Ua horoa Harold Corkern, taeae tauturu i te Tomite Neneiraa a te Tino aratai, i te hoê oreroraa parau “A haa ia au i to outou aravihi.” E pinepine te taeae orero i te haere i Warwick no te faaitoito i te feia rave ohipa.

E paruru te ie uouo i te feia rave ohipa e e tauturu ia ratou ia rave maite i ta ratou ohipa i te tau toetoe. I roto i teie tuhaa o te fare, te vai ra te piha tamaaraa, te fare utuutu, te piha tunuraa maa e te vahi puˈaraa ahu.

Te faaineine ra te feia ohipa uira no te tamaumau i te mau niuniu. 12 000 metera te roa o te mau niuniu o tei huti-ê-na-hia na roto i te mau fare tahua. Ua haamata te ohipa uira i Warwick i muri iti noa ˈˈe a fatu ai e a hoohia ˈi tera vahi. E ua tamau noa te reira e tae roa i te taime e oti ai teie ohipa.

Te tapiri ra te hoê rave ohipa i nia i te taupee iti te ripene iiru ia ore te pape e ô. I ǒ nei, i te mau taupee iti i te tahua i nia ˈtu, ua tuuhia te peni mai te pape ra te huru parauhia te polyméthacrylate de méthyle, ia ore te pape e ô i roto.

Te hoê metua tane e ta ˈna tamahine i roto i te hoê pǔpǔ ohipa uira e tamaumau ra i te mau niuniu no te horoa rahi atu â i te uira no te mau nohoraa atoa.

Te vai ra te piha tamaaraa o tei tuuhia no te hoê taime poto i reira te feia rave ohipa e tamaa ai. I te mau mahana atoa, ua hau atu 2 000 maa te operehia.

Te tamaumau ra te hoê pǔpǔ taata o te haapao ra i te tino fare i te mau auri o te fare tahua i raro i te fenua no te tuhaa atuaturaa.

Te mau rata a te mau tamarii o te faaite ra i te mauruuru i te feia rave ohipa i nia i te paturaa. E rave rahi tei haere mai no te tauturu i te paturu no te hoê tau poto. Fatata 500 rave ohipa apî te tae mai i te mau hebedoma atoa. I Fepuare, 2500 tiahapa rave ohipa i nia i te paturaa no Warwick i te mau mahana atoa.

Fatata 60 paturaa i nia i te hanere o tei oti. Mai Tenuare e tae atu i Eperera 2015, ua oti atoa te mau paturaa rarahi o te mau nohoraa o te mau piha ohipa/Tuhaa paturaa auri. I te roaraa o tera taime, ua haamata te feia rave ohipa i te tamau i te patu tima o tei faaineine-ê-na-hia i nia i te Tuhaa atuaturaa, e i te hamani i te mau eˈa turu no te haere na te tahi nohoraa i te tahi atu nohoraa e no te haamaitai i te patu haapahuraa pape no te roto Ninamu parauhia Sterling Forest Lake.

Na raro atu i te hiˈo i te hoê patu eˈa. Na te hoê taiete ê atu e hamani i teie patu e 5 tahua e na te mau Ite no Iehova e tito i te tima.

I te hoê mahana toetoe, te tamaumau ra te hoê pǔpǔ taata o te haapao i te tino fare i te mau auri o te tahua matamua, fatata ïa 127 tenetimetera. E ua topa te hiona i te avaˈe Tenuare e Mati. Te vai ra te feia e tatara i te hiona ia vaiiho-noa-hia te vahi raveraa ohipa mâ e ia vai noa te mahanahana no te feia rave ohipa.

Ua tamauhia te tafare punu i nia i te ahô fare o tei faaineine-ê-na-hia. I te pae hopea o te avaˈe Eperera, ua oti te rahiraa o te mau tafare e piti pae to te reira o tei parauhia pignon i te tamaumauhia i nia i te mau nohoraa. Te mau tafare hopea o te nohoraa B, e oti ïa i te afaraa o te avaˈe Tiunu.

Ia hiˈohia na nia i te hoê hivi i te nohoraa B.

Te hiˈo ra te feia e tamaumau ra i te mau faataheraa pape i te Tapearaa pereoo no te feia e noho i ǒ. Ua hau atu 3 400 hohoˈa fare o tei horoahia te parau faatia no te mau paturaa.

Mai te hoê piha utaraa taata, te tamaumau ra te mau rave ohipa i te ie no te paruru i te fare tahua. E rave rahi porotarama no te faaineineraa no te haapapu i te feia e nehenehe ta ratou e faaohipa i te piha utaraa taata e te tahi mau ravea no te paruru ia ratou. Te vai ra te mau matini utaraa taata no e piti taata aore ra hau atu, te mau paruru ia ore e topa, te mau buka no nia i te parururaa, te tapoi ihu e te vaha e te mau taura paumaraa ia ore te hoê taata e topa.

Ia hiˈohia na te pae tooa o te râ ˈtu i te paturaa o te mau nohoraa. I te pae hopea o te avaˈe Eperera, e rave rahi ohipa i nia i te mau tamaumauraa uira i te Nohoraa A, B e D, ta te hohoˈa ïa e faaite ra. I roto i te Nohoraa C (eita e itehia i nia i teie hohoˈa), ua haamata aˈena te paturaa o te tino fare, te tamauraa i te mau papaˈi parauhia placoplâtre, te tapiriraa i te mereti e te tuuraa i te peni.

Te faaohipa ra e piti rave ohipa i nia i te matini utaraa taata i te hoê peni ia ore te rapae o te patu e fifihia. E titauhia e piti avaˈe no te faaohipa i te matini utaraa taata i te mau nohoraa taitahi.

Te patu ra te tamuta fare i te hoê patu ofai paari ereere parauhia granite. Teie tuhaa o teie fare tahua, o te piha ïa no te farii i te taata e te mau piha rau.

Te hoê taata hopu aravihi i roto i te roto Ninamu o te mono ra i te hoê faataheraa pape tahito e ia tamau mai i te mea apî. Ia taumihia te hoê pitopito, e topa mai te pape o te roto i raro ia ore e tupu mai te pape faaî i mua i te hoê mataˈi rorofai.