Te haere noa ra e piti ohipa paturaa rarahi a te mau Ite no Iehova i Marite i mua maoti te mau rima tauturu o te haere mai na te fenua atoa.

Wallkill, New York: Ua hau atu i te 1 600 Ite no Iehova te noho ra i ǒ. I reira atoa e piahia ˈi te mau papai no te mau Ite no Iehova i Marite. Ia rau te ohipa e ravehia i ǒ, te hamanihia nei te hoê paturaa e toru tahua no te mau piha ohipa, te hoê paturaa e toru tahua no te mau nohoraa e te hoê vahi tapearaa pereoo. Te rahiraa o te rave ohipa, e rima tauturu ïa. I 2012, ua faaoti te mau rima tauturu i te paturaa no te vaiiho i te mau matini e i te piha amuraa maa ia ô e 200 â parahiraa.

E amaa ta te mau Ite no Iehova i te fenua e rave rahi mai i Beresilia, Heremani e Mehiko. I Marite, te vai atoa ra te hoê pu haapiiraa i Patterson e te mau piha ohipa i Brooklyn (New York). Ia faaauhia i te tahi atu e ua oti anaˈe te mau ohipa paturaa i ǒ, o Wallkill te paturaa rahi aˈe na te ao ta te mau Ite no Iehova e faaohipa.

Warwick, New York: I reira e haamauhia ˈi te pu rahi apî a te mau Ite no Iehova. Ua tupararihia te mau paturaa tahito i vai na i ǒ. Ua hoo mai te mau Ite no Iehova i te hoê tâpû fenua i Tuxedo, 10 kilometera i te atea ia Warwick, no te vaiiho i te mau matini e te mau tauihaa paturaa. Ua farii te feia mana no ǒ i te hiˈopoaraa ravehia no te paruru i te natura. Ia fariihia te hohoˈa o te paturaa, e anihia te parau faatia no te patu i te pu rahi. A tiai ai râ, e ohipa noa te pu rahi a te mau Ite no Iehova i Brooklyn, New York.