I te matahiti taitahi, e nenei te mau Ite no Iehova i te tahi mau video o te faaitehia i ta ratou mau tairururaa. Ua haruharuhia te rahiraa o tera mau video na roto i te reo Beretane. E nafea ïa te mau taata o te putuputu i tera mau tairururaa na roto hau atu 100 reo e taa ˈi i tera mau video? Na roto e rave rahi o taua mau reo ra, ua haruharuhia te paraparauraa o te video e ua apitihia te reira i te mau hohoˈa tavirihia. Eaha ta te feia tei tae i te tairururaa i parau no nia i te mau video hurihia?

Ua putuputu te feia e ere i te Ite no Iehova i te mau tairururaa i Mehiko e i Marite no ropu. A hiˈopoa na i ta ratou i parau.

• “Ua taa ia ˈu te hohoˈa teata. Hau atu, mai te huru ra e tei roto roa vau i te hohoˈa teata. Ua putapû roa to ˈu aau.”—Te hoê tane tei tae i te tairururaa na roto i te reo Popoluca, i Veracruz, i Mehiko.

• “E au ra e tei to ˈu oire au e te paraparau ra vau e to ˈu hoa piri. E mau hohoˈa teata faahiahia roa no te mea ua taa ia ˈu i te mau mea atoa tei parauhia i roto.”—Te hoê tane tei tae i te tairururaa na roto i te reo Nahuatl, i Nuevo León, i Mehiko.

• “A mataitai ai au i te mau video na roto i to ˈu reo, e au ra e te paraparau ra te mau taata ia ˈu iho.”—Te hoê vahine tei tae i te tairururaa na roto i te reo Chol, i Tabasco, i Mehiko.

• “Te hinaaro mau ra teie faanahonahoraa e tauturu i te taata ia haapii mai na roto i to ratou iho reo. Aita ˈtu faanahonahoraa mai teie!”—Te hoê tane tei tae i te tairururaa na roto i te reo Cakchiquel, i Sololá, i Guatémala.

Aita te mau Ite Iehova e tihepu ra i te rave ohipa tuite aore ra i te feia e rave ra i te ohipa ei taata hauti. Hau atu, te haruharu ra ratou i te mau vahi atea e te veve. Tera râ, mea nafea ratou i te neneiraa i te mau video faahiahia roa?

Aita i maoro aˈenei, ua hiˈopoa te amaa a te mau Ite no Iehova i Marite no ropu i te huriraa e haruharuraa a te mau video no te tairururaa na roto i te reo Paniora e i na reo tumu e 38. Ua apiti mai e 2 500 tiahapa taata i roto i tera ohipa. Ua haruharu te mau pǔpǔ huriraa e haruharuraa i te paraparauraa o te video i te amaa, i roto i te mau piha ohipa huriraa aore ra i te tahi atu mau vahi. Ei taatoaraa, ua haruharuhia i hau atu 20 vahi i Bélize, Guatémala, Honduras, Mehiko e Panama.

E titauhia i te ohipa rahi e te moni no te faaohipa i taua mau vahi ra i te tahi taime ei piha haruharuraa. Maoti te mau taoˈa i vai na i te fenua, mai te mau ahu taoto e te mau roi mǎrû, ua patuhia te tahi mau paruru ia ore e faaroohia te maniania i rapae.

I rotopu i te feia faaohipahia no te haruharu i to ratou reo, e rave rahi aita e moni ta ratou e ua rave ratou i te mau haapaeraa no te haere i te piha haruharuraa piri roa ˈˈe i ǒ ratou. Ua tere vetahi o ratou 14 hora i te maoro! I te hoê taime, ua haere te hoê metua tane e ta ˈna tamaiti na raro e vaˈu hora i te maoro no te tapae i te hoê piha haruharuraa.

Ua matau Naomi i te tauturu i to ˈna utuafare ia haamau i te tahi mau piha faaohipahia i te tahi taime no te haruharuraa. Te haamanaˈo ra oia: “Ua tiai ru noa matou i te hebedoma e ravehia te haruharuraa. E ohipa maite to ˈu papa no te faanaho i te mau mea atoa. I te tahi mau taime, e tunu to ˈu mama i te maa no te hoê pǔpǔ e 30 taata.” I teie nei, e rima tauturu o Naomi i te piha huriraa i Mehiko. Te na ô ra oia: “Mea oaoa roa na ˈu ia pûpû i to ˈu taime no te tauturu i te taata ia faaroo i te poroi Bibilia na roto i to ratou iho reo. Tera te ohipa faahiahia roa ˈˈe no ˈu.”

I te matahiti taitahi, e tupu te mau tairururaa a te mau Ite no Iehova na te ao nei e e nehenehe te mau taata atoa e apiti atu. A pata na i nia i te tuhaa TAIRURURAA no te ite hau atu â.