I te Mahana maa 1 no Mati 2014, mea na roto i te oaoa rahi i putuputu ai 823 taata i te Piha tairururaa a te mau Ite no Iehova i te oire o Bénin. E tupuraa faufaa roa te reira i Nigeria. Mai 1999 mai â, ua faanahohia te paturaa o te mau Piha a te Basileia i te fenua mea veve to tatou mau taeae. I Nigeria, ua patuhia e 3 000 Piha a te Basileia.

I taua putuputuraa ra, ua haamanaˈo-poto-hia te ohipa tei ravehia mai 1920 mai â ia nehenehe te mau amuiraa i Nigeria e putuputu mai. I faaohipahia na te fare o te tahi taata aore ra te mau piha tarahuhia no te mau putuputuraa. Te vahi matamua faaohipa-noa-hia no te mau putuputuraa a te mau Ite no Iehova no Nigeria, e piha ïa tei patuhia i te oire i Ilesa i 1935. Mai 1938 e tae atu i 1990, ua tataihia te numera o te mau amuiraa e 200 taime: na mua ˈtu e 14 amuiraa e i muri iho 2 681 amuiraa. E rave rahi amuiraa tei fifihia no te imi i te hoê vahi no te mau putuputuraa. I te tahi mau Piha a te Basileia, e ono amuiraa te putuputu mai. I te tahi atu vahi, ua rahi aˈe te taata tei tae mai i te vahi putuputuraa: te vai ra vetahi o te tia i rapae no te faaroo i te mau putuputuraa i te haamaramarama. Te vai atoa ra e rave rahi amuiraa o te putuputu mai i te fare o te tahi taata aore ra i te mau fare haapiiraa.

I 1990, ua haamata te amaa a te mau Ite no Iehova i te turu i te pae moni i te paturaa o te mau piha maoti te afata ô no te Faufaa no te mau Piha a te Basileia. I 1997, ua tauturu te mau tomite paturaa no te fenua i e 105 amuiraa ia patuhia aore ra ia faaapîhia ta ratou mau piha. Mai 1997 tae atu i 1999, ua patuhia 13 piha. E 7 e tae atu 15 mahana no te patu i te piha taitahi.

Noa ˈtu te rahi o te mau paturaa piha, aita i navai i mua i te maraaraa o te numera o te mau Ite no Iehova i Nigeria. I Eperera 1998, ua faaoti te amaa e mea tia ia patu 1 114 Piha a te Basileia i tera fenua.

I te putuputuraa taa ê i te oire o Bénin, ua parau Don Trost, melo o te amaa no Nigeria, i te taatoaraa: “Ua riro te reira ei ohipa iti rahi! Te ui nei matou, ‘E nafea te reira e oti roa ˈi?’” I 1999 noa iho â, ua pahonohia tera uiraa inaha ua tauturu te mau pǔpǔ paturaa i te mau Piha a te Basileia i te mau amuiraa o tera fenua. E ono tae atu i te vau melo i roto i tera pǔpǔ taitahi. Ma te faaohipa i te mau ravea paturaa ohie, ua patu ratou 17 Piha a te Basileia i te avaˈe taitahi i roto i te area 14 matahiti.

Ua haapopou te taeae Trost i te taatoaraa no te ohipa tei ravehia. I muri iho, ua faaara oia e te vai noa nei â e rave rahi ohipa. I 2013, ua tapaohia 8 000 atu â Ite no Iehova i Nigeria. Ua parau te taeae Trost: “I mua i teie maraaraa, e mea tia ia patu 100 Piha a te Basileia i te matahiti taitahi.” I 2013, ua tapaohia i Nigeria e piti numera faufaa roa: 351 000 Ite no Iehova e 5 700 amuiraa.