I te mau matahiti atoa, e tere e mau ahuru tausani taata no te mataitai i te mau fare tahua rau o te amaa no Marite e te Pu rahi a te mau Ite no Iehova i New York. E parauhia teie mau fare te Betela, hoê taˈo Hebera o “Fare o te Atua” te auraa. Mai te mau fenua atea aore ra to pihai iho noa mai, e haere te mau taata i reira no te ite e mea nafea te neneiraa o te mau papai e te faanahoraa o ta matou ohipa. E haere atoa ratou no te farerei i ta ratou mau hoa o te ohipa ra i ǒ. Aita i maoro, ua itehia hoê taata tei hinaaro rahi e rave i tera tere.

O Marcellus ïa, hoê Ite no Iehova o te ora ra i Anchorage, Alaska, Marite. A tau matahiti i teie nei, ua roohia oia i te hoê maˈi atâta, mea iti ïa te mau taˈo ta ˈna e nehenehe e parau. E haere oia na nia i te hoê parahiraa turairai e e titau oia i te tauturu no te mau ohipa o te mau mahana atoa. Noa ˈtu râ teie mau fifi, ua hinaaro rahi oia e haere e mataitai i te Betela. E tera ta ˈna i rave noa nei.

Ua parau Corey, hoê hoa o tei tauturu ia Marcellus ia faanaho i teie tere: “Aita oia i tuu. E pii noa mai oia ia ˈu no te ite eaha te mau faanahoraa hau tei ravehia. I te mea ra e e parau noa o Marcellus ‘E’ aore ra ‘Aita,’ e mea tia ia ˈu ia ani e rave rahi uiraa a pii ai oia.” Teie te huru o ta raua mau aparauraa:

“Hinaaro oe ia haere atu vau e hiˈo ia oe?”

“Aita.”

“Hinaaro oe ia pii atu vau i te taote?”

“Aita.”

“Te pii ra oe no te tere i te Betela?”

“E.”

“I muri iho, e faataa atu vau i te mau faanahoraa ta ˈu i rave no tera tere. Oaoa roa vau i te iteraa e ua naea oia i ta ˈna fa.”

Ua faaruru Marcellus e rave rahi fifi no te rave i tera tere. I te mea ra e mea iti ta ˈna moni, a piti matahiti to ˈna haaputu-noa-raa no te haere i New York, hoê tere e 5 400 kilometera i te atea. No to ˈna mau taotiaraa i te pae tino, e mea tia ia imi oia i te hoê taata apee aravihi no te tauturu ia ˈna ia haere atu. I te pae hopea, e mea tia atoa ia ani i te parau faatia a te taote no tera tere. E ua horoahia te reira tau mahana noa hou a haere ai oia na nia i te manureva.

I to Marcellus taeraa i New York, ua arataihia to ˈna tere no te mataitai i te mau fare tahua rau i Brooklyn, Patterson e Wallkill. Ua ite oia i te mau matini rarahi no te neneiraa i te mau buka aore ra Bibilia e ua taa atoa ia ˈna e mea nafea te faanahoraa o ta matou ohipa. Ua mataitai oia e piti faaiteiteraa: “Te Bibilia e te iˈoa o te Atua” e “Hoê nunaa no to Iehova iˈoa.” I te roaraa o te tere, e rave rahi taata ta ˈna i faahoa atu. Tera iho â te tere faufaa roa ˈˈe o te oraraa!

Aita e taˈo no e rave rahi no te faataa i ta ratou i ora a mataitai ai i te Betela. A ani ai râ ia Marcellus mai te peu e ua faufaahia te mau tutavaraa ta ˈna i rave no tera tere, e pahono oia mai ta ˈna e nehenehe: “E, e, e!”

E nehenehe hoê tere i te Betela e faaitoito ia oe e to oe utuafare, mai ia Marcellus. E farii-popou-hia te feia atoa o te hinaaro e mataitai i ta matou mau amaa na te ao nei. E haere mai atoa oe?