê i roto i te amuiraa Kerisetiano mau.

 Ua afai atoa mai Thomas i te video Les Témoins de Jéhovah—La foi en action, 1^re partie : La sortie des ténèbres na roto i te reo ASL. Ua faaite te video nafea te hoê pǔpǔ taata i hiˈopoa maite ai i te Bibilia no te taa maitai i te parau mau no nia i te mau haapiiraa tumu. A mataitai ai au i te video, ua taa maitai au i to ratou mau huru aau. Mai ia ratou, ua hinaaro vau e ite i te parau mau. Ua haapapu taua video ra ia ˈu e te haapii ra te mau Ite no Iehova i te parau mau no te mea ua niuhia ta ratou mau tiaturiraa i nia i te Bibilia anaˈe. Ua rave faahou mai au i ta ˈu haapiiraa Bibilia e i 2014, ua bapetizohia mâua Patricia ei Ite no Iehova.

 Mea au na ˈu te amuiraa a te mau Ite no Iehova no te mea, mai te Atua, mea viivii ore ratou i te pae morare. Mea viivii ore atoa te mau Ite no Iehova na roto i te parau e a haa ˈi ratou e te mau taata. E faatupu ratou i te hau a faaitoito atu ai te tahi i te tahi. Mea tahoê roa te mau Ite no Iehova e te haapii ra ratou i te hoê â mau pue parau mau Bibilia, noa ˈtu te fenua aore ra te reo.

 Ua oaoa roa vau i te haapii mai ra i ta te Bibilia e haapii mau ra. Ei hiˈoraa, ua haapii mai au e o Iehova te Atua Mana hope, te Arii hau ê i nia i te fenua nei. Te here ra oia i te taata tariˈa turi e te feia e ere i te tariˈa turi. Te poihere nei au i to te Atua here no ˈu. Ua haapii atoa vau e e riro te fenua ei paradaiso nehenehe mau e e nehenehe atoa tatou e fanaˈo i te ora mure ore e te hoê ea tia. Te tiai ru nei au ia tae mai taua mahana ra!

 Mea au na mâua Patricia ia paraparau i te tahi atu mau taata tariˈa turi no nia i te Bibilia. I teie nei, te haapii atu nei mâua i te Bibilia i te tahi mau mero o te fare pureraa ta mâua i faarue. Aita faahou e uiraa ta ˈu no nia i ta ˈu e haapii atu ra. E ere mai tera i te taime i tavini ai au ei orometua. I te pae hopea, ua pahonohia ta ˈu mau uiraa maoti ta ˈu haapiiraa Bibilia e te mau Ite no Iehova.