E rave rahi taata tei maere i te feruriraa horoa noa o te mau rima tauturu o te paturaa i Warwick. Ua na ô te tahi tia faatere taiete o tei tamau i te mau ravea faautaraa taata no te mau fare tahua: “Te rave ra ta outou mau pûpû rave ohipa i te hoê ohipa faahiahia mau! Eita te rahiraa taata i teie mahana e horoa i to ratou taime ma te tamoni ore.”

Ua faaroo oia, e te tahi atu mau taata, eita te mau rave ohipa e faaaufau i to ratou taime i roto i te paturaa o te pu a te mau Ite no Iehova i Warwick i New York. Ua na ô ïa ratou, e rave te mau Ite no Iehova o tera vahi i te ohipa paturaa i te hopea hebedoma anaˈe. Ua maere ratou i te farereiraa i te taata o te ora ra ati aˈe i te Hau Amui no Marite o tei faarue i ta ratou ohipa no te turu i tera paturaa tau avaˈe aore ra tau matahiti.

I 2015, 23 000 rima tauturu Ite no Iehova tei ohipa e te utuafare o te Betela o te Hau Amui no Marite i roto i te paturaa i Warwick. Hau atu â, 750 rave ohipa, e ere i te Ite no Iehova, tei turu atu ia oti tera opuaraa i roto i te area taime faataahia. E rave rahi o ratou tei maere e tei maitaihia i te ohiparaa e te mau Ite no Iehova.

Teie ta te tahi taata rahi i roto i te hoê taiete hamani haamaramarama e paruru auri i papai: “Ua maere roa te mau rave ohipa o ta matou taiete i to outou huru. Tera te tumu e hinaaro ai e rave rahi o matou e ohipa noa i reira.”

Ua faataa te hoê taiete ê te tahi o ta ratou rave ohipa no te turu i te hamaniraa o te mau tino tafare o te mau fare nohoraa. I te otiraa te tuhaa a ta ratou taiete, e toru rave ohipa tei faaoti papu e faaea noa i nia i te paturaa i Warwick. Ua faarue i ta ratou ohipa e ua faaô i roto i te tahi atu taiete o te ohipa noa ra i ǒ.

Ua maitaihia vetahi feia rave ohipa i te mau huru maitatai o te mau Ite no Iehova. Tera tei tupu no te tahi rave ohipa o te taiete o tei haamau i te mau niu o te mau fare tahua. I muri aˈe tau avaˈe, ua tapao ta ˈna vahine ua taui to ˈna huru e ta ˈna huru paraparau. Ua oaoa roa oia e ua na ô: “Ua taui roa ta ˈu tane!”

E rave rahi vahine Ite no Iehova tei ohipa atoa i ǒ. Aita ratou i faahoro noa i te mau pereoo faauta taata, tamâ i te mau piha e tapaopao i nia i te papie. Ua haapao atoa râ i te tereraa o te mau pereoo, ua faaohipa i te mau taihaa teiaha, ua tamau i te mau niuniu, ua oomo i te reira i roto i to ratou vairaa ia ore te uira ia haru, ua tamau e ua faanehenehe i te mau pǎpai, ua tuu i te mau faataheraa pape e ua tima atoa. Mea itoito roa ratou!

Ua tapao te tahi taata o tei ohipa i nia i te mau tino tafare, e tapea vetahi tane e vahine i to ratou rima a pou mai ai na roto i te pereoo mataeinaa. Ua putapû roa oia. Ua ite atoa o ˈna i te mau vahine o tei ohipa ma te itoito. Ua na ô oia: “E manaˈo oioi oe, ua apee noa mai ratou i ta ratou mau tane. Ia haamata anaˈe râ matou paatoa, te ite atura oe ia ratou ia rave i te ohipa! Ua apiti au i te mau ohipa paturaa ati aˈe ia New York, a tahi ra vau a ite ai i te reira!”

Aita i faitohia aˈenei te toˈetoˈe mai tei itehia i te tau toˈetoˈe o 2014 e 2015. Mea ohie ia hinaaro e faaea i te fare i te haere e rave i te ohipa i rapae i roto i te toˈetoˈe! Te faatia ra Jeremy, te tahi Ite no Iehova o tei tiaau i te ohipa paturaa: “I te mau mahana toˈetoˈe roa, e ani mai te tiaau ohipa no te mau niu fare o te tahi taiete, ‘E haere mai anei te mau vahine e rave i te ohipa ananahi?’

Hau atu 35 pereoo mataeinaa tei tarahuhia no te haere e tii e e faahoˈi i te mau rima tauturu o te paturaa i Warwick.

I te tahi mahana, na mua ˈˈe ratou a tere ai, ua tia mai te taata faahoro i mua maitai i te feia i roto i te pereoo mataeinaa. Ua na ô oia: “Mea au roa na ˈu e faahoro i te mau Ite no Iehova. A papai na i to ˈu paoti ohipa ia tapea ia ˈu i nia i teie tere. Mea rahi ta ˈu i haapii i nia i te Bibilia na muri ia outou. Na mua ˈˈe, aita vau i ite eaha te iˈoa o te Atua aore ra e riro te fenua ei paradaiso. I teie nei, aita vau e riaria faahou ra i te pohe. Ua putapû roa vau. E ite mai outou ia ˈu i te Piha a te Basileia i ta ˈu mahana faaearaa ohipa i mua nei.”

Te faatia ra Damiana, te tahi rima tauturu Ite no Iehova: “I te tahi mahana, otiraa matou paatoa i te paiuma i nia i te pereoo mataeinaa, ua faaite mai te taata faahoro, e poroi ta ˈna na matou. Ua na ô mai oia, e 4 000 Ite no Iehova ta ˈna i faahoro i te mau vahi e rave rau i New York. Teie ta ˈna i parau, ‘Mea rahi te mau peu au ore a te taata, outou râ, te ohipa ra ïa noa ˈtu mea taa ê te tahi e te tahi, mea hoê roa outou. Auê te faahiahia!’ Ua faaite atoa mai oia mea au roa na ˈna e paraparau na muri ia matou.

Hoperaa ta ˈna parau, ani atura te tahi Ite no Iehova, ‘E farii anei oe ia himene matou?’

Pahono aˈera oia ma te ata, ‘Na reira! E nehenehe anei e haamata na roto i te himene 134?’” a