Ua huri te mau Ite no Iehova i te mau papai Bibilia mai te reo Marite na roto hau atu i te 900 reo. Ia hurihia te hoê papairaa na roto i te tahi atu reo, e ere roa i te mea ohie. E mea fifi roa ˈtu â ïa ia huri na roto i te reo apǎraa rima. E rave rahi feia tariˈa turi o te aparau ra ma te faaohipa i to ratou rima e to ratou hohoˈa mata. No reira, ia tae mai te hoê papai, e hurihia te reira ma te haruharu i te hoê video na roto i te reo apǎraa rima. Maoti tera ravea, ua huri te mau Ite no Iehova i te mau papai na roto hau atu 90 reo apǎraa rima.

E mea aravihi te taatoaraa o te mau Ite no Iehova maitihia no te huri na roto i to ratou reo. Oia atoa te feia huri na roto i te reo apǎraa rima. E rave rahi o ratou e mea tariˈa turi e ua paari ratou ma te faaohipa i te i te reo apǎraa rima. No te tahi atu, e faaroo ratou, ua paari râ i roto i te hoê utuafare e vai ra te mau fetii tariˈa turi. Ua riro atoa te feia huri ei mau taata o te haapii maite ra i te Bibilia.

E fanaˈo te feia huri tei ô noa ˈtura i roto i te pǔpǔ huriraa, i te hoê faaineineraa rahi no nia i te mau aratairaa i te pae o te huriraa. Ei hiˈoraa, ua parau o Andrew : “I to ˈu apîraa, ua haere au i te haapiiraa no te mau taata tariˈa turi e ua faaohipa vau i te reo apǎraa rima. Maoti te faaineineraa ta ˈu i fanaˈo ei taata huri, ua taa ia ˈu i te tarame o taua reo ra. Ua haapii atoa mai te tahi atu mau taata huri e nafea ia haamaitai i ta ˈu mau apǎraa rima, mau hohoˈa mata e mau hautiutiraa i te tino no te faaite papu i te mau manaˈo.”

Te ohipa amui ra te mau taata huri ei pǔpǔ huriraa. Mea taa maitai te ohipa a te mero taitahi, oia hoi te huriraa o te papai, te hiˈopoaraa e te faatanoraa o taua huriraa ra. I muri iho, mai te peu e nehenehe, e hiˈopoa te hoê pǔpǔ taata tariˈa turi i te huriraa. No te mau vahi e rave rau ratou e mea taa maitai to ratou mau huru tupuraa. E faaohipahia to ratou mau manaˈo no te haamaitai i te huriraa. Te haapapu ra teie huru raveraa e ua taa-maitai-hia te mau apǎraa rima e te mau hohoˈa mata faaohipahia i roto i te huriraa. Te haapapu atoa ra te reira e mea papu e mea maramarama anei te poroi o te video.

Mea pinepine te mau taata huri na roto i te reo apǎraa rima i te haere i te mau putuputuraa na roto i taua reo ra. Hau atu, te faatere nei ratou i te mau haapiiraa Bibilia e te mau taata tariˈa turi e ere i te Ite no Iehova. A na reira ˈi, e ite noa ïa ratou mea tano anei ta ratou huru huriraa.

Te faaite ra te Bibilia e e farii te mau taata “no roto mai i te mau nunaa e opu e reo atoa” i te poroi tamahanahana a te Bibilia. (Apokalupo 7:9) Papu maitai, i rotopu ia ratou, te vai ra te mau taata o te faaohipa ra i te reo apǎraa rima.

Mea au na te mau taata huri e faaohipa i to ratou taime e to ratou aravihi i roto i tera ohipa faufaa roa. Ua parau te hoê taata huri, o Tony to ˈna iˈoa: “No te mea e taata tariˈa turi vau, e nehenehe au e taa maitai i te mau fifi ta te mau taata tariˈa turi e faaruru nei. Tera to ˈu hinaaro mau: ia farerei i te mau taata tariˈa turi e rave rahi, ia nehenehe au e faaite atu i te tiaturiraa papu a te Bibilia.”

Ua parau o Amanda, o te ohipa ra e te hoê pǔpǔ huriraa na roto i te reo apǎraa rima: “No ˈu, mea rahi aˈe te oaoa ia huri i te mau papai no te faaite i te poroi Bibilia i te mau taata tariˈa turi, i te oaoa ta ˈu i ite i ta ˈu ohipa matamua.”

Maoti te tuhaa “Te mau api e mau papai na roto i te reo apǎraa rima” (reo Farani) e ite ai outou e nafea ia mataitai i te mau video i nia i te reni natirara jw.org (reo Farani).