Ma te faaohipa i te hoê hivi, te tuu ra te hoê ona ohipa i te tahi afata na nia ˈtu i te tahi atu mau afata i te hoê vahi paruru-maitai-hia. Ua avarihia te reira e te vahi fariiraa taata i Me 2017. I Atete, ua tapaohia hau atu 17 000 taata tei haere e mataitai i taua vahi ra.

Te faaohipa ra te feia rave ohipa i te hoê hivi no te tuu i te tahi tahua tima patu-aˈena-hia i te vahi nohoraa F, te vahi nohoraa matamua tei patuhia. Mea aano te area i ropu i te mau fare tahua rau. Mea ohie aˈe ïa ia tuu i te mau tahua tima ma te ore e tatuhaa i te reira.

Te patuhia ra e pae vahi nohoraa i te hoê â taime. I mua o te hohoˈa, te tamau ra te feia rave ohipa i te mau auri, hou a tuu ai i te tima i te vahi nohoraa B. I muri mai, i te pae atau, te tuuhia ra te tima i te vahi nohoraa D. I muri i te pae aui, te faaohipahia ra te hoê hivi no te tuu i te hoê patu tima no te piha utaraa taata e te paiumaraa o te vahi nohoraa E.

Te itehia ra te hoê rima tauturu o te pǔpǔ tamau i te faataheraa pape. Te tataratara ra o ˈna i te mau tapiriraa faira hau i nia i te mau tuio PVC o te faataheraa pape no te mau auri tupohe auahi. E tapirihia te mau tuio maoti te tapiraa faira. E tataratarahia te tapiriraa faira hau e e tamatahia te paariraa e te maitai o te tapiriraa. Ua tuuhia maha kilometera tuio pape no te mau auri tupohe auahi.

Te tamâ ra te hoê rima tauturu i te taheraa pape tima. Maoti te reira, e nehenehe te mau purumu e haere na nia i te mau tuio taheraa pape. E tahe maitai atoa te pape ûa i te mau hopuna tamâ pape, ia ore te pape e pue mai.

Te vai ra te hoê tane e ta ˈna vahine o te pǔpǔ papai hohoˈa o te tapao ra ihea e tuuhia ˈi te mau patu i te tahua matamua.

Te hoê hohoˈa patahia na nia mai i te pae Hitia o te râ o na vahi nohoraa e pae te patuhia ra. I Tetepa, ua oti te paturaa rahi, te tuuhia ra te mau patu o te vahi nohoraa F (i muri i te pae atau) e ua haamatahia te pateraa e te peniraa o te mau patu. I te hoê â taime, ua haamata te mau rima tauturu i te tamau i te mau patu i rapaeau e i te mau haamaramarama i te vahi nohoraa E (i muri i te pae aui). Ua faanahohia te mau vahi nohoraa B, C e D ia nehenehe e tuuhia te paˈepaˈe, te uira, te faataheraa pape e te eˈa faatiahia no te feia rave ohipa.

Te vai ra o Robert Luccioni, taeae tauturu i te Tomite piaraa o te Tino aratai e tiaau o te tuhaa Paturaa na te ao nei (WDC). Te horoa ra oia i te hoê oreroraa parau Bibilia no te faaitoito i te mau pǔpǔ rave ohipa. E hiˈopoa te tuhaa WDC i te mau hohoˈa e te paturaa o te mau Betela apî na te ao nei ia nehenehe te ohipa e tere maitai e ia ore te reira e titauhia i te mau haamâuˈaraa rahi.

Te tima ra te mau rima tauturu i te raroraa o te piha e tuuhia ˈi te mau ravea no te mǎhu, te uira e te roro uira. I te pae atau o te hohoˈa, te faaohipa ra ratou i te hoê tuio no te tima i te hoê patu paari maitai no te faaiti i te maniania.

Te hiˈo faahou ra te hoê pǔpǔ papai hohoˈa i te hohoˈa o te paturaa hou a tapao ai ihea e tuuhia ˈi te mau auri.

Te tamau ra te hoê taata rave ohipa i te auri no te mau patu i rapaeau.

Te faatiahia ra te hoê eˈa o te faaati i te vahi nohoraa E. Mea ohie aˈe ïa no te mau rima tauturu ia ohipa i nia i te mau patu i rapaeau.

Te faaohipa ra te hoê rima tauturu i te hoê peni taa ê i nia i te mau haamaramarama tei tuu-noa-hia ˈtura. A mǎrô ai, e paruru tera peni i te mau hiˈo i te roaraa o te ohipa paturaa. E tatarahia te reira ia hope te paturaa.

Te hiˈopoa ra te pǔpǔ rave ohipa i nia te faataheraa pape i te ravea haaveavearaa tuuhia na raro o te mau piha. I muri aˈe i te raveraa i te mau faatanoraa, e tuuhia te tima na nia i te mau tuio haaveavearaa.

Te tâpû ra te hoê rima tauturu i te tuhaa matie itehia i mua i te tomoraa o te vahi paturaa. Maoti teie matie, eita te aihere e tupu mai e mea ohie aˈe ia atuatu i tera vahi itehia i pihai iho i te hoê purumu mea rahi te pereoo.

Maoti te hoê matini parauhia GPS, te faataa ra te hoê ona ohipa ihea e patuhia ˈi te tomoraa o te mau vahi nohoraa. Te tuu ra o ˈna i te mau auri e te peni ra o ˈna i te reira ia ite-maitai-hia. I roto i tera vahi ohipa, e itehia te vahi tunuraa maa e te hoê vahi faaohipahia no te tamaa e no te putuputuraa. E itehia te reira i muri i te taata rave ohipa.

Te tamau ra te hoê tane e ta ˈna vahine i te tahi patu raau no te tapea i te tima e titohia no te ravea faataheraa pape ûa. I muri mai, ua tuuhia te hoê paruru i te mau vahi nohoraa E e F ia nehenehe te ohipa e ravehia i te tau toetoe, noa ˈtu te huru o te reva.

Te fanaˈo ra te hoê rima tauturu i te tahi faaineineraa no te ite e nafea ia faaohipa i te hoê ravea no te amo e no te haamau i te mau hitiraa eˈa e 70 kilo te teiaha. E timahia tera mau hitiraa ia mau maitai te reira.

Te haamauhia ra te hoê tuio pape e te haapao ra te hoê rima tauturu ia ore te reira e hauti. Ua titauhia e pae kilometera tuio pape no te taatoaraa o te Betela apî.

Te tâpû ra te hoê rima tauturu i te mau ofai tima maoti te hoê matini. E faaohipahia tera mau ofai tima no te faanehenehe i te hitiraa o te mau vahi nohoraa. E faaohipahia hau atu 300 000 ofai tima no te taatoaraa o te mau vahi nohoraa.