I Mehiko e i Marite no Ropu, e 290 aˈe taata i e ono fenua te huri ra i te Bibilia e i te mau papai Bibilia na roto hau atu e 60 reo. No te aha mea faufaa ˈi te reira? Ia taio te tahi taata i te mau papai Bibilia na roto i te hoê reo ta ˈna e taa maitai, e putapû to ˈna aau.—Korinetia 1, 14:9.

No te haamaitai atu â i te huriraa, ua tonohia te feia huri no te amaa a te mau Ite no Iehova i Mehiko i te mau vahi i reira e paraparauhia ˈi to ratou reo. Eaha te apî? I te mea e te ora ra te feia huri i rotopu i te feia e paraparau ra i to ratou reo i te mau mahana atoa, mea ohie aˈe no ratou ia huri i te mau papai ia taa-maitai-hia te reira.

Eaha te manaˈo o te feia huri? Te na ô ra o Federico, te hoê taata huri na roto i te reo Nahuatl no Guerrero: “Hoê ahuru matahiti to ˈu faaearaa i te oire no Mehiko, hoê noa utuafare ta ˈu i farerei o te paraparau ra i to ˈu reo. I teie nei râ, i roto i te mau oire e haaati ra i te piha huriraa, te paraparau ra te rahiraa o te taata i teie reo!”

Te na ô ra o Karin, te hoê taata huri na roto i te reo Plautdietsch i te hoê piha huriraa i Chihuahua i Mehiko: “Te tauturu mai ra te oraraa i rotopu i te nunaa taata Mennonite ia faatano i ta ˈu huriraa i ta ratou huru paraparau. Te ora e te rave nei matou i te ohipa i roto i te hoê oire iti. E ia hiˈo atu vau na te haamaramarama, e ite vau i te feia te faufaahia i ta matou e huri nei.”

Te ora ra Neyfi i Mérida, te hoê oire no Mehiko. Te na ô ra oia: “Ia faatere matou i te mau haapiiraa na roto i te reo Maya, e ite roa matou e aita te taata e taa maitai ra i te tahi mau parau ta matou i huri. E imi ïa matou i te hoê ravea no te imi i te hoê huriraa ta ratou e taa maitai aˈe.”

Eaha te manaˈo o te feia e taio i te mau papai hurihia? A hiˈo na ia Elena o tei haere tamau e 40 tiahapa matahiti i te mau putuputuraa a te mau Ite no Iehova. O te reo Tlapanec to ˈna reo tumu. I te mea râ e e faaterehia te mau putuputuraa na roto i te reo Paniora, aita oia i taa maitai i te mea e parauhia ra. Te parau ra o ˈna: “Te mea noa ta ˈu i ite, oia hoi e mea tia ia haere au i te mau putuputuraa.” I to ˈna râ haapiiraa i te Bibilia maoti te mau buka rairai na roto i te reo Tlapanec, ua here roa ˈtu â o ˈna i te Atua a pûpû roa ˈtu ai i to ˈna ora ia ˈNa. Ua bapetizohia Elena i 2013. Te parau nei oia: “Te haamauruuru nei au ia Iehova i te tautururaa mai ia ˈu ia taa i te Bibilia.”